Read Maru PHA,JHI" DAO: 6 Bible Online

PHA,JHI" DAO: 6 - Maru bible

PHA,JHI" DAO: 6

¹Ce: mug: myid dao mae gyai xo sho' tarha" madin nyang: ru kad' thug' to" rure ngo the' myao va".

²Mao"So wa dayaug yaug re ngaui qhang jo,nho"- myo, nho nga: lao: lahau: we' jo,nho" zai yo byid' ra". Ngad va" yao: o: ru alhab' byid' ra". Ngadqere ai: rure pyo: pyo: akyu" kham zo: nae" akhang" mabyid: ngad: ra". Ai: taung bug dayaug wa atha" khyo" ai rure pyo: pyo: kham zo" li" nae". Aiwa akeim ngad: ra". Airu alhab' shad' ra".

³Yauggai dayaug wa yao" myid:zo: dayo yaug qo" mung: ayo, myao" sho' daui: na: ra". Ngadqere: yao: khomyhao" daui: na daui: na- yao" ngaui bau: ngaui lho" ru mathe' yu mung: nyang" za: nyhab' shaung: ru maqhug' ngad re ashid khau: ru je: gai: ra" ein: ngo ta".

⁴Ai: zonau" khau: li" ru wa zonau" qhid' mae" pe" akyu" mabo- yao: wa mug: cad' khug khyo byaug: vao lo" mung: yao: re ceim" to" myhid' pye'ako".

⁵Yao: wa na" gaung: bo" bao re khonhae" re: mathe' myao- kao so' gyaung: khyo ga: ru pe" ngad: rure: maba ngad: ra". Ngadqere:- mathae: thao" yao: wa dug no" ru qhug' yu: ava".

⁶Shid' taung zin daui: na qere: kao so' gyaung: khyo mae pyo" ru maqhug' ra" yaug tho' dugno: re je: qo" yu: ra". Lo" thao" mae wa- yao: shid' yaug: geim" dajo, qo khyo za: lo" nae" ngad: ako".

⁷Byu dayaug wa lhau" zo: lhau" shaug' nae" tab za: qo" nae" qhid' mae" mau" khao" ngadqere:- khonhae" laug: zo" ga" ru majo,-

⁸Pha,jhi" bo yaug wa nhag' magyang" yaug tho' khoqhi" je: gai: ra" i? Myaung yaug wa kao so' gyaung: khyo re khoru: kad' nae" rure ba yang pe" akyu" kham zo: nae" i?

⁹Aiwa akeim ngad: ra". Airu wa la re cao" khe' ru we' dau: ra". Nao qo" rumae nhag' dag: ru wa- gatau daja: ja: re khonhae" re myid: o: na: ra" tho' je: gai: ra".

¹⁰Boe" ru ja: khao: ngo" wa ganhae" gaco' mae" yaung: phyid' to: gau ngad: ra". Aimung: byu dayaug wa yao: tho' qam: bo yaug we' maqo" jho" ngag: rure ngonhaung" alhab' ba: ra".

¹¹Je: myao" sho' je: jho" ngag mae je:- ai wa je yang:- akeim ngad: ra". Aimung: nao wa pe" maje: gai-

¹²Byu dayaug yaug wa bao qab we' dakhyo: lai: lo" va" kao so' gyaung: khyo ngad: ra" yao" kao so' gyaung: khyo akeim- ce daqhang: za" ayo, mae byu dayaug: qhid' mae" pe" ja: gai: thao" rure khoru: qo" ba nae" i? Byu dayaug shid: byaug thao re mug: myid dao mae pe" boe" nae" rure- khoru: qo" ba nae" i?