Read Maru PHA,JHI" DAO: 7 Bible Online

PHA,JHI" DAO: 7 - Maru bible

PHA,JHI" DAO: 7

¹Mang gai lahau: wa gau cao" ra" nae pyo: xau tho' je: gai: ra". Aimung: nao shid: ra" ba na wa nao khau: li" ra" ba na tho' je: gai: ra"

²Pyo: poe zo: shaug' na: ra" yham khyo ye: nae" tho' mae kaug' ngug: na ko" ra" yham khyo ye" re je: gai: ra". Shid ru wa ngonhaung" alhab' mo, re lao" na: ruyang daui: na mo, wa khonhae" re: yao: yao" gaung re beim" na ca" ra".

³Kaug' qhui: ru wa qi: ru tho' je: gai: ra". Aiwa ni" nho: myo, khung: re kaug' ra" myo, khung: boe" re boe" nhao nae". Ngadqere: ni" nho: laba lajhao re saui" tho' byid' ra".

⁴Ngaui baui: nae" khyo re za: khonhae" re: myid: qu" na yaug wa nhag' magyang: yaug ngad: ra". Pha,jhi" bo: ra" byu dayaug wa shid: rure myid: qu" ba: ra".

⁵Nhag' magyang" ra" mo, yang nao re nghaui"caung" ra" tho' mae pha,jhi" bo: ra" mo; yang qeim yang: mho" ru wa gai: ra".

⁶Nhag' magyang" yaug qi: lao" myi: mae zau: kyin myo, nga" pyab' myang: ru we' dau: ra". Aiwa pe" lajheim: mabo ngad: ra".

⁷Pha,jhi" bo: ra" byu dayaug: yang byu dayaug yaug re mhug' pyag' re yao: wa ko: pyad' we' dakhyo: kad' ra" nao khug vag: re yu ngad: re ni" nho: ave, lo, mau" re qeim nhao: ra".

⁸Daja: ja: nho: athao" wa ai: nho: aqhid tho' je: gai: ra". Nhag' lam: qhang: ru wa ngad beim" ra" myid tho' je: gai: ra".

⁹Ni" nhag' yo" rure khang" wa, nhag' mashid qobo xam" ru wa nhag' magyang" ra" mau" zo" ngad: ra".

¹⁰O"- qhid' Phyao: mae" ba na jham mae pe"mung: je: gai: lai: lo va" laug i? ein: khonhae" re: damyid:- ai wa laba lajhao bo: ra" dao: myid: mangad:-

¹¹Kao so' daui: na: ra" yaug khao: ngo" wa pha,jhi" bo ca" ra". Aiwa- ma re qo" khae: yu ra" qhi" gai: ra".

¹²Aimung: ai wa nao re ngaui we' dakhyo: gug: gam qo" byid' li" nae" pha,jhi" wa nao re gug: gam taung" zam" to: byid' li" nae"- ceru wa laba lajhao: nho: akyu" ngad: ra".

¹³Mao"So kad' lai: lo va" khyo re myid: qu" wa, Mao"So: yang nghaug' nhao: to" rure khag' yang qo" gai: jhao" nae" i?

¹⁴Ni" qhid' mae" ja: nam jab gaigai: za: ngad: na: ai: au: re ngaui bau: wa,. Aimung: qug: khai: joe" li" ra" au: re ngaui bau: khyo we' qug: khai: shid' ja" geim" re Mao"So: yang nhao: ke' byid' ru ngad: rure: myid: beim: wa,. Thao mae pe" xo' boe" nae" rure nao khonhae" re: magai: ba: rure myid beim: wa,-

¹⁵Nga" kao so' gyaung: khyo wa akeim ngad: lai: lo: ra". Ngadqere: aimae ja: khao: ngo" re ngo the' myao: pye' va". Byu dayaug wa yao: makhyang: sho' ngadqere: xo' daui: na: ra" au: re- byugai yaug wa shid' lo" ba: ra".

¹⁶Aimung: gai re: dalam" gai- pha,jhi" re: dalam" bo- pe"mung: nao yao" gaung re se' pye' nae" i?

¹⁷Ngadqere:- dae xo: lai sho' re: makhyang: damung nhag' magyang: re: dalam" mung- pe"mung: mashid ca" shi: re shid nae" i?

¹⁸Athao saung" jhin" ru shid' ja" geim" re jao" pye' wa,- nao wa Mao"So re gyaug phug' myid bo:re- khoru: ngadqere: nao aung myaug nae".

¹⁹Mung" eib zug: daxe yaug: yang vomo" dalam: wa je: akyu" kad' byid' ra".

²⁰Myid gaung mae ayo, byang" sho' jo: ru za: kad' mung: khonhae" re mashad' qu" ru khag' mana ngad: ra".

²¹Byu: yang ta" ru ja: khao: ngo" alhab' re dataung" gyo: wa ni" daui nao zoshao: yang nao re nug: khyo: ceta" jung" na: rure nao the' gyo" re the' gyo: nae".

²²Aimung: nao: yang su gaje re myo: sho' lhang nug: khyo: ceta" jung" pye' va" rure nao yao: ba: ra".

²³Ngo wa ceru alhab' re jham" ca: qu" nae" qhid' mae" nga" pha,jhi" re yhung" ci: ra". Ngo wa pha,jhi" bo nae" qhid' mae" myid: phyid' ci va". Ngadqere:- aire ngo matho' myhi-

²⁴Kaoso' gyaung: khyo wa pe" lajheim: bo: rure khag' yang khoru:- ein: qho: qhug' nae" i? Aiwa ngonhaung" qhid' mae" saung" no; ra". Ba: gyo: nae" re: saung" qug' ra".

²⁵Ngadqere:- ngo wa laba lajhao we' mho" zhao: yu: ru qhid' mae" ngoyao" gaung re ayo, byid' pye' va". Ngo wa pha,jhi" we' nga" dao: myid: jham: nho: dao: phyid jham re qhug' sho' qho nae" qhid' mae" we' nhag' magyang" ru wa khoqhi" khonho" makhyang: mashab mung: kapyad' mau" ngad: ru myao sho' paui: qho nae" myid: phyid' va".

²⁶Ngo wa- shid: ru we' dau: ra" myiqe: tho' je: kho" ru daja: myao: va". Airu: dau: ra" myiqe: ngad: ra". Yao" yang nao re byid' ra" jhid'de; myid wa lha" yang: mangad: lao" jham we' dakhyo: myhi" yu: pye' li" nae". Amung: nao re po: ci: ra" yao" lo, wa nao re jao co: taui" yang we' dakhyo: nao re taui" to" li" nae". Mao"So myid o: ra" khyo" kad' ra" yauggai wa qo" phao loe, nae". Ngadqere: ai: myiqe: myhi" wa qobo jab re taung" yu: pye' li" nae".

²⁷Myid: pha,jhi" bo yaug wa- ngad va"- dao: phyid' jham re ngo qho: na: ra" au: ceru re zo" zo" mae" the' myao: yu va".

²⁸Ngo wa- dao: phyid' gatau re cao" qho ngadqere:- pe" dalam: re: mathe' qho: myao- yauggai dataung mae" ngoyang phug' myao" ra" byu dayaug re qhug' qho: myao:- ngadqere: myiqe: wa dayaug rere: maqhug' myao-

²⁹Cegu: alhab' wa ngo mho" zhao: yu: ra" gu: ngad: ra". Mao"So wa ngonhaung" re gyang: gyang: sho' sho' we' laui laui za: kad' to: byid: va". Ngadqere: ngonhaung" yao: ngonhaung" gyai athaui: anhaung" boe" nhao: bam va"- ga: ta" ra".