Read Maru PHA,JHI" DAO: 8 Bible Online

PHA,JHI" DAO: 8 - Maru bible

PHA,JHI" DAO: 8

¹Ja: nam jab wa pe" lajheim: ga: nug: rure pha,jhi" bo yaug za: ba: ra". Pha,jhi" wa yao: re qisam: su boe" nhao: ra". Aimung: yao" myo, maug sham: rure baui" lo" nhao: ra".

²Kho:kham ta" rure kad' wa,- aimung: Mao"So re ahin agyan dao so: pe" re: dabyid:-

³Kho:kham wa yao: yao: kad' nug: ru pe" re: qo" kad' ra". Aimung: yao" qhid' kheim: mae" phao: thug' lo" wa,- airu" gyaug ci" ca" ra" jo, qo mae dana: jo,-

⁴Kho:kham wa kheim: so' we' kad' ra". Aimung: yao: kad' rure khag' re: myo, byo, maqo" lhaung ngad: ra".

⁵Yao" amyin" re nao aphug' cao" na na wa nao mae gug: gam: ra". Aimung: pha,jhi" bo yaug wa khoau: khoru: phug' cao" nae" rure ba: ra".

⁶Ja: khao: ngo" re kad' nae" qhid' mae" jo: ra" ayo, we' jo: ra" akhyo jo; ra". Ngadqere: ngonhaung" wa dajhid' za: aba: lhe".

⁷Pe" boe" li" na: rure ngonhaung" khag' re: maba- aimung: ngonhaung" re ta" kyo: nae" khag' mana-

⁸Khag' re: yao: yao" gaung re mashid sho' maqo" kad'- yao: shid nae" ba na rere: maqo" qhui:- shid ru wa ngonhaung" maqo" loe: ra" gye poe ngad: ra". Ngonhaung" wa- aimae" maqo" phao: loe, ngad: ra". Mhug' pyag' yang: ngonhaung" maqo" loe, beim.

⁹Byu damyo" kheim: so' qo" mung: damyo" wa yao: bam: o mae dayin dayo: kham zo" na ra". Ce: mug: myid dao mae boe" ra" khyo re we' sin: yang: ngo myid: qu" ra" au:- cegu: alhab' ngo the' myao:-

¹⁰Ngad va" makhyang: mashab: ra" byu qere yao: bam: lab mae ye: nyhab' pye' qhug' ko" rure ngo the' myao: ngadqere: lab bug mae" dam: phao: tug' lo" mo, wa ai bam: makhyang: mashab: ra" mau" re kad' co' ko" ra"- vomo" khug mae lhao" re: yao: bam re caung:khin" ko" rure ngo the' myao:- ai wa akeim ngad: ra".

¹¹Byu qe wa pe"mung: yug: mau" re laui laui za: kad' thug' ko" laug i? pe"mung:ga"re yug mau" re phyad za: qobo dae mabyid: geyang: ngad: ra".

¹²Qobo jab wa- yug: mau" dayo ja: kad' mung: daui re adaui: na shanae". O" ngad va"- yao: bam pe" ta" rure ngo ba:- Mao"So re nao phug' cao" ngad: re- ja: khao ngo" wa pe" maca" nae" ga: ta" ako".

¹³Ngadqere:- makhyang: mashab mo, qhid' mae" pe" maca" mung nae" mangad: yao: bam: kao so' gyaung khyo wa- bao qab we' dau mung: yao: bam wa apyad ngai shi" re shid: byaug: genae". Pe"mung:ga"re yao: bam wa Mao"So re maphug' cao" ngad: ako".

¹⁴Ngadqere: ce wa pe" lajheim: mabo ngad: ra". Mug: myid dao mae pe" boe" na: rure qu" qu" wa,- din:man: mo, wa dalhang lhang makhyang: mashab yaug: qobo dae mae qhug' phau: zo" ra". Aimung: makhyang: mashab yaug wa din:man: yaug: nho: aphug' jhaung qhu" re kham zo" ra". Aiwa akeim mau" ngad: ein: ngo ta" ra".

¹⁵Airumung: byu dayaug wa yao: yao" gaung re pyo: sho' na ca" ra" ein: ngo myid: lam: ra". Pe"mung:ga"re- ce: kao so' gyaung: khyo mae- yao qo" yu: ra" pyo: ja: ein nae" ru wa- zo: shaug' mung: yao yao" gaung re pyo: pyo: na: ru za: ngad: ruyang ngad: ra". Yao: re Mao"So yang ce: mug: myid dao mae byid' to" ra" kao so' gyaung: khyo gu: mae mau" khao" myaung" na: au: re nhang" thao" ceru qo" kad' nae" ngad: ra".

¹⁶Ngo wa pha,jhi" bo nae" qhid' mae" we' ce: mug: myid dao mae pe" boe" na: rure mho" zhao: ba: yu nae" qhid' mae" qam: phin: khao: ngo"- byu wa myi" re: na" re: mayab macam: gyang: mung:- Mao"So kad' na: rure khonhae" re: maqo" ba: gyo: nae" ein: rure ngo beim: va". Byu wa khoqhi" qam: phin: qere:- qhug' qho: myao nae" mangad:- pha,jhi" ba mo, wa yao: bam ba: ga: ta" hau: qere:- yao: bam maba ngad: ako".