Read Maru SHOLAMON NGHAUI" CAUNG: 1 Bible Online

SHOLAMON NGHAUI" CAUNG: 1 - Maru bible

SHOLAMON NGHAUI" CAUNG: 1

¹Sholamon yang tung" ra" yaung" shab: thao" nghaui" caung: jham-

²Ni" nhad' qid: yang ngore bobaug baug: ra". Ni" jhid'de; myid wa sabyi qang: tho' je: gai: ra".

³Ni" gaung wa sheim nae pyo" ra" Ni" mang thoe wa aire myid: beim: nhao: ra". Myiqe: khoyaug re: nao re majhid'de, lo: maqo" na-

⁴Ngo re nao we' daga" jhui: la,- nga" shid' tao va: khyo phao lang:- nga" kho:kham boe" mung: ngore ni" qe, khyo jhui" lo" la,. Nga" shid' zo: daga" za: pyo" na lang:- myo: sho' shaug' mung: jho" ngaui: na lang: nao re myiqe: alhab' mo, jhid'de; ru wa pe" mug' cang mabo lhe".

⁵Yerusalem mae" myiqe: qe we"- ngo wa sho: no, ngadqere: yaung" lhe" Keda mae" din"pyad' yo mae jo; ra" zaung jham we' dakhyo: no, ngadqere: Sholamon nho: kho:kham yham mae" qe,kyo pin: lung: we' dakhyo: yaung" ra".

⁶Nga" sho: re qu" mung: daqu" ngai: pye' ba zho yang: ngore sho: no, nhao: ra" mathao mae ngore daqu" qid: pye'. Nga" mao: bam wa ngore nhag' yo: mung: sabyi khyae mae mau" zaui: nhao: ako". Nga" gaung re gun caung nae" ayo, maqo"-

⁷Ngo re ta" kyo: la,- nga" jhid' we" ni" cad' yao kyaung" re khai: mae yezam: nae" i? Aijham re na" gaung ba laung: rumae" khai: mae jhui" thang nae" i? Gatau: cad' yao zam: mo; cad' yao kyaung" phaung agaung: mae pe"mung: nao re ngo cao" qho ca" nae" i?

⁸Ai: jo, qo re nao maba i? myiqe: qemae" yaung" thao" yaug we"- cad' yao kyaung" jham: thao cao" ye: wa, yao zaung" mo; nho: zaung nhae mae ni" nho: cad' be, jham: qhid' mae" mhin: gyo, jao: yeqho: yu wa,.

⁹Nao- nga" jhid' nao we" Phara-u nho: myao: lhin" jham mae" myao: lo: jham re lhau: zhung" ke' ra" myao: myhi" we' dakhyo: nao wa yauggai qere lhau: zhung" ke' ra".

¹⁰Ni" nho: xae jham wa ni" boqae dao mae gyai yaung" jo; ako". Aiwa ni" lang zang: cao" yang: phug' de; ra" laug ru: gyo" jo; ra".

¹¹Ngadqere: ngonhaung" wa ni" qhid' mae" ngaui: yang shaung: pye' ra" qhang qui: kad' byid: nae".

¹²Nga" nho: kho:kham wa yao" jaung: dao mae lang" jo; ra". Aimung: nga" nho: nae pyo: xau wa gyai nae pyo" jo; ra".

¹³Nga" zoqae: pho" wa nga" nug' cug am mae lang" jo; au:- Mura sheim nae pyo" ra".

¹⁴Nga" zoqae: pho" wa Engedi mae" sabyi khye jham mae bu" yaung" jo; ra" seyo: bin: bu" we' dau: ra".

¹⁵Nga" jhid'de; myhi" we" nao wa yaung" thao" va" lhe"- Ni" nho: myo,jid' jham wa jhid'de; myid: yang bao: jo; ra".

¹⁶Nga" nho: jhid'de; thao" yaug we"- nao wa yaung" thao" va" lhe"- Nao wa ngore qu" ngaui: ra". Mhin: nyhug wa nga" shid' tao: nho: yab jaung: boe" li" nae".

¹⁷Arid shaug' jham wa nga" shid' tao: nho: yham mae" sag' qhang boe" li" nae"- qhoje; sag' gae jham wa khaung kyo ngad nae".