Read Maru SHOLAMON NGHAUI" CAUNG: 2 Bible Online

SHOLAMON NGHAUI" CAUNG: 2 - Maru bible

SHOLAMON NGHAUI" CAUNG: 2

¹Ngo wa Sharon mae yaug ra" seyo: bin:- bam gyo: mae yaug: ra" nghin bin: ngad:.

²Zau: kyin yo mae" nghin bin: we' dakhyo: nga" jhid'de; myhi" wa myiqe: qe: phaung mae" ngad:-

³Seyo: sag' mo" yo agaung: mae" bin: cug shigae we' dakhyo:- nga" jhid'de; thao" yaug wa yauggai gaje qe tho' baug thug' jo; ra". Ngo wa ai: aqab khug mae zaung nug: ra". Yao" ashi: wa nga" qhid' mae" cug: ra".

⁴Yao: wa ngore yao" zo: shaug' qe, khyo jhui" lo" mung: nga" dao mae jhid'de; ra" khyi to' byid' ra".

⁵Nga" nho: qam: re sabyi shi: kyaug' yang dam: pyang" byid: la,- Bin: cug shi: jham: yang qam: dam: pin" byid: la,. Ngo wa gaungsho: jhid' myid qam: nang" ra".

⁶Yao" nho: lo, kaung: lo, wa nga" au: gyid' mae jo; ra". Aimung: yao" lo, yo lo; yang ngore po: ci: ra".

⁷Yerusalem mae" myiqe: qe we"- ngore dao:so: byid: gela, tao: qao: ra" shocid we' yo: re mang lao: yang: nga" shid' zo: jhid'de; na: rure malhau: phyo' nae" ein: jham tang: ge,.

⁸Ngo wa nga" zoqae: pho" nho: thoe re the' gyo" ra". Yao: wa bam jham mae tao" lai mung: li" ra". Bug gaung jham mae tao" phyid' mung: ngo jhao" li" ra".

⁹Nga" zoqae: pho" wa xe' we' dau: ra". Xe' nau" ru"ru ngad: ra". Yao: wa vang yae mae ye; jo; ra". Yao: wa bao: zo: kham: khug khyo" qu" ke' ra". Aimung: kham: pyid' khyo" qu" ra".

¹⁰Nga" zoqae: pho" wa ngore jhau: ra". Li" lo ri:- nga" zoqae: myhi" we"- nga" zoqae: myhi" we"- ngo we' daga" cao la,.

¹¹Gyo, yo thao" va"- mug: qu nghin va".

¹²Seyo: vogaung: mae bin: jham bu" yaung" jo; va". Ce: yo, wa nghaui"caung: yo, ngad:- jao: gyu" khaung: mae phaung" kyug' myang thoe the' gyo: va".

¹³Pho' ham" shi: jham mhang" li" va". sabyi naui bu" jo, mung: la wa sheim nae pyo" jo; ra". Aimung: li" lo ri:- nga" jhid'de; myhi" we"- nga" zoqae: myhi" we"- ngo we' daga" cao" li" wa,.

¹⁴Nao wa laug bam jhe' gyo: mae vho' laung" jo; ra" phaung" kyug' we' dau: ra". Ni" nho: jhid'de; taung" ra" myo,khung: re ngo qu" shili"- aimung: ni" nho: gyo: nug taung" ra" thoe re ngo tae" gyo: shive.

¹⁵Ngonhaung" nho: sabyi yo re zag ne jham we' zag ne nau" jham: yang maqo" phyo' qheim" shire aijham re taung" pye' wa,.

¹⁶Nga" zoqae: pho" wa nga" mae" ngad: ra". Aimung: ngo wa yao" mae" ngad:- yao: wa yao" cad' yao jham re nghin bin: phyu yo mae-

¹⁷Ne,seim la cae: hug' sho' cad' no; ru baui" lo" sho'- mhin: lhae: zo: nhao: ra". Nga" jhid'de; zoqae: pho" we"- yo: we' dakhyo: dam: tug' lo ri:- Bethe bam jham mae" xe' we' dakhyo: phao: lo wa,.