Read Maru SHOLAMON NGHAUI" CAUNG: 3 Bible Online

SHOLAMON NGHAUI" CAUNG: 3 - Maru bible

SHOLAMON NGHAUI" CAUNG: 3

¹Nga" yab qo mae yab: myhid' jo, mung: damyi: mae" damyi ngo wa nga" jhid'de; yaug re yab mo, mo; ngo wa yao: re qho: na:- ngadqere: yao: re maqhug' myao-

²Ngo wa vomo" jao: sho' su" du" qin" mung: aimae" hau" mo" jham we' khyonhaung" jham mae joe" du" qin" va". Ngo wa ngo jhid'de; yaug re qho: lau:- ngo cao" qu" qere: yao: re maqhug' qho: myao-

³Vomo" lhaug' qu" qin" mo, wa ngore the' myao: ako". Ngo wa yao: bam re- nga" jhid'de; yaug re naonhaung" mathe' myao ko" i? ein: myid' va".

⁴Yao: bam mae" gao: we' yao: re ngo qhug' va". Ngo wa yao: re zaui" ci mung: manhao: ke' lo: nga" myhi" yham khyo jhui" lo" va". Ngo khau: li" ra" qe, khyo jhui" lo" va".

⁵Yerusalem mae" myiqe: qe we"- ngore dao:so: byid: gela, tao: qao: ra" shocid we' yo: re mang lao: yang: nga" shid' zo: jhid'de; na: rure malhau: phyo' nae" ein: jham tang: ge,.

⁶Din" pyad' yo mae myikhug' thaui: we' dakhyo: li" na: ru ceru wa pe" ngad: laug i? Sheim nae pyo: qang: we' mura sheim xan: aung: mo, aung" ra" nae pyo: xau ceru wa pe" ngad: laug i?

⁷Sholamon re yao" tao" mae zhaung mung: ceim" dao: li" ako". Israel mae gai: thao" ra" gyezo: qe kao lhaug' sulhe: khyaug' xe yaug vo; ako".

⁸Yao: bam alhab' wa shae ci kung: ako". Yao: bam wa gyekhe' zo" lo: ra" jhao mo, gyezo: xug' qe ngad: ako". Yao: bam mae" yaug khao: ngo" wa shae pyang: vin: ako". Myi" ayo, mae khe' zin" lo: rure gyevha nae" lhaug' zaung" byid' ako".

⁹Sholamon kho:kham re gai: thao" ra" sag' yang kad' ra" tao" mae vo; ako".

¹⁰Airu: nho: zang jham wa ngaui: yang thab' to" ru ngad: ra". Ai: dao mae wa qhang: yang thug' shaung: pye' ra" pin: cug' nghoe' to" ako". Ai: nho: zaung khau" nhae: jham re wa Yerusalem mae" myiqe: qe jhid'de; myid we' qo, to" ra" khalhae: nyhug pin" yang nghoe' to" ra".

¹¹Ziun mae" myiqe: qe we"- Sholamon kho:kham re li" qu" qu" shige,- yao: wa yao" lo,xo' ba na yao: ngaui bau: mung: ngaui lho" ra" ba na mae yao: myhi" yang yao" au: mae zhaung: byid' ra" ba maug: zhaung" ci: ra".