Read Maru SHOLAMON NGHAUI" CAUNG: 4 Bible Online

SHOLAMON NGHAUI" CAUNG: 4 - Maru bible

SHOLAMON NGHAUI" CAUNG: 4

¹Nga" jhid'de; myhi" we"- nao wa gyai yao: yaung" ava" lhe"- ni" nho: myo,jid' jham wa myo, go phacug' khug mae jhid'de; myid: yang bao: jo; ako". Ni" xae wa Gilead bug gaung jham mae" thug' jhu" gyo" lo: ra" cad' kyaung" we' dakhyo: go" na: ako".

²Ni" zaui jham wa- ana" za: shi" yao mug' qaug mung: gaung cid' to" ra" yao we' dakhyo: phyu: yaung" jo; ako". Aijham mae" dakhe' re: maba aigu: alhab' wa qo mabo losho' jho" dau: nyang: ako".

³Ni" nhad' qid jham wa ne ne mung: ra" zin yung taui: we' dau: ako". Nao jhau: ke' re aijham wa khoqhi" qu" yaung" ra" i? Ni" boqae jham wa myo,khung: go: ra" phacug' khug mae qhi qhi mung: yaung" ako".

⁴Ni" lang zang: wa Davi nho: gyebyu zaung we' dakhyo: lam: lam: jhad' jhad' mung: ra". Aiwa go dataung lhao" to" ruru: qui: ve; ci: ra".

⁵Ni" nug' cug am jham wa yo: jham we' dau: ra" nghin bin: yo mae mhin: zo" na: ra" shocid zozam tao we' dau: ako".

⁶Ngo wa mura bug gaung mae- nae pyo: bug gaung mae ne, seim la cae: hug' mung: mug: cad' no; ru baui" byaug sho' na nae".

⁷Nga" jhid'de; myhi" we"- nao wa yaung" thao" ava" lhe"- nao wa qo mabo losho' jab byang" ra".

⁸Nga" myhi" sag' we"- Lebanon mae" ngo we' daga" lo wa, Amana bam nyaug au: mae" gyo" lo ri: khang khyi jham we' nintin jham na: ra" Seni bam we' Hermon bam mae" gyo" lo ri:-

⁹Nga" zoqae: myhi" we' nga" myhi" sag' we"- ni" myo, jid' qu" yaung" ru we' nao ve; ci: ra" qui: qu" yaung" ruyang nga" nhag' lam: re khug' yu: pye" ava".

¹⁰Ni" nho: jhid'de; myid wa ngore ngaui bau: nhao: ra". Nga" jhid'de; zoqae: myhi" we' myhi" sag' we"- ni" nho: jhid'de; myid wa sabyi qang: tho' je: gai: ra". Ni" nho: nae pyo: xau wa xeim: ngaui" cid' alhab' tho' je: nae pyo" ra".

¹¹Nga" zoqae: myhi" we"- ni" nhad' qid jham mae byoyhid ru: cug: ra". Ni" nho: sho wa nga" qhid' mae" nug' we' byoyhid ngad: ra". Ni" mai bau: wa Lebanon mae" nae pyo: sheim alhab' de; ra".

¹²Zoqae: myhi"- nga" myhi" sag' wa zug' nyham" to" ra" bin: khyae ngad: ra". Khyae kyae" to" ra" bin: khyae- ngo yao: za: sang: ra" qid baug: ngad: ra".

¹³Aimae qhovo: gae jham yaug: gai: jo; ako". Aijham wa khaung: shi:- shi: khyae we' dakhyo: yaug: jo, mung: gai: thao" ra" ashi: zaui: byid' ako". Airu mae hena we' nard sag' xau gae jham mamyaung ngad: ra".

¹⁴Safron- Kalamu we' sag' xau mangad: lao" nae pyo: nam ja: khao: ngo" mamyaung ngad: ra". Mura we' Alo gae jham re: aimae yaug: ako". Aijham wa nae pyo" thao" ra" sheim bo: ako".

¹⁵Qid baug: qid thug' jham yug: na: ra" qid zo: gyaung: jham- Lebanon bam jham mae" yug: gyo" lo: ra" qid zo: gyaung: nau" jham wa- ai: qhovo: shi: khyae re qid sheim: byid' ako".

¹⁶Mug: am: mae" la we"- so" to" li" wa, mug: thao mae" la we" nga" bin: khyae dao mae lo byid: la,- la mae nae pyo: sheim byang" jo; nhao wa,- Nga" jhid'de; pho" wa nga" khyae khyo li" mung: aimae" gai: thao" ra" shi: jham re zo: vashao:-