Read Maru SHOLAMON NGHAUI" CAUNG: 6 Bible Online

SHOLAMON NGHAUI" CAUNG: 6 - Maru bible

SHOLAMON NGHAUI" CAUNG: 6

¹Myiqe: qemae" yaung" thao" yaug we"- ni" zoqae: pho" wa khai: lo" byaug va" i? Ni" jhid'de; pho" khoshad' khyo lo" ru ngonhaung" re ta" kyo: la,. Airulao" ngonhaung" yang qo" bao" qho nae".

²Nga" jhid'de; pho" wa Balsam gae yaug: ra" yao" khyae khyo ye" lo" byaug va". Yao: wa yao" khyae mae yao: yao" yao jham re zaung" mung: nghin bin: phyu khyug' zhang: na: ra".

³Nga" zoqae: pho" wa nga" nho: ngad: ra". Ngo wa yao" nho: ngad:- yao: wa bin: phyu yo agaung: mae yao" yao jham re lhae: zo: nhao: to" ra".

⁴Nga" jhid' we"- nao wa Yerusalem vogaung: mo" we' dakhyo: yaung" mung: Tiza vomo" qhi" qu" ngaui taung" ngad: ra". Ce: qhang vogaung: jham qhi" qu" mug' taung" ngad: ra".

⁵Ni" myo, jid' jham re ngo mae" va: khyo lhang: pye' wa,. Aijham wa ngore aung: pye' ako". Ni" nho: xae wa Gilead bug gaung jham mae" thug' jhu" gyo" lo: ra" cad' kyaung" we' dakhyo: lhu lhu mung: go" nhan" ako".

⁶Ni" nho: zaui jham wa ana" shi" gaung cid' to" ra" yao kyaung" we' dakhyo: phyu: ako". Aijham mae" dakhe' re: maba aigu: alhab' wa qo mabo losho' jho" dau: nyang: ako".

⁷Ni" nho: boqae wa myo,khung: nghoe' ra" phacug' khug mae qhui qhui mung: bao: jo; ako".

⁸Kho:kham pho" wa kho:kham myhi" khyaug' xe qo" vashao: myingai she' xe qo" vashao:- zomyi: nau" matho' nghe' losho' qo" vashao:-

⁹Ngadqere: ngo wa dayaug re za: ajhid'de;- Aimung: yao: wa phaung" kyug' qhi" jhid'de; taung" ngad: ra". Yao: wa yao: myhi" nho: zote: myiqe: zo: ngad: ra". Yao: myhi" nho: jhid'de; thao" ra" zoshao ngad: ra". Myiqe: alhab' mo, wa yao: re qu" mung: khin" ako". Kho:kham myhi" qe we' kho:kham myingai qe wa yao: re nghaui"caung: ako".

¹⁰Ne,seim mug: bo" zo" mae" bag bao ru: zhaug' qu" ru khag' ngad: i? Yao: wa yaung" mung: bao: qhui: ra"- yao: wa ba we' lho" qhi" bao qhui: ra".

¹¹Ngo wa lao:khaung: mae" sag' zo: jham re qu" nae" qhid' mae" we' sabyi naui jham mae" avho' nau" jham we' khaung: shi: gae jham mae" abu" re qu" nae" qhid' mae" shiham: gae jham: agaung: khyo joe" gyo" li" va".

¹²Ngo wa ko, ko, nin" na: gye myao: lhin" keim: yaug wa gyekhe' nae" qhid' mae" kao bau: ra" qhi" nao wa ngore jhid'de; nae" qhid' mae" kao bau nhao: ra".

¹³Shulam mae" myiqe: zo: we"- go" wa,- go" wa,- nao go" na: rure ngonhaung" re ceim" qu" nhao la, naonhaung" wa pe"mung: yang: byu jham jin: qu" na ko" ra" phaung gaung: mae ngo go" nhan" rure lhaug' qu" nug ko" i?