Read Maru ESAIA 1 Bible Online

ESAIA 1 - Maru bible

ESAIA 1

¹Ce: mugsug' paug' mae Yuda kho:kham qe ngad ko" ra" Uzia- Yotham- Ahaza- Hezekia bam eib: ra" ayo, gyo: mae Amod nho: yauggai zo: Esaia re Mao"So: yang qhu" byid' ra" Yuda mung" we' Yerusalem vogaung: khyo re ta" ra" mungdao: jham bobo: ra".

²ASANG wa mug:gaung we' myid gaung we"- ngo ta" na: rure tae" gyo: ge,- ngoyang khau: qhi" ke' ra" zoshao qe wa ngore geim lau to" ako".

³Nung: jham wa yao: bam re khag' yang sang: rure ba mung: loze jham wa yao: bam: ASANG yao: bam re khai: mae zho" rure ba: ako". Aiwa nga" byumyu" Israel qe ba: ru tho' je: ra". Yao: bam dajhid' re: maba: gyo: ngad: ako".

⁴Qobo kad' ra" byumyu" nao ave, qeim: ru we' makhyang" ra" byumyu" nao we"- nao wa jeim" byaug: ava". Ni" qobo jham wa nao re she: khyad' khyo" pye' ava". Naonhaung" wa Israel nho: gyang" lho" ra" Mao"So ASANG re ngag: lhaui" pye' mung: naonhaung" wa yao: re nhaung thao" phaug' pye' avako".

⁵Pe"mung: naonhaung" mathang lo: geim lau to" na ko" i? Qobo dae je: myo: sho' byid: nae" rure naonhaung" o ko" i? Israel we"- ni" au: wa dae khu za: byang" sho' ngad: jo; ava". Ni" aung khug nhag' lam: we' myid wa no: na: ava".

⁶Au: mae" khyid joe" sho' gai: ru datau re: majo, lo:ngad: ra". Naonhaung" gaung wa thaung" khyad' cad' ra" dae- dae jad: dae khu jham byang" sho' ngad: ava". Naonhaung" nho: dae khu jham wa macid' san: pye'- mathab' pye' qu" ngad: ra". Aijham re xau magyad: qu" ngad: ako".

⁷Naonhaung" mung"dan: wa cae: jhug tag ngad: byaug mung: naonhaung" vogaung: jham wa myid gaung mae nga" gyoe; bam: jo; avako". Nao qu" na: au: yao: taung bug byu qe wa ni" mung"dan: re sang: yu: pye' mung: ja: khao: ngo" re phyo' qheim" pye' ako".

⁸Tug' lhe: nae" go majo; ra" sabyi khyae lhaug' yaug: zaung khyae: we' lakhu: khyae mae" zaung khyae: ru: vogaung: wa vang" to" ra" qao: mae Yerusalem za: dang: jo; ra".

⁹Qam: bo: ra" ASANG wa byu damyo" re mana: dang nhao re Yerusalem wa Sodom we' Gomora ru: bin sho' phyo' qheim" pye' ru qhug' nae" ngad: ra".

¹⁰Yerusalem we"- ni" zug: qe we' ni" mung" byu qe wa Sodom we' Gomora mae" mo, we' dau: ako". ASANG naonhaung" re ta" na: rure nyang" tae" gyo: ge,. Ngonhaung" Mao"So naonhaung" re pe" ja: mho" na: rure nyang" gyo" yu ge,.

¹¹Naonhaung" ngore abang mabyid ngaui" byid' na ko" ra" ngaui" xeim: aijham alhab' re ngo o: ra" ein: jho ko" i? Ngaui" xeim: jham khyo" phad' ngaui" byid' ra" yao jham we' naonhaung" yaung" ra" gug'nyhug' jham: nho: xau tho' ngo je: qo" ra". Ngo wa nung: jaung lo: jham- yao jham- cad' be, jham: sa: re nghang: va".

¹²Naonhaung" ngore caung:pa" nae" li" ko" au:- cejham alhab' re ngojhao" cili" nae" qhid' mae" naonhaung" re khag' mho' ra" i? Nga" Caung:pa" Yham mae cegu: re kad' yang: li" zab: nhe" pye' nae" khag' ta" ra" i?

¹³Naonhaung" nho: ngaui" xeim: jham aje amyid cili" ako". Naonhaung" phad' ngaui" ra" sheim nae pyo: xau sheim re ngo ca' ra". Ngo wa naonhaung" lho" xin: poe- Dugno: Ba we' naonhaung" caung:pa" thung" phaung re ngo- manug: bobo- aijham wa naonhaung" qobo jham: mathao mae alhab' qeim: byaug: ako".

¹⁴Naonhaung" nho: lho" xin: poe jham we' gyang" lho" ba na jham re ngo nghang" ra". Aijham ngo vin: la" na: ra" qola: jham ngad: ako".

¹⁵Naonhaung" lo, tau yang: akyu" mho' ko" au:- naonhaung" re ngo maqu" nae". Naonhaung" khonho" akyu" mho' mho' matae" gyo: byid: nae". Pe"mung:ga"re naonhaung" lo, wa sa: za: ngad: ako".

¹⁶Naonhaung" yao" gaung re san sho' kad' pye' ge,- naonhaung" kad' na: rure ngo myao: ra". Ce: makhyang" ra" mau" alhab' re thang: pye' ge,. Ngad va"- makhyang" ra" mau" re thang: pye' mung: jo: ru kad' nae" zhao: yu ge,.

¹⁷Tarha" din: nyang: rure cao" ge,- zag zo: qhug' mo, re bao" thaug' byid: ge,- cug' zo: qere yao: bam qo" yu ang: ra" akho: akhang" byid: ge,- cug' mo" qere gug: gam ge,- ga: ASANG ta" ra".

¹⁸ASANG wa ana"- ai: mau" re sho' pye' gelang: naonhaung" qobo wa sa: ru: ne: de; jo; ra". Ngadqere: ngo wa naonhaung" re gyu: ru: phyu sho' cid' pye' byid: nae". Naonhaung" byao byao ne sho' de; jo, ngadqere: yao mug' ru: naonhaung" phyu: li" genae".

¹⁹Naonhaung" ngore mho dao: gyo: ko" re wa myid gaung mae" thug' ra" qhovo: ashi: gai the' zo" li" genae".

²⁰Ngadqere: naonhaung" ngore masan masin" kad' pye' ko" re wa naonhaung" shid: dam: genae"- ASANG ngo ta" to: va"- ga: ta" ra".

²¹Ganhae" jhaug' zaug: lo: ra" vogaung: wa shava myhi" ru: kad' na: ra". Ganhae" dalhang ai: vogaung: wa din:man: mo, byang" sho' na: lo: ako". Ngadqere: ana" wa byu se' mo, za: na: dang: jo; ako".

²²Yerusalem we"- ganhae" nao wa ngaui we' dau: lo: ra". Ngadqere: ana" nao wa pe" phug' made, lo:ngad: ra". Nao wa sabyi qang: gai we' dau: lo: ra". Ngadqere: ana" nao wa qid cin za: angad lo" ra".

²³Ni" au: jhaung qe wa tau: lhan: mo, we' khug' hab' qe: ba nam qe za: ngad: ako". Yao: bam wa khonhae" re: jhaung qhu" jham we' khug vag: jham re khae: yu mo, ngad: ako". Yao: bam wa cug' zo: qere tarha" yung" mae khonhae" re: mabo ta" qid' byid:- cug' mo" qe: mung mau" re khonhae" re: matae" gyo: byid: mo, ngad: ako".

²⁴Airumung: ana"- Israel nho: kheim: so' bo: ra" Mao"So- qam bo: ra" ASANG ta" na: rure tae" gyo: wa,- ASANG wa gyevo nao re ngo lage, phaug' nae". Ailao" nao wa ngore aqug: akhai: maboe" nhao lo nae".

²⁵Nao re ngo qobo zaug' nae". Ngo wa to' re kyang" ru we' dakhyo: nao re kyang" mung: ni" nho: magyang" rure khyad' pye' byid: nae".

²⁶Ganhae" nao lhaung" qo" qu" ra" mo, ru" ra" zug: qe we' pha,jhi" byid: mo, re nao re ngo byid: nae". Ailao" Yerusalem wa- din:man: jhaug' zaug: ra" vogaung: ga: mhang" ru qhug' nae"- ga: ta" ra".

²⁷ASANG wa din:man: yaug ngad: ruyang yao: wa Yerusalem re we' aimae na: ra" myid tha" mo, yaug khao: ngo" re khyad' yu: li" nae".

²⁸Ngadqere: qobo kad' mo, we' yao: re tau: lhan: mo, yaug khao: ngo" re wa khyoe' pye' li" nae". Yao: re shapye' mo, yaug khao: ngo" re yao: se' pye' li" nae".

²⁹Sag' gae jham we' qho" to" ra" gyang" lho" khyae jham re nao caung:pa" lo: rure nao nhag' kaug' li" nae".

³⁰Nao wa shid: lo" na: ra" shikhai: gae we' khag' yang qid masheim" ra" bin: khyae we' dakhyo: jhoe' nyhaung: lo" li" nae".

³¹Myijhang" yang zin: nga" lo" ra" khovho we' dakhyo: za:- kheim: so' qo" ra" mo, wa yao: bam yao" makhyang" ra" lo,mau" yang yao: phyo' qheim" pye' qhug' li" genae". Ai: byo; qeim: rure khag' re: maqo" tam" pye' genae".