Read Maru ESAIA 10 Bible Online

ESAIA 10 - Maru bible

ESAIA 10

¹Naonhaung" jeim" avako"- nga" byumyu" re zag zo" ra" matarha" ra" tarha" jham re naonhaung" kad' ako".

²Myaung sho: mo, yao: bam qo" yu ang: ra" akho: akhang" re maqo" yu sho' tam" pye' mung: tarha" din: nyang: ru maqo" yu gesho' ceru: naonhaung" tam" pye' ako". Cug' mo" qe we' cug' zo: qe sang: ra" jo,nho" re airu: naonhaung" yu: pye' byid' ako".

³ASANG naonhaung" re qobo dae byid: lao"- naonhaung" pe" ru: kad' genae" i? va" ra" mung" mae" kyi" khyag' ru naonhaung" dao mae yao: cilo byid: lao"- naonhaung" pe" ru: kad' genae" i? Bao" thaug' khyo re khai: mae" naonhaung" yemho' yu genae" i? Naonhaung" jo,nho" jham re khai mae yenyham: genae" i?

⁴Naonhaung" wa gyekhe' poe mae se' pye' qhug' li" genae". Mangad: lao" kyam: byu qere ru: she: khyad' lo" ru qhug' li" genae". Airu: sho' ngadqere: ASANG: nhag' jam: yo" ru wa mathao" nae". Yao" lo, wa qobo dae byid: nae" yheim" to: shinae".

⁵ASANG wa Asuri we"- ngo nhag' jam: yo" ra" mo, re qobo dae byid: be, nae" thaung kang khyo" ngo Asuri re ci: lhe"-

⁶Ngo wa Asuri re ngore nhag' yo: nhao ko" byumyu" ngad ko" ra" Mao"So mabo: ra" byumyu" re gyekhe' zin: nae" ngo nhao: ke' ra". Lanyab lhad' nae"- khug' nae". Amyu" byu qere hau" mo" khyo mae jo; ra" phalhug re we' dakhyo: zab: nhae" pye' nae" qhid' mae" yao: bam re ngo nhao: ke' ra" lhe".

⁷Ngadqere: Asuri kho:sin" wa yao: yao" myid mae aqan alan mau" jham yaung: ci: ra". Yao: wa byumyu" mung"dan: myo: sho' re phyo' qheim" pye' nae" myid: phyid' ci: ra".

⁸Yao: wa nga" gyezug: mo" yaug khao: ngo" wa kho:kham ngad: ga: phug: ra".

⁹Ngo wa Khalno we' Khakhemi vogaung: jham Hamad we' Arpad vogaung: jham re ngo aung: pye' va". Ngo wa Samari we' Damasku re aung: pye' va".

¹⁰Yerusalem we' Samari mae jo; ra" so alho jham tho' je: myo" jo, mung: so alho jham re caung:pa" ko" ra" mung"dan: jham re qobo dae byid: nae" nga" lo, yheim" ke' ra".

¹¹Ngo wa Samari re phyo' pye' mung: yao" so alho jham alhab' re phyo' qheim" pye' va". Ngo wa Yerusalem re we' aimae caung:pa" ko" ra" khyao dau sulho jham re ai we' dakhyo: za: kad' nae"- ga: ta" ra".

¹²Ngadqere: ASANG wa- Ziun dao mae we' Yerusalem mae ngo kad' rure bin: kad' lao"- Asuri kho:sin" re yao: phug: ra" khyo alhab' we' yao" ngad beim" ru alhab' qhid' mae" ngo qobo dae byid: nae".

¹³Asuri kho:sin" wa- aigu: alhab' re ngoyao: kad' va"- ngo wa qam: bo mung: pha,jhi" bo: kung yaug ngad: ga: phug: ra". Byumyu" mung"dan: jham: agyo: mae kad' to" ra" mug: kyo: jham re sham" pye' mung: yao: bam qaung" to" ra" zokho jham re yu: pye' byid: va". Ai: mae na mo, re nung: jaung lo: we' dakhyo: ngo zab: nhae" pye' va".

¹⁴Mug: myid dao mae" byumyu" mung"dan: jham wa ngho' sad' we' dakhyo: ngad mung: ngho' au" jham re sham" yu: ra" nho" laui sho' yao: bam: jo,nho" re ngo qo" sham" yu va". Ngo re kyaug' nae" daung dalhang ma phab' qhu" ngore myang nae" pe" nhad' maphung"- ga: ta" ra".

¹⁵Ngadqere: ASANG wa Vozaung: wa yao: re ci: ra" yaug tho' qam: je: bo: ein: qo" ta" i? Sag' qhag' wa yao: re ci yang: qhag' yaug tho' re je: akhyag: i? thaung kang wa byu re matau- byu wa thaung kang re tau yaug ngad: ra".

¹⁶Ana" xau lam: lateim" ngad mo, re qobo dae byid: nae" qhid' mae" qam: bo: ra" ASANG wa qam" no re nhao: ke' nae" ngad: ra". Yao: bam: gaung mae nga" laung: ra" myi: de; li" nae".

¹⁷Israel nho: bo" bao Mao"So: myi: boe" li" nae". Israel nho: gyang" lho" ra" Mao"So wa daba mae za: ja: khao: ngo" re nga" pye' ra" myishae boe" li" nae". Zau: kyin we' zau: gae jham re lhao" re: nga" pye' li" nae".

¹⁸Shid ja: no phyo" yang byu re se' tam" pye' ruru: thau: ra" sag' mo" yo we' yo jham wa bin sho' nga" pye' ru qhug' nae".

¹⁹Zoshao: yang lhao" re: qo" nghe' ra" sag' gae dajhid' za: yaug: dang: jo; li" nae".

²⁰Na: dang: ra" Israel byu qe wa alaug se' tam" pye' ra" byumyu" re makhug: ngha: na lo nae" ra" ayo, joe" lo: li" nae". Ailao" yao: bam wa Israel nho: gyang" lho" ra" Mao"So ASANG re dang za: khug ngha: li" genae".

²¹Israel byu qe dajhid' za: yao: bam: qam: bo: ra" Mao"So jhao" dam: tug' lo: li" genae".

²²Ana" Israel byu qe wa panglai: qid yae mae" ma coe nho" myo: gesho' ngadqere: dajhid' za: dam: tug' lo: li" genae". Phyo' pye' ru wa amyu" byu qe: qhid' mae" zam" to: mung: ai wa bin sho' man: qi" ra".

²³Ngad va"- yao: kad' nae" ga: ta" to" ru we' dakhyo:- qam: so' bo: ra" ASANG kho:kham wa mung"dan: geim" jao: sho' mae phyo' pye' ru joe" li" nhao nae".

²⁴Qam: bo: ra" ASANG kho:kham wa Ziun mae na ko" ra" yao" byumyu" qere- Egutu byu qe lhaung" kad' ko" ru we' dakhyo: yao: bam naonhaung" re zag zo: gesho' ngadqere: Asuri re dagyaug ge,.

²⁵Dayo, gyo: za: mae nao re qobo dae byid' rure ngo pin" pye' nae". Ai: thao re yao: bam re ngo phyo' qheim" pye' nae".

²⁶Qam: bo: ra" ASANG ngo wa Oreb laug byo, mae Midian byu qere be; ru we' dakhyo:- nga" vose" yang yao: bam re be, nae". Egutu byu qere ngo qobo dae byid' ru we' dakhyo: Asuri re ngo qobo dae byid: nae".

²⁷Ai: ayo, joe" lo lao"- ngo wa naonhaung" re Asuri nho: qam: so' lo, mae" loe; beim: nhao mung:- yao: bam: kyau: wa naonhaung" lo,sin mae qobo maboe" lo nae".

²⁸Gyevo gyetab wa Ai: vogaung: re khe' aung: yu: ako". Yao: bam wa Migron khyo" lai: phyid' ye" ako". Yao: bam: zokho re Mikhma mae to: co' ako".

²⁹Yao: bam wa ku" lhao" re lai: phyid' ye: mung: myi" re Geba mae yethang: na: ako". Rama vogaung: mae na ko" ra" byu qe wa gyaug: pye' ako". Kho:kham Sholu nho: vogaung: Gibea vobyu qe wa tao" phao: lo" ako".

³⁰Galim byu qe we"- zag: hug' ge,- Laisha byu qe we"- tae" gyo: ge,- Anathod byu qe we" dao: phyid byid: ge,.

³¹Madmena byu qe we' Gebim byu qe wa yao: bam: kao loe, sho' tao" phao ge,.

³²Ana" ba gyevo qe wa Noba vogaung: mae na mung: Yerusalem vogaung: Ziun bam mae yao: bam: lo, zhab' lhaui" qhu" na: ako".

³³Qam: bo: ra" ASANG wa sag' gae mae" thau: khyo" pye' ra" sag' kaung jham we' dakhyo: yao: bam re gyoe; gyo" nhao nae". Yao: bam mae" ngad beim" thao" mo, we' myhao: thao" ra" mo, re thau: khyo" pye' mung: nga: phoe nhao nae".

³⁴Lebanon mae" gai: thao" ra" sag' gae jham re thau: khyang: pye' ru we' dakhyo:- sag' mo" yo agaung: mae" sag' gae jham re vozaung" yang thau: khyang: pye' ru we' dakhyo: ASANG wa yao: bam re thau: khyo" pye' li" nae".