Read Maru ESAIA 11 Bible Online

ESAIA 11 - Maru bible

ESAIA 11

¹Davi nho: kho:kham kaung wa thau: khyang: pye' va" sag' gae ru" ru ngad: ra". Ngadqere: sag' ngad mae" sag' bau: tad' li" ru we' dakhyo: Davi nho: myid:zo: qemae" kho:kham asag' dayaug thug' li" nae".

²ASANG: byo wa yao" byumyu" re eib nae" qhid' mae" pha,jhi" laba lajhao- ba jhao: ru yao: re byid' li" nae". Yao: wa ASANG re ba mung: yao: re phug' myao: byid' li" nae".

³Yao: wa ASANG: dao: re phug' cao" rumae ngaui bau: khyo qho: li" nae". Yao: wa myo,nho re qu" yang:- mageim: ta" hau" ra" dao: re gyo: yang: dao: makho' nae".

⁴Yao: wa myaung sho: mo, re nyang nyang za: dao: kho' mung: masho: majhin ngad mo, re akho: akhang" gug: gam byid' li" nae". Yao: amyin" dao: mae mung" byu qe qobo dae byid' ru qhug' mung: makhyang" ra" mo, shid: li" genae".

⁵Yao: wa yao" byumyu" re din: nyang: ru we' jhaug' zaug: ruyang eib: li" nae".

⁶Zag ne jham we' yao jham ngaui pyo: yaug yo za: daga" na: jo; li" genae". Nin tin wa cad' be, nau" jham we' daga" ab' jo; li" nae". Nung: jaung nau" jham we' khang khyi nau" jham nug' daga" shaug' li" genae". Zoshao nau" wa aijham re jhui" li" nae".

⁷Nung: jaung myhi" jham we' vae jham wa daga" zo" li" genae". Yao: bam: nung: jaung nau" jham we' vae nau" jham wa ngaui pyo: yaug yo za: ab' jo; li" genae". Khang khyi jham wa nung: ru: khovho zo" li" genae".

⁸Zoshao wa daug thin: ra" lhao maui nhae mae zojhi jhi sho' ngadqere: pe" dae made; nae".

⁹Mao"So: gyang" lho" bug gaung Ziun mae qug: khai: boe" nhao: ru we' makhyang" ru pe" majo, nae". Myid gaung wa panglai: mae qid byang" jo; ru we' dakhyo: ASANG: laba lajhao ai: mung"dan: mae byang" jo, nae".

¹⁰Davi kho:kham kaung mae" kho:kham asag' wa byumyu" qenho: aso: boe" nae" ayo, joe" li" na: ra". Yao: bam wa yao" kho:kham vomo" mae zang" ham mung: yao: re nga: yhe' byid' li" genae".

¹¹Ai: ba na joe" lo lao"- ASANG wa yao" qam: so' re dalhang dam: ci mung: Asuri- Egutu- Pathro mung" jham- Sudan- Elam- Babelon- Hamad qid yae cao" mae" mung"dan: jham- panglai: gagyo: kao" mug: jham mae na: dang: jo, ko" ra" yao" byumyu" qere yham khyo dam: jhui" tug' yu: li" nae".

¹²ASANG wa na: byo: sin" jo, ko" ra" Israel we' Yuda amyu" byu qere dalhang dam: zhang" yu: na: ra" khyo re amyu" mung"dan: jham re qhu" byid: nae" qhid' mae" ave, aso: khyi re tau: to' li" nae". Amung: mug: myid byid khyug mae" yao: bam re dam: jhui" tug' yu: li" nae".

¹³Israel mung"dan: wa Yuda re myid nug: ra" myid mabo lo nae". Amung: Yuda wa Israel nho: gye vha mangad: lo nae".

¹⁴Yao: bam daga" za: ba vao shad' mae" Philisti byu qere gye zin: mung: ba thug' shad' mae na ko" ra" mo, re phyo' zo" li" genae". Yao: bam wa Edom- Moba byu qere aung: pye' mung: Amon byu qe wa yao: bam: mho dao: re tae" gyo: byid' li" genae".

¹⁵ASANG wa Sue qid dug: re kin" ho: lo" nhao mung: Uphrad gyaung: re kin" ho: lo" nhao nae" la laung re nhao: ke' byid' ra". Airulao" khag' re: aire qo" su" phyid' ye: nae" qhid' mae" qid gyaung: zo: nhad' gyaung: re za: tang" to: co' ko" ra".

¹⁶Yao: bam: phug' pho" qe Egutu mae" thug' lo" ko" au: we' dakhyo: Asuri mae na: dang: jo, shiko" ra" yao" byumyu" Israel qe: qhid' mae" Asuri mung" mae" thug' lo" ra" hau" mo" khyo jo; li" nae".