Read Maru ESAIA 13 Bible Online

ESAIA 13 - Maru bible

ESAIA 13

¹Ce wa Amod nho: yauggai zo: Esaia Mao"So mae" khae: yu: ra" Babelon we' sin" ra" mungdao: ngad: ra".

²Pyad' lad sade" ra" bug gaung au: mae gyekhe' poe khyi re tau: to' to: ge,. Ngad beim" ra" vogaung: kham: mo" jham re khe' zin: nae" yao: bam re ave, byid' ra" khyo" gyezo: qere zag: hug' mung: naonhaung" lo, re tau: to' ge,.

³Gyang" lho" gye poe re khe' zin: nae" we' yao: nhag' yo" ra" mo, re qobo dae byid: nae" qhid' mae" yao: ngad beim: mung: lam ga" ra" gyezo: qere ASANG khai: ke' ava".

⁴Mo, byu qi: sho' mo; thoe- byumyu" we' mung"dan: jham myo: sho' zang" ham: li" ra" thoe ngad: ra" bam jham mae" thoe re tae" gyo: ge,- ASANG: gyetab jham wa gyekhe' poe qhid' mae" yao" gyephung: re seim" na: ra".

⁵Yao: bam wa myid gaung athao" mae jo; ra" mung"dan: jham mae" joe" li" na: ako". Yao" nhag' jam: yo" ru we' mung"dan: geim" re pha,jhi" kad' pye' nae" qhid' mae" ASANG joe" li" na: ra".

⁶No yang: gyi: ngug ge,- qam: bo yaug: yang phyo' qheim" pye' ru boe" nhao nae" ba na ngad: ra" ASANG: ba na jhao" li" na: ava".

⁷Byu yaug khao: ngo" nho: lo, wa shid: lhao" byaug mung: yaug khao: ngo" nho: sulhe: myid wa baui" byaug nae".

⁸Yao: bam alhab' gyaug: byaug mung: zo:khau no no: ra" myiqe: we' dakhyo: no: ru kham zo" li" genae". Yao: bam yao: cao: gyaug mung: jho" qu" li" genae". Yao: bam: myo, khung: wa qho' yang: na: jo; li" nae".

⁹Yao" nho: nhag' jam: kyid kyid yo" ra" se' da: be, khyad' ba na ngad: ra" ASANG: ba na wa joe" li" na: ra". Myid gaung wa din"pyad' yo boe" lo" byaug mung: qobo jab yaug khao: ngo" wa se' tam" pye' ru qhug' li" nae".

¹⁰Kyi ce' khao: ngo"- kyi zhan khao: ngo"- bao: ru thang: pye' li" genae". Ba thug' li" lao" sham: no; byaug: li" nae". Lho" re: mazho lo nae".

¹¹ASANG wa myid gaung dao mae kyi" khyag' ru boe" li" nhao mung: makhyang" ra" byu alhab' re yao: bam: qobo qhid' mae" qobo dae byid: nae". Ngad beim: mo, yaug khao: ngo" re ngo deim" nyham: khyo" pye' mung: phug mo, we' se' da: be, khyad' kad' mo, yaug khao: ngo" re qobo dae byid: nae".

¹²Na: dang: ra" mo, wa qhang tho' je: majo, nang" lo" li" genae".

¹³Qam: bo: ra" ASANG ngo nga" nhag' yo" rure qhu" byid' ra" ba na mae myid gaung wa yao" jo, qo mae" laui" nin" thug' lo" mung: mug: khaung re ngo ko, ko, nin" nhao nae".

¹⁴Babelon mae na: jo, ko" ra" taung bug byu qe wa sho: kung" mo; lo, mae phao: sin" lhau: ra" shocid jham we' dakhyo:- yao zam: yaug mabo: ra" yao jham we' dakhyo:- yao: bam: mung"dan: khyo tao" phao: lo" li" genae".

¹⁵The' taung" yu qhug' ra" yaug khao: ngo" wa shae ceim" yang thug' se' pye' ru qhug' li" genae".

¹⁶Yao: bam masho: majhin qu" na: au:- yao: bam: zoshao nug' nau" qere be; mhan" se' pye' ru qhug' li" genae". Yao: bam: yham jham phyo' zo" pye' ru qhug' mung: yao: bam: yham sang myhi" qe wa deim" zag: yab: pye' ru qhug' li" genae"- ga: ta" ra".

¹⁷ASANG wa- Babelon re gyekhe' nae" qhid' mae" Mede re lhau: zhung" ke' ra". Yao: bam wa ngaui re pe" masun:- qhang: yang yao: bam re maqo" jham" qu" ngad: ra".

¹⁸Yao: bam: lo,la: jham we' myo: jham: yang zolau: qere se' pye' li" genae". Yao: bam wa zonau" qere nhag' khyag' myid mabo genae". Zoshao qere nhag' makhyag' genae".

¹⁹Babelon wa mung"dan: alhab' tho' mae yaung" thao" ra" mung"dan: ngad: ra". Aiwa yao" mung" byu qenho: langa: ngad: ra". Ngadqere: Sodom we' Gomora re ngo kad' lo: ru we' dakhyo: ASANG ngo wa Babelon re phyo' sin" pye' li" nae".

²⁰Ai mae khag' re: madam: na lo: genae". Du" lae" qin" ra" Arab khoyaug re: aimae yao" zaung re makad' nae". Yao zam: mo, khag' dayaug re: aimae yao" yao jham re mazam: genae".

²¹Ai: jo, qo wa din"pyad' yo mae na: ra" gug'nyhug' jham: na jo, qo boe" mung: khaung: bab: jham wa aimae yao: bam: asad' sad' li" genae". Gala-u ngho' jham wa ai: mae na: li" genae". Cad' be, lae" jham wa byo; qeim: jo; ra" khyo" thug' jhu" lai: lo" li" genae".

²²Gyebyu zaung jham we' kho:kham kho" jham wa zag ne we' nin tin jham: myang thoe lao thao wa shau ga: mung: jo; li" nae". Babelon nho: ayo, wa joe" ava". Yao" ba na jham wa gan: lo" ava"- ga: ta" ra".