Read Maru ESAIA 14 Bible Online

ESAIA 14 - Maru bible

ESAIA 14

¹ASANG wa yao" byumyu" Israel re dalhang dam: nhag' khyag' byid: mung: yao" byumyu" khyo" yao: bam re dam: khyin: yu: li" nae". Yao: bam yao" mung" mae yao: bam re dam: na nhao nae". Taung bug byu qe wa joe" li" mung: aimae yao: bam we' daga" li" na: li" genae".

²ASANG: yang yao: bam re byid' to" ra" tug' lo nae" qhid' mae" byumyu" myo: sho' mo, Israel byu qere bao" thaug' byid' li" genae". Aimae byumyu" qe wa jeim khyo" Israel re caung da" byid' li" genae". Ganhae" Israel byu qere taung" yu mo, wa ana" Israel byu qeyang taung" yu: ru qhug' li" genae". Ganhae" yao: bam re zag zo: mo, re Israel byu qeyang eib zo" li" genae".

³ASANG wa Israel byu qere yao: bam: no khai" nho: ru we' dayin dayo: kham zo" na: rumae" yo nhao mung: yao: bam re deim" zag: zaui: nhao: ra" mau" jam: mae" no: nhao nae".

⁴Yao: ceru: kad' lao" yao: bam wa Babelon kho:kham re jung" mung:- se' da: be, khyad' kad' ra" kho:kham wa gyoe; gyo" ava". Yao: wa khag' re khonhae" re: madam: zag zo: lo nae".

⁵ASANG wa mung" byu qere nhag' yo: nhag' gyid' zag zo: mung: yao: bam aung: pye' ra" byumyu" qere khonhae" re: yhin" ru mathang: pye' ko" ra" makhyang" ra" zug: kho:kham qe: kheim: so' re thao" lo" nhao: ra".

⁷Ana" lo" thao" mae mug: myid geim" wa dug no" ru we' ngaui pyo: yaug yo: rure qo" kham: yu: ako". Yaug khao: ngo" ngaui bau: yang: nghaui"caung: ako".

⁸Qhoje; gae jham we' Lebanon mae" shaug' gae jham wa gyoe; gyo" lo" byaug: ra" kho:kham dao mae bau" ako". Pe"mung:ga"re yao: bam re thau: khyang nae" byu mana lo:- ana" yao: wa mana lo:-

⁹Movo: mug: wa Babelon kho:kham re lham: tug: yu nae" seim" jin" to" ava". Myid gaung dao mae" qam: so' bo: ra" subyo jham wa lab: li" ako". Subyo kho:kham jham wa yao: bam: tao" khau" mae" to" li" na: ako".

¹⁰Aibam wa yao: re- ana" nao wa ngonhaung" ru: qam: nang: yaug ngad: ava". Nao wa ngonhaung" mae" dayaug ngad: ava".

¹¹Nao wa tang: nghaui" thoe jham: yang nga: lhaung" yhe' byid' ru qhug' lo: ra". Ngadqere: ana" nao wa ce: movo: mug: mae joe" jo; ava". Nao wa laug daung: yab jaung: dao mae lang" jo, mung: bothaung mai pho' yang nghoe' to: qhug' ava".

¹²O"- Bo" myhung- ne,seim mug: bo" nho: yao: zo: we" nao wa mug: khaung mae" gyo" lo" byaug vanhaung wo" lai: lo: ayo, mae nao wa byumyu" qere aung: lo: ra". Ngadqere: ana" nao wa myid gaung khyo pye' khyo" pye' ru qhug' ava".

¹³Nao wa mug: khaung khyo do, lo" nae" myid: phyid' mung: ni" tao" khau" re myhao: thao" ra" kyi atho' mae to: nae" myid: phyid' lo: ra". So jham phaung: na: ra" mug: am: shad' mae" bam dao mae kho:kham dayaug ru: nao qo" zaung nae" ga: nao jho: ra".

¹⁴Jham thaui: au: khyo do, lo" mung: qam: so' bo yaug ru: boe" nae"- ga: nao ta" ra".

¹⁵Ngadqere: ai: atha"- nao wa movo: mug: mae" no; thao" ra" dau khyo khyo" pye' ru qhug' ava".

¹⁶Sushid wa nao re zhaug' qu" mung: nao re nhad' lham: ho" li" nae". Yao: bam wa- myidgaung re laui" nin" nhao yaug we' mung"dan: jham re ko, ko, nin" nhao yaug wa ceyaug va" i?

¹⁷Vogaung: jham re phyo' pye' mung: mug: myid re cae: jhug tag kad' pye' yaug- ceyaug mangad: i?Khonhae" re: yao" kyam: byu qere malhoe' ke' yaug- ai bam re yham maphao nhao yaug wa ceyaug mangad: i? ga: myid' li" genae".

¹⁸Myid gaung mae" kho:kham qe alhab' yao: bam: khid: ra" lab jham mae lang" jo; bam: ako".

¹⁹Ngadqere: nao wa lab maqo" ngad: ra". Ni" maogaung re shapye' pab' to" ako". Gye poe mae se' pye' qhug' ko" ra" gyezo: qe: mao gaung jham: yang aire bam" to: mung: laug byo, khyaung khyo aijham we' daga" pye' khyo" pye' mung: zab: nhae" pye' qhug' ako".

²⁰Pe"mung:ga"re nao wa ni" mung"dan: re phyo' qheim" pye' mung: naoyao" byumyu" qere se' pye' ra". Nao wa kho:kham qeru: nyhab' shaung: ru maqhug' nae". Ni" nho: makhyang" ra" yham khaung byu dayaug re: mana: dang nae".

²¹Se' pye' nhao ge,- yao: bam: phug' pho" qe: qobo mathao mae ce: yao" yauggai zo: qe shid: li" genae"- yao: bam mae" dayaug re: mug: myid re maeib genae". Vogaung: jham re: maqo" te: genae"- ga: ta" ra".

²²Qam: bo: ra" ASANG wa Babelon re ngo khe' zin: mung: byo; qeim: lo" nhao nae". Pe" re: ngo matang" nae"- zoshao qe- na: dang mo, dayaug rere: matang" to: nae". ASANG ngo ta" to: va".

²³Ngo wa Babelon re tham: nheim" boe" lo" nhao mung: khaung: bab: jham aimae na: li" genae". Ja: khao: ngo" re qo" sham" pye' ra" sham: ban" yang Babelon re ngo sham" pye' nae". Qam: bo: ra" ASANG ngo ta" to: va"- ga: ta" ra".

²⁴Qam: bo: ra" ASANG wa jham dalam: tang" to" ava". Aiwa ngo yaung: to: va" ru wa boe" li" nae". Ngo kad' nae" ein: myid: phyid' to: va" ru wa boe" li" nae".

²⁵Asuri byu qere nga" Israel mung" mae" phyo' pye' nae". Yao: bam re nga" bam jham: dao mae zab: nhae" pye' nae". Ngo wa nga" byumyu" re Asuri qe: kyau: mae" lhoe' ke' byid: mung: yao: bam vin ca" ra" qola: mae" lhoe' ke' byid: nae".

²⁶Ceru wa mug: myid qhid' mae" ngo yaung: to" ra" khyo ngad:- byumyu" qere qobo dae byid: nae" qhid' mae" nga" lo, yheim" to: va"- ga" ru ngad: ra".

²⁷Qam: bo: ra" ASANG wa cere kad' nae" myid: phyid' to" ava". Qobo dae byid: nae" yao" lo, re yheim" to" ava". Khag' re: yao: re maqo" tam" pye' ngad: ra".

²⁸Ce: mung: dao: wa kho:kham Ahaza shid: ra" zin mae ta" hau" ra" mungdao: ngad: ra".

²⁹Philisti byu qe we"- naonhaung" re be; ra" lhae daung: gyug' byaug: ava". Ngadqere: nao bau: nae" akhyo majo, ngad: ra" lhao maui dadau: shid: lo" lao" ai: jo, qo mae je: xo: ra". Lhao maui dadau: joe" li" ra". Lhao maui au" jham wa dao" ra" mao jaung: phaug' li" ako".

³⁰ASANG wa yao" byumyu" qe: myaung sho: mo; yao lhaug' lhaug' yaug boe" li" nae". Yao: bam re gug: gam za: na nhao: li" nae". Ngadqere: Philisti we"- yao: wa ni" dao mae bao" khug' no, nhao: ke' byid' li" nae". Naonhaung" mae" dayaug rere: adaui matang" to: co' nae".

³¹Philisti vogaung: jham we"- naonhaung" alhab' we"- bao" thaung' ru qhid' mae" gyi: ngug ge,. Naonhaung" alhab' gyaug ge,- mug: am: mae" jham dakhyang: zo: joe" li" na: ra". Aiwa gyaug: ra" gyezo: dayaug re: mabo ngad: ako".

³²Philisti mae" ngonhaung" jhao" joe" li" ra" lagyo: qere ngonhaung" khoru: tau: nae" i? ASANG wa Ziun re zao: to: mung: dayin dayo: qug: khai: kham zo" ra" yao" byumyu" qe wa aimae gug: gam: rure myao: yu: li" genae"- ga" rure yao: bam re ngonhaung" ta" kyo: nae".