Read Maru ESAIA 15 Bible Online

ESAIA 15 - Maru bible

ESAIA 15

¹Ce wa Moba we' sin" ra" mungdao: ngad:- Ara we' Kira vogaung: jham wa damyi re za: phyo' qheim" pye' qhug' ako". Moba mung" wa cae: jhug tag boe" byaug: ra".

²Phan yham re sham: nae" qhid' mae" Dibon byu qe wa bug gaung khyo do, ye" ako". Moba byu qe wa Nebo we' Medeba vogaung: jham: dao mae kaug' ngug: ako". Yao: bam: au: we' nhad' maui: jham re kaug' yang: qaug: pye' ako".

³Hau" mo" khyo mae na mo, wa jid: mo" mai bau: jham ve; ako". Shava jao: mae we' yham khaung dao mae" mo, byu qe wa kaug' ngug: ako".

⁴Heshbon we' Eleale byu qe gyi: hug' mung: yao: bam: gyi: hug' thoe wa Yaha vha" mae" the' gyo" ra". Gyezo: qe lhao" re: ko, ko, nin" ako". Yao: bam: sulhe: myid baui" byaug va".

⁵Nga" nhag' lam: wa Moba qhid' mae" gyi: hug' ra". Byu qe wa Zoa we' Eglad Shelishiya vogaung: khyo phao: byaug: ako". Ye" lo" zo" ngug mung: byu damyo" Luhid khyo ye" ra" khyodang khyo do, ye" ako". Thoe qi: we' kaug' mung: byu damyo" Horonaim khyo phao: loe; ye" ako".

⁶Nimrim gyaung: zo: wa kin" ho: byaug mung: qid yae mae" mhin: jham wa jhoe' shid: lo" ako". Nyug: ru pe" madang lo:-

⁷Mung" byu qe wa Mumakha lao: khaung: khyo" lai: phyid' ye" ako". Yao: bam: jo,nho" jham alhab' we' daga" phao: loe, nae" seim" na: ako".

⁸Moba mug: kyo: shad' khao: ngo" mae gyi: ngug: na thoe the' gyo" ra". Eglaim we' Berelim vogaung: mae" ngug: hug' thoe re the' gyo" ra".

⁹Dibon vogaung: mae" qid gyaung: wa sa" yang ne: jo; ra". Mao"So wa aimae na: ra" mo; qhid' mae" je: xo: ru daja: lhao" re: qaung" to: byid' ashi". Ngad va" Moba mae na: dang: ra" mo, yaug khao: ngo" re aimae sa: ne phyi se' pye' li" genae".