Read Maru ESAIA 16 Bible Online

ESAIA 16 - Maru bible

ESAIA 16

¹Din" pyad' yo mae jo; ra" Sela vogaung: mae" Moba byu qe wa jhaung qhu" khyo" Yerusalem mae eib: na: ra" yaug re yao nau" dadau: byid' ke' ra".

²Yao: bam wa Arnon qid yae mae lao" na mung: ngho' sad' phyo' pye' qhug' ra" ngho' jham we' dakhyo: au: qang khyo mato: lo: thoekhyo cekhyo lhang: qin" ako".

³Yao: bam wa Yuda byu qere pe" ru: kad' nae" ru ngonhaung" re ta" gela,- na" gaung ba laung yo mae cae: ngin" ra" ba sham qab byid' ra" sag' gae we' dakhyo: ngonhaung" re go byid: gela,- naonhaung" ba sham qab mae ngonhaung" re dugno: nhao gela,- ngonhaung" wa phao: khug: lhau mo, ngad:- ngonhaung" re khag' mathe' qho: myao: ra" jo, qo mae nyham" to: gela,-

⁴Naonhaung" mung"dan: mae ngonhaung" re na nhao gela,- ngonhaung" re phyo' qheim" pye' nug ko" ra" mo; lo, mae" ngonhaung" re gug: gam byid: gela,- ga: ta" ako". (Zag zo" ru we' phyo' qheim" pye' ru wa baui" byaug: li" nae". Mung"dan: re pyad' lad sade: kad' mo, wa baui" byaug: li" genae".

⁵Ailao" Davi nho: myid:zo: qemae" dayaug wa kho:kham boe" li" mung: yao: wa mung" byu qere jhaug' zaug: ru we' jhid'de; myid: yang eib: li" nae". Yao: wa jo: rure kad' nae" phyad: li" nae". Tarha" din: nyang: rure yao: myao: li" nae".)

⁶Yuda byu qe wa Moba byu qe khoqhi" ngad beim: ko" ra" thoe re ngonhaung" the' gyo: va". Yao: bam ngad beim: mung: phug mo, ngad ko" rure ngonhaung" ba: ra". Ngadqere: yao: bam phug: ru wa akeim ngad: ako"- ga: ta" ako".

⁷Yao: bam dayin dayo: kham zo" ra" qug: khai: mathao mae Moba byu qe ngug: li" genae". Kira Here vogaung: mae yao: bam lhaung" zo: ko" ra" zo:ve gai re myid: beim: gelao"- yao: bam alhab' ngug: li" genae". Yao: bam nhag' lam: thao" byaug: li" genae".

⁸Heshbon nhae mae" yo jham- Sibma mae" sabyi khyae jham wa phyo' qheim" pye' qhug' ako". Ai: sabyi khyae mae" sabyi qang: wa byumyu" qere eib: ra" mo, re shaug' yid nhao: ako". Ganhae" sabyi naui jham wa Yaze vogaung: joe" sho' naui: bye; ye" ako". Ba thug' shad' din"pyad' yo joe" sho' ba vao shad' Tham: Shid thoete' joe" sho' yaug: bye; ye" ako".

⁹Ana" ngo wa Yaze qhid' mae" ngug: ru we' dakhyo: Sibma sabyi naui jham: qhid' mae" ngug: ra". Nga" ngug byid jham wa Heshbon we' Eleale dao mae gyo" zao" byaug: ra". Pe"mung:ga"re mung" byu qere bau: nhao: ra" sabyi shi: phyo' yo, majo, nae".

¹⁰Ana" myid xau gai: ra" yothaung: jham mae khag' mabau: lo:- sabyi khyae jham mae khag' re: mahug' lo:- nghaui" caung: re: nghaui" caung: lo:- sabyi qang: kad' nae" sabyi khag' manao: lo:- ngaui bau: yang: hug' ra" thoe jham wa thao" lo" byaug: ava".

¹¹Ngo wa Moba qhid' mae" nhag' kaug' ru we' Kira Here qhid' mae" kaug' ngug: ru we' nokyang: kyang" ra".

¹²Moba byu qe wa yao: bam: bam dao mae" phan yham khyo ye: yang: yao: bam: gaung re myaung: nhao mung: yao: bam: Caung:pa" Yham khyo akyu" mho' nae" ye: gengadqere: yao: bam: qhid' mae" pe" akyu" mabo nae".

¹³Airu wa Moba qe we' sin: yang: ASANG: yang aqhid mae" byid' to" ra" mungdao: ngad: ra".

¹⁴Ana" ASANG wa sam zin tab ngad: re Moba nho: gyai laug: ra" jo,nho" jham baui" byaug nae". Ai: byu myo: sho' mo, mae" dajhid' za: na: dang: li" nae". Yao: bam wa qam: nang: mo, ngad: li" genae"- ga: ta" ra".