Read Maru ESAIA 19 Bible Online

ESAIA 19 - Maru bible

ESAIA 19

¹Ce wa Egutu we' sin" ra" mungdao: ngad: ASANG wa qao: ra" jham thaui: dao mae zaung yang: Egutu mung" khyo joe" li" na: ra". Egutu byu qenho: so alho jham wa yao" qhid' kheim: mae ko, ko, nin" mung: yao: bam: sulhe: myid baui" byaug: ako".

²ASANG wa ngo wa Egutu mung" khug mae gye poe lhau: zhung" to" ke' mung: yao: mao: yao: nhaung: yao: cao: gye kad'- yham kyo: yao: cao: gye kad' gye jho" boe" nhao nae". Gye mai jho" qhi" na ko" ra" vogaung: yao: cao: gye jho" zin: mung: mai jho" qhi" na ko" ra" kho:kham qe wa kheim: so' qi: nae" qam: ke' li" genae".

³Egutu byu qenho: yaung: kyae: to" ra" mau" jham re byo; qeim: lo" nhao mung: yao: bam: myid qam: re ngo khyug' pye' byid: nae". Yao: bam re bao" yu nae" qhid' mae" yao: bam: so alho jham re mho' li" genae". Yao: bam wa jan: zho: mo, we' jho" qham nae" ye" li" genae". Shid mo; subyo jham re pha,jhi" yemho' li" genae".

⁴Ngo wa Egutu byu qere yao: bam re eib: ra" makhyang: yaug- se' da: be, khyad' kad' ra" kho:kham pho" lo, khyo byid' pye' nae". Ngo qam: bo: ra" ASANG ta" to: va".

⁵Nila qid gyaung: wa nang" lo" mung: zo"zo" mae" kin" lo" byaug nae".

⁶Qid ko' jham zo" zo" mae" kin" lo" au: qid gyaung: bab sheim nae: lo: li" nae". Qid phaung: jham we' dung goe: jham jhoe' lo" mung:-

⁷Nila qid yae cao" yang: qho" to" ra" qhovo: jham kyaug' shid: lo" byaug mung: la: yang hug' tao" lo" byaug: li" genae".

⁸Nila gyaung: mae ngo: kung" zo: yang: vae: dug: khau mo, yaug khao: ngo" wa nokyang: kyang: yang: gyi: ngug: li" genae". Yao: bam: ngomyhad' we' geim jham wa aje ngad: byaug nae".

⁹Jid: mo" pin: gai nai: mo, wa nhag' lam: thao" genae".

¹⁰Qo, gin: qo, mo, we' jhao: ra" lo, mau" kad' mo, wa qam: shan qam: gyug' byaug: li" genae".

¹¹Zoan vogaung: mae" au: jhaung qe wa ago qe ngad: ako". Egutu byu qemae" pha,jhi" bo: thao" mo, wa atug' akhyug pha,jhi" byid' ako". Ganhae" pyad mae" pha,jhi" bo mo, we' kho:kham qe: khu mae xo' kad' lo mo, yao: bam ngad: ga: kho:kham re yao: bam khoru: vae" ta" ko" laug i?

¹²Egutu kho:kham we"- ai: ni" nho: jhao: ra" pha,jhi" byid: mo, khai: mae ngad: ako" i? Egutu qhid' mae" qam: bo: ra" ASANG pe" ja: yaung: to: byid' rure yao: bam nao re qo" ta" re qo" ta" kyo: genae".

¹³Zoan we' Mumphi mae" au: jhaung qe wa ago jham ngad: ako". Yao: bam: byumyu" re au: qhid' qo" she: re she: li" genae". Ngadqere: yao: bam khyonghung: jhui" nghung" pye' ako".

¹⁴ASANG wa yao: bam re athaui: ayaug mung nhao: ra" pha,jhi" byid: dao: re byid' ra". Boe" ra" athao khyo"- Egutu wa ja: khao: ngo" shad' ru za: kad' mung: yhid yid yaug yao: daug: to" ra" vho: bam mae jhad' lang: yang: lang" be; lhau: ru we' dakhyo: ngad: ra".

¹⁵Egutu mung" mae na: ra" jo,nho" qo" yaug- myaung sho: yaug- byuqi: byuzang- bang" vo qe dayaug re: maqo" bao" byid: ngad: ako".

¹⁶Egutu byu qe myiqe: qeru: qho' jab: jo, genae" ra" ayo, joe" li" genae". Yao: bam re qobo dae byid: nae" qam: bo: ra" ASANG yao" lo, re yheim" ke' rure the' myao gelao"- yao: bam gyaug yang: ko, ko, nin" li" genae".

¹⁷Qam: bo: ra" ASANG Yuda byu qe: qhid' mae" jaung: to: byid: va" ra" khyo re yao: bam re ta" peim: byid: khao: ngo" Egutu byu qe wa Yuda re gyaug: li" genae".

¹⁸Ai: ayo, joe" lo lao"- Egutu mung" mae" vogaung: ngo" lam: mae Hebre myan" jhau: li" genae". Aimae na mo, wa qam: bo: ra" ASANG: mang re lao: yang: jham tang" li" genae". Aimae" vogaung: dalam: re wa Ba vogaung: ga: mhang" li" genae".

¹⁹Ai: ayo, joe" lo lao"- Egutu mung" mae ASANG: qhid' mae" phan dalam: jo; li" nae". Egutu mug: kyo: mae yao: re qhaug' byid' to" ra" laug zang baung: dazang jo; li" nae".

²⁰Aijham wa Egutu mung" mae qam: bo: ra" ASANG: aso: ngad: li" genae". Aimae na ko" ra" mo, zag zo: qhug' gelao"- bao" yu nae" ASANG re yao mung: yao: wa aibam re khyad' yu nae" byu dayaug yaug re nhao: ke' byid' li" nae".

²¹ASANG wa yao: yao" gaung re Egutu byu qere qhu" byid' li" nae". Ailao" yao: bam lhang: yu mung: yao: re caung da" byid: yang: ngaui" xeim: we' xeim: jham yao: re qhaug' byid' li" genae". Yao: bam yao: re dao:so: byid: mung: yao: bam dao:so: re cao" kad' li" genae".

²²ASANG wa Egutu byu qere qobo dae byid: nae". Ngadqere: yao: wa yao: bam re gai byid' li" nae". Yao: bam yao: jhao" phaug' lo mung: yao: bam: akyu" mho' dao: re gyo: byid: yang: yao: bam re gai byid' li" nae".

²³Ai: ayo, joe" lo lao"- Egutu mung" we' Asuri joe" sho' hau" mo" khyo bung" li" nae". Mung"dan: shid' lam" geim" mae" mung" byu qe wa yao: bam: gyo: mae ye: ye: lo lo gyaung: su" li" genae". Ai: byumyu" shid' ja: wa daga" za: caung:pa" li" genae".

²⁴Ai: ayo, joe" lo lao"- Israel wa Egutu we' Asuri we' daqi" ngad: li" nae". Ce: byu sam myu" wa mug: myid alhab' qhid' mae" shaman" jeju doe; li" nae".

²⁵Qam: bo: ra" ASANG wa yao: bam re shaman" byid: mung:- nga" byumyu" Egutu we"- ngo phan" to" ra" Asuri nao we"- ngo khyin: yu: to" ra" Israel nao we"- nao re ngo shaman" byid: nae"- ga: ta" li" nae"- ga: ta" ra".