Read Maru ESAIA 2 Bible Online

ESAIA 2 - Maru bible

ESAIA 2

¹Ce wa Yuda mung" we' Yerusalem we' sin: yang: Amod nho: yauggai zo: Esaia re Mao"So: yang byid' ra" mungdao: ngad: ra".

²Aiwa joe" lo nae" ayo, mae Caung:pa" Yham zhaug' ra" bam wa- myhao: thao" rumae" bam dabam ngad mung: bug gaung alhab' tho' mae myhe" nghoe' jo; li" nae". Byumyu" mung"dan: myo: sho' wa ai: khyo yan" li" mung: yao: bam: mung" byu qe wa-

³Israel Mao"So: Caung:pa" Yham khyo- ASANG: bug gaung khyo do, ye: gelang:- Yao: ngonhaung" re kad' nhao nug: ra" ja: ngonhaung" re mho" shid' li" nae". Yao: khyin: to" ra" khyodang mae ngonhaung" su" li" nae". Pe"mung:ga"re ASANG: mho" shid' khyo wa Yerusalem mae" joe" li" mung:- Yao: wa yao" byumyu" qere Ziun mae" dao: jhau: li" nae".

⁴Yao: wa qi" qhang: ra" byumyu" phaung mae jho" ta" ngag: rure ta" sho' byid' li" nae". Yao: bam: shae pyang: jham re kheim be, mung: yao: bam: lhae tad' jham re shae tho: be; yu: li" genae". Byumyu" mung"dan: jham wa khonhae" re: gye makhe' lo: genae". Gyekhe' poe qhid' mae" khonhae" re: maseim" lo: genae".

⁵Ana"- Yaku nho: myid:zo: qe we"- ASANG: yang ngonhaung" re byid' to" ra" bo" bao mae su: gelang:- ga: ta" li" genae".

⁶O"- Mao"So we"- ni" byumyu" ngad: ra" Davi myid:zo: qere nao shapye' pye' ava". Mung"dan: wa ba thug' shad' mae" we' Philisti mung" mae vha" ra" mau" byang" jo; ra". Amyu" byu qe wa taung bug byu qe: thung" li jham cao" byaug: avako".

⁷Yao: bam: mung"dan: wa ngaui we' qhang byang" jo, mung: yao: bam: jo,nho" matho' thao" ngad: ra". Yao: bam: mung"dan: wa myao: jham byang" jo, mung: yao: bam: myao: lhin" jham mathao" ngad: ako".

⁸Yao: bam: mung"dan: wa so alho byang" sho' jo; ra". Amung: yao: bam: lo; yang kad' to" ra" zai jham re yao: bam caung:pa" byid' ako".

⁹Yaug khao: ngo" wa nyham: khyo" pye' ru we' qho' phyo' ru qhug' li" genae". ASANG we" yao: bam re qobo dakhyad' byid: wo"-

¹⁰Laug byo, mae jo; ra" laug aug' jham mae yao: bam phao: vho' li" genae". ASANG: nhag' jam: yo" rumae" phao: loe, nae" we' yao" kheim: so' we' phungbao mae" phao: loe, nae" qhid' mae" myid gaung mae dung:khung: dau" laung" ako".

¹¹Xao su byu qe: ngad beim" ru wa thao" lo" mung: xao su byu qe: nhag' lam: myhao: ru byo; qeim: lo" nae" ayo, joe" lo: li" nae". Ailao" ASANG dayaug za: nga: yhe' byid' ru qhug' li" nae".

¹²Ai: ba na mae qam: bo: ra" ASANG wa kheim: so' bo mo,- ngad beim: mung: phug mo, yaug khao: ngo" re nyham: khyo" pye' li" nae".

¹³Yao: wa Lebanon mae" myhao: ra" shaug' gae jham re we' Bashan mung" mae" shikhai: gae alhab' re thau: khyo" pye' li" nae".

¹⁴Yao: wa myhao: ra" bam jham bug gaung jham

¹⁵Myhao: ra" gyebyu zaung jham- gyetab vang jham re tae" pye' li" nae".

¹⁶Qi" thao" ru we' yaung" thao" ra" qid sang pho jham re lhao" re: nhab' pye' ra".

¹⁷Xao su byu qe: ngad beim" ru wa thao" lo" byaug mung:- xao su byu qe: nhag' lam: myhao: ru wa phyo' qheim" pye' ru qhug' li" nae". So alho jham wa bin sho' byaug: byaug nae". Ai: ba na mae ASANG dayaug za: nga: yhe' byid' ru qhug' li" nae".

¹⁹Myid gaung re lhaui" nhan" nae" yao: joe" li" lao"- mung" byu qe wa laug byo, mae jo; ra" laug aug' jham mae phao: vho' li" genae". ASANG: nhag' jam: yo" rumae" we' yao" kheim: so' we' phungbao mae" phao: loe, nae" qhid' mae" myid gaung mae dung:khung: dau" laung" li" genae".

²⁰Ai: ba joe" lo lao"- yao: bam kad' ci: ra" ngaui we' qhang so alho jham re yao: bam shapye' pye' li" genae". Aijham re qug qhug' jham we' pho' qhid' jham khyo shapye' byid' pye' li" nae".

²¹Myid gaung re lhaui" nhan" nae" qhid' mae" ASANG joe" li" lao"- mung" byu qe wa yao" nhag' jam: yo" rumae" we' phao: loe, nae" qhid' mae" we' yao" kheim: so' we' phungbao mae" phao: vho' nae" qhid' mae"- dungkhung: jham mae we' laug byo, mae jo; ra" laug aug' jham mae vho' jo; li" genae".

²²Shid ba: ra" byu qere damyid: lam loge, yao: bam pe" phug' de; ako" i?