Read Maru ESAIA 24 Bible Online

ESAIA 24 - Maru bible

ESAIA 24

¹ASANG wa myid gaung re cae: jhug tag kad' pye' mung: pyad' lad sade: kad' to: co' li" nae". Yao: wa myid gaung re sham" lhang: ke' mung: myid gaung byu qere abyi asin: kad' pye' nae".

²Khinjaung qe- mung" byu qe- jeim qe- jeim sang qe- vai mo,- aung: mo,- jhid' byid: mo,- jhid' yu mo,- jo,nho" qo" mo,- myaung sho: mo,- yaug khao: ngo" alhab' wa au: pa daja: za: thaung" qhug' li" genae".

³Myid gaung wa man" byaug mung: qeim: jo; li" nae". ASANG ta" to: va" rumung: airu: boe" li" nae".

⁴Myid gaung wa kyaug' mung: jhoe' lo" byaug: ra" mug: myid geim" qam: nang" lo" ako". Myid gaung we' mug:gaung qeim: lo" ako".

⁵Byu qe wa myid gaung re Mao"So: tarha" jham re shad' lhoe" ra" khyo"- apyad ato qhid' mae" yao: kad' to" ra" dao: thang" re aqan alan kad' ra" khyo" masan masin" kad' pye' ako".

⁶Aimung: Mao"So wa myid gaung re nhang" ke' ra". Myid gaung: byu qe wa yao: bam kad' lo: ra" lo, mau" qhid' mae" aphug' byid' na: ako". Na: dang mo, je yang: nang" lo" ako".

⁷sabyi naui jham jhoe' lo" mung:- sabyi qang: wa myaung: lo" li" nae". Ganhae" ngaui pyo: mo, yaug khao: ngo" wa ana" kaug' ako".

⁸Yao: bam: ngaui pyo" ra" tang: we' thung zang thoe wa sham: lo" li" nae".

⁹sabyi qang: re caung" ra" ngaui bau" ra" nghaui"caung: ru majo, lo nae". Khag' re: aire maqo" tau" lo nae".

¹⁰Vogaung: khug mae" ja: khao: ngo" wa athaui: anhaung" boe" mung: gug: nae" qhid' mae" mung" byu qe wa yao: bam: yham re kham: kyao" kyao" pye' ako".

¹¹sabyi qang: majo, loyang: mung" byu qe wa hau" mo" khyo mae zag: hug' na: ako". Ngaui baui" ru wa apyad ato mae thao" byaug va". Aiwa mung"dan: mae" khe' thug' pye' qhug' ava".

¹²Vogaung: wa byo; jo; ra". Ai: nho: kham: mo" jham wa phyo' pye' qhug' ava".

¹³Ceru wa mug: myid dao mae" byumyu" khao: ngo" mae boe" li" nae". Agae khao: ngo" mae" zhanlun shi: jham be; shu: khyo" mung: sabyi naui mae" sabyi shi: thao" phyo' yu: pye' qhug' lao"- airu wa shithao" phyo' yu yo, we' dakhyo: ngad: li" nae".

¹⁴Na: dang mo, wa ngaui bau: yang: Nghaui"caung: li" genae". Ba vao shad' mae na mo, wa ASANG khoqhi" qi: qhang yaug ngad: rure ta" genae".

¹⁵Ba thug' shad' mae na mo, wa yao: re- caung:khin" byid' li" genae". Pang:lai cao" yang: na: ra" byu qe wa Israel nho: Mao"So ASANG re caung:khin" byid' li" genae".

¹⁶Din:man" ra" byumyu" Israel nho: Nghaui"caung: thoe re va" thao" ra" mug: myid dau jham mae" ngonhaung" the' gyo" li" nae". Ngadqere: nga" qhid' mae" myid: lao" khyo majo,- ngo wa gan: lo" na va". Geim lau mo, wa xo' yang: ngore ab: pye' mung: yao: bam: jhaug' mazaug lam maga" ru wa je: yang: xo: li" ra".

¹⁷Yaug khao: ngo" we"- nga" dao: re tae" gyo: ge,- gyaug ci" ru- dung: gyan:- lha" jham wa naonhaung" re lao" na: ra".

¹⁸Gyaug ci" ja: mae" phao: loe, nae" seim" yaug khag' ngadqere: dung: gyan: khug khyo gyo" vao lo" li" nae". Dung: gyan: mae" phao: loe, nae" seim" yaug khag ngadqere: lha" mae myi" li" nae". Mug:gaung mae" mug: qu: zaui mung: myid gaung: nho: apan aqao: jham laui" nan" li" nae".

¹⁹Myid gaung wa bag: go, mung: agao gao boe" byaug yang: go; jo; li" nae".

²⁰Myid gaung yao: yao: wa yhid yid yaug ru: gyang: be; lhau mung: la qam" khug mae" zaung khyae: we' dakhyo: gyang: nga: lhau: li" nae". Mug: myid wa yao" qobo: yang nhai" zaung: gyo" lo" qhug' mung: ai wa byo; gyang: lo" yang: khonhae" re: maqo" dam: to" lo nae".

²¹Aitho' mae" kheim: so' qo" mo, re we' myid gaung: nho: zug: qere ASANG: yang qobo dae byid nae" ra" ayo, joe" lo: li" nae".

²²Mao"So wa dung: gyan: khug mae lhaung" to" ra" kyam: byu qere we' dakhyo: kho:kham qere daga" zang" ham: jo, nhao nae". Yao: bam: qobo dae byid' ra" ayo, joe" sho' yao: wa aibam re thaung: lhaung" to" li" nae".

²³Lho" wa no; lo" li" nae". Ba wa mazho lo nae". Pe"mung:ga"re qam: bo: ra" ASANG wa kho:kham ngad: li" nae". Yao: wa Ziun bam mae" Yerusalem mae eib: li" nae". Amyu" byu qenho: au: jhaung qe wa yao" phungbao re the' myao: li" genae".