Read Maru ESAIA 25 Bible Online

ESAIA 25 - Maru bible

ESAIA 25

¹ASANG we"- nao wa nga" Mao"So ngad:- ngo wa nao re nga: yhe' byid: mung: ni" mang a re caung:khin" byid: nae". Nao wa mug' pho: mau" jham re kad' ava". Ganhae" mae" nao yang: to" rure jhaug' zaug za: nao kad' boe" ava".

²Nao wa vogaung: jham re byo; qeim: lo" nhao mung: gyetab vogaung: jham re phyo' qheim" pye' ava". Ngonhaung" gyevo qe kad' to" ra" kho:kham kho" jham wa apyad ato mae baui" byaug: avako".

³Qam: so' bo: ra" byumyu" qe wa nao re caung:khin" byid' li" genae" se' da: be, khyad' kad' ra" byumyu" qenho: vogaung: jham mae nao gyaug phug' byid' ru qhug' li" nae".

⁴Myaung: sho: mo, we' masho: majhin ngad mo, wa nao jhao" phao: ye" avako". Qug: khai: qug: khai: qhug' ra" ayo, mae gug: gam: ru qhug' avako". La qam" khug nae" jo, qo yao: bam re nao byid: mung:- khyang" khyang" laung: rure khug nae" ba sham byid' ra". Se' da: be, khyad' byu qe wa gyo, yo mae" la qam" we' dakhyo: mug: kyaug' mae" kyaug' ho: ru we' dakhyo:- khe' zin" ra".

⁵Ngadqere: ASANG nao wa- Ngonhaung" gyevo qere tae" lo" nhao: ava". Laung: ra" ba mae jham thaui: nghin" we' dakhyo:- se' da: be, khyad' kad' mo; hug' thoe re nao tae" lo" nhao: ra".

⁶Qam: bo: ra" ASANG wa mug: myid dao mae" byumyu" alhab' qhid' mae" zo:ve gai- sabyi qang: gai we' ce: Ziun bam dao mae zo: shaug' poe dapoe seim" jaung: to" li" nae".

⁷Cetau mae yao: wa byumyu" alhab' dao mae nghoe' to" ra" nhag' kaug' ra" jham thaui: re yu: pye' byid' li" nae".

⁸ASANG kho:kham wa shid: rure apyad ato mae phyo' qheim" pye' li" nae". Yao: wa yaug khao: ngo" nho: ngug byid jham re sad' pye' byid: mung:- mug: myid jao: sho' mae yao" byumyu" qe kham zo" lo: ra" nga: yeim: rure yu: pye' byid' li" nae" ASANG yao: ta" to: va".

⁹Airu boe" lao"- yaug khao: ngo" wa- yao: wa ngonhaung" Mao"So ngad: ra" wo"- ngonhaung" yao: re lam khug: na mung: yao: ngonhaung" re khyad' yu: ava". Yao: wa ASANG ngad: ra" wo"- yao: re ngonhaung" lam khug: na:- ana" ngonhaung" ngaui bau: ngaui pyo" na:- pe"mung:ga"re yao: ngonhaung" re khyad' yu: ava"- ga: ta" li" genae".

¹⁰ASANG wa Ziun bam re gug: gam byid' li" nae". Ngadqere: Moba byu qe wa nung: khyid' mae khovho re zab: nhae" pye' ru we' dakhyo: zab: nhae" pye' ru qhug' li" nae".

¹¹Yao: bam wa qid qhe' qhe' seim" ruru: yao: bam: lo, re yheim" ke' li" genae". Ngadqere: Mao"So wa yao: bam re deim" nhab' khyo" pye' mung: yao: bam: lo, jham wa masho: majhin nab: lo" li" genae".

¹²Yao: wa Moba nho: gyetab vogaung: jham re aijham: nho: myhao: ra" vang jham we' daga" phyo' qheim" pye' mung:- aijham re phalhug bam khyo lang" gyo" lo" nhao: pye' li" nae".