Read Maru ESAIA 26 Bible Online

ESAIA 26 - Maru bible

ESAIA 26

¹Amyu" byu qe Yuda mung"dan: mae ce: nghaui" caung: genae" ra" ba na joe" lo: na: ra". Ai: nghaui" caung: wa- Ngonhaung" vogaung: wa qam: bo: ra". Ai: nho: vang jham re Mao"So yao: gug: gam byid: va".

²Vogaung: kham: jham re phung" ge,- jo: ra" mau" kad' ra"- byumyu" ngad ko" ra" jhaug' zaug: ra" byumyu" re vao li" nhao ge,.

³ASANG nao wa yao: bam: myid: yaung khyo re tang tang kad' mung: nao re khug ngha mo, re jab byang" ra" ngaui pyo: yaug yo khyo byid' ra".

⁴ASANG re apyad ato mae khug ngha: na ge,. Yao: wa khonhae" re: ngonhaung" re gug: gam byid' li" nae".

⁵Yao: wa ngad beim: mo, re nyham: khyo" pye' ava". Yao: bam na: ra" gang" tang: ra" vogaung: re phyo' qheim" pye' ava". Amung: ai:nho: vang jham re phalhug bam khyo gyoe; gyo" lo" nhao: ava".

⁶Zag zo: qhug' ra" mo, wa ana" aimae su" lhau: ako". Yao: bam: khyid qao: mae aire zab: nhae" pye' ako".

⁷ASANG we"- byugai qe: qhid' mae" khyodang re myhaug' myhaug' za: kad' byid' ra". Yao: bam su" ra" khyodang re dae dae kad' byid' ra".

⁸Ngonhaung" wa ni" myid o: rure cao" mung: nao re ngonhaung" myid: lao" na:- nao wa ngonhaung" kao bau myid o: ru alhab' ngad: ra".

⁹Nga" aung khug nhag' lam: alhab' we' myi" re nao re ngo myid: na:- Myid gaung we' myid gaung: byu qere nao dao: kho' lao"- Tarha" din nyang: ru pe" ngad: rure yao: bam alhab' mo, zhao: yu: li" genae".

¹⁰Makhyang" ra" byu qere nao nhag' khyag' sho' ngadqere: yao: bam jo: ru kad' nae" khonhae" re: mazhao: yu genae". Din:man" ra" byumyu" qe na ko" ra" ce: mung"dan: mae lhao" re: yao: bam shad' ru kad' na: ashiko". Ni" nho: qi" qhang rure yhin" yu nae" yao: bam ha: pye' ako".

¹¹Nao: yang yao: bam re qobo dae byid: nae" ngad: rure ni" gyevo qe maba ngad: ako". ASANG we" yao: bam re qho' phau: nhao mung: dayin dayo: qug: khai: kham zo: nhao wa,- Nao jaung: to: byid' ra" qobo dae re yao: bam re dayin dayo: kham zo: nhao wa,- Ni" byumyu" re nao khonho" jhid'de; rure yao: bam re qhu" byid: wa,.

¹²ASANG we"- nao wa ngonhaung" re jo,nho" byid' li" nae". Ngonhaung" the' yu: ru ja: khao: ngo" wa nao kad' ra" mau" zo" athao ngad: ra".

¹³Ngonhaung" Mao"So ASANG we"- ngonhaung" wa gaje qeyang eib: ru qhug' lo va". Ngadqere: nao dayaug za: ngonhaung" ASANG ngad: ra".

¹⁴Ana" yao: bam shid: byaug mung: madam: daui: na lo: genae". Yao: bam: subyo jham wa madam: to" li" lo: genae". Pe"mung:ga"re nao wa yao: bam re qobo dae byid: mung: se' tam" pye' yang: ngad: ra". Yao: bam re khag' re: mamyid: beim: lo: genae".

¹⁵ASANG we"- nao wa ngonhaung" byumyu" re laug: li" nhao: ava". Ai: nho: mug: myid re shad' khao: ngo" khyo lu: li" nhao: ra". Ceru wa nao re nga: yhe' byid' ava".

¹⁶ASANG we"- nao wa ni" byumyu" re qobo dae byid: mung: qug: khai: dayin dayo: mae yao: bam nao re akyu" mho' ako".

¹⁷ASANG we"- nao wa zo:khau no no: ra" myiqe: wa no yang: gyi: ngug: ru we' dakhyo: ngonhaung" re gyi: ngug nhao: ava".

¹⁸Ngonhaung" wa no yang: kyi" khyag' na va". Ngadqere: ngonhaung" pe" makhau: thug' ke'- ngonhaung" mung"dan: qhid' mae" pe" aung doe; ru maqo"- Ngonhaung" pe" re: makad' pin" to:-

¹⁹Ngonhaung" byumyu" mae" shid va" mo, wa dam: daui: li" genae". Yao: bam: mao gaung jham wa kao so' dam: bo: li" genae". Yao: bam: lab khung: jham mae yab: jo, mo, alhab' wa dam: so" li" mung: ngaui bau: nghaui"caung" li" genae". Nghin zo; yang myid gaung re jhug' nhao: ru we' dakhyo: ASANG wa ganhae" mae" shid: jo, mo, re dam: daui: li" nhao nae".

²⁰Nga" byumyu" qe we"- naonhaung" yham khyo lo" ge,- amung: kham: pyid' pye' ge,- Mao"So nhag' jam: yo" ru gyo" sho' naonhaung" dazab zo: vho' jo, ge,.

²¹Yao: bam: qobo mathao mae myid gaung: byu qere qobo dae byid: nae" qhid' mae" ASANG wa yao" na jo, qo mug: khaung: mung"dan: mae" joe" li" na: ra". Myid gaung: dao mae anyham: avho' zug' yang: kad' ra" byu se' mo, re ceim" shid' byid' li" nae". Myid gaung wa se' pye' qhug' va" mo, re manyham" to: lo nae".