Read Maru ESAIA 27 Bible Online

ESAIA 27 - Maru bible

ESAIA 27

¹Ai: ba na mae ASANG wa yao" qam: so' qi" ru we' shid ba: ra" shae pyang: re ci yang: kheim" cae" naui: lhau: ra" mao jaung: Levithan re qobo dae byid' li" nae". Pang:lai: mae na: ra" mao jaung: re se' pye' li" nae".

²Ai: ba na mae ASANG wa yao" pyo" ra" sabyi khyae we' sin: yang:-

³Ngo wa aire lhaug' mung: abang mabyid qid sheim" ra". Khag' yang re: aire dae mate' nae" qhid' mae" ngo wa myi" re:- na" re: lhaug' zaung" ra".

⁴Ngo wa sabyi khyae re nhag' mayo: lo nae". Ai mae zau: kyin we' zau: bao gae jham yaug lao" za: aijham re ngo bin sho' ngha" pye' nae".

⁵Ngadqere: nga" gyevo qe ngad: ra" byumyu" qe nga" gug: gam: rure o ko" re wa ngo we' mang dae khyo yao: bam re kad' nhao ge,. Ngad va"- yao: bam re ngo we' mang: dae tae" nhao ge,.

⁶Joe" lo nae" ba na jham mae Yaku nho: myid:zo: qe ngad: ra" Israel byu qe wa sag' gae we' dakhyo: agyi: cin" li" genae". Yao: bam wa abu" bu" li" mung: athaung: de; li" genae". Aijham: yang ashi: zaui: byid: mung: myid gaung byang" sho' bam: jo; li" genae".

⁷Israel wa yao" gyevo qere qhi" xo sho' qobo dae byid' rure:- byu myo: sho' shid: dam: sho' re: ASANG: yang qobo dae byid' ru maqhug' qu" ngad: ra".

⁸Yao: bam re pyaung" jhui" lo" nhao: pye' ra" khyo" yang ASANG wa yao" byumyu" re qobo dae byid' ra". Yao: wa yao: bam re ba thug' shad' mae" thin: ra" la: yang jhui" lo" pye' nhao: ra".

⁹Ngadqere: Israel nho: qobo jham re wa tarha" taung bug qe: phan laug baui jham laug phyu khai" we' dakhyo: gyag: pye' mung: sheim nae pyo: xau phad' ngaui" ra" phan jham we'- so myhi" Ashe nho: khyo aso: jham madang: jo, lo: lao" za: qobo khyad' byid' ru qhug' li" nae".

¹⁰Gyetab vogaung: wa byo; jo; ava". Aiwa din"pyad' yo we' dakhyo: cae: jhug tag boe" jo; ava". Aiwa nung: jham: mhin: gyo, jao: boe" li" mung: yao: bam ai tau mae mhin: lhae: zo: mung: dug no" na: ako".

¹¹Sag' gae jham: nho: akaung jham wa jhoe' lo" mung: gyug' lo" byaug: ako". Myiqe: qe wa aire thao: qho: yu: ako". Pe"mung:ga"re amyu" byu qe wa pe" maba: gyo: ngad: ako". Yao: bam: phan" phaug' ASANG Mao"So wa yao: bam re nhag' makhyag' nae"- nhag' khyag' shogu: myid pe" maqhu" byid: nae".

¹²Ai: ba mae ASANG wa Uphrad gyaung: mae" Egutu mug: kyo: joe" sho' mae na ko" ra" yao" byumyu" re jung: gaung aseim we' amo re khyin: kho' yu: ru we' dakhyo: dayaug bin dayaug zhang: yu: li" nae".

¹³Aiba joe" lo lao"- Asuri we' Egutu mung" mae ye pyaung" nha: to: qhug' ko" ra" Israel byu alhab' re dam: khai: tug' yu nae" labo" re mad: li" genae". Yao: bam wa yao" gyang" lho" bug gaung dao mae jo; ra" Yerusalem mae ASANG re li" caung:pa" byid' li" genae".