Read Maru ESAIA 28 Bible Online

ESAIA 28 - Maru bible

ESAIA 28

¹Israel mung"dan: wa jeim" ava". Yao" nho: yhid yid: ra" au: jhaung qe: au: mae zhaung" ci: ra" ba maug: jham mae" bin: bu" jham we' dakhyo: yao" phungbao wa jhoe' lo" byaug: ava". Yao: bam: nga: kad' ra" au: jham wa sheim nae pyo: ja: xau gyad: to" ako". Ngadqere: yao: bam ashid aso: yid: lang" jo; ako".

²ASANG wa yao: bam re khe' zin: nae" jin" jin" ngad: ra". Qam: bo yang: kheim: so' qi" ra" byu dayaug qo" ra". Aiyaug wa lagqu we' dakhyo:- mug: qi: qu: ru we' dakhyo:- qid gyui gyui: nhai: lo: ru we' dakhyo: joe" li" mung: mung"dan: re aung: nghoe' pye' li" nae".

³Ai: yhid kha: au: jhaung qenho: ngad beim" ru wa khyid qao: mae zab: nhae" pye' ru qhug' li" genae".

⁴Ngad beim" ra" au: jhaung qe: phungbao sham: lo" ru wa mhang" we' phyo' zo" pye' ra" pho' ham" shi: amheim" we' dakhyo: byaug: lo" li" nae".

⁵Qam: bo: ra" ASANG wa na: dang: jo, ko" ra" yao" byumyu" qe: qhid' mae" phungbao bo: ra" ba maug: mae" bin: bu" we' dakhyo: ngad nae" ra" ba na wa joe" lo: na: ra".

⁶Yao: wa tarha" agyi qekhyo" caung da" byid' ra" mo, re tarha" din nyang: rure ba: ra" myid- byid: mung: gyekhe' zin" rure vogaung: kham: jham mae gug: gam byid: ko" ra" mo, re qam: byid' li" nae".

⁷Lapa qe we' khinjaung qe lhao" re: yhid saung" yid geyang: lang" be; lhau: ako". Yao: bam sabyi qang: saung" yid: avako". Yao: bam yhid yid yang: tha" lang" ako". Lapa qe wa saung" yid geyang: ASANG: yang byid' ra" ve, lho jham re maba: gyo: ngad: ako". Khinjaung qe wa saung" yid geyang: yao: bam jhao" cili" ra" mung si: re maqo" ta" phyid' byid: ngad: ako".

⁸Yao: bam zaung: ra" saboe" mae daug: to" ra" vhope' za: byang" sho' ngad: ra". San: ru dakhyi" re: madang lo:ngad: ra".

⁹Yao: bam wa ngo we' sin: yang: nyhung: ako". Yao: bam wa yao: khag' re mho" shid' na: ra" i? Yao" mungdao: re khag' qo ca" i? Aiwa ana" za: nug' kao" to" ra" zonau" qe: qhid' mae" za: akyu" abo: ra".

¹⁰Yao: wa tung" ce' dace' bin dace'- dakhyang: bin dakhyang:- dao: au: dalam: bin dalam: ngonhaung" re mho" nae" seim" na: ra"- ga: ta" ako".

¹¹Naonhaung" ngore matae" gyo: genae" ngad: re wa Mao"So wa naonhaung" re mho" shid' nae" qhid' mae" magyo" qu" ra" myan" re ci: ra" taung bug byu qere ci: li" nae".

¹²Yao: wa naonhaung" alhab' mo, re dug no" ru we' nhag' tang" ru byid' ra". Ngadqere: naonhaung" yao: re matae" gyo: lo: ha: pye' ako".

¹³Ai: mathao mae ASANG wa tung" ce' dace' bin dace'- dakhyang: bin dakhyang:- mho" ra" dao: au: dalam: bin dalam:- naonhaung" re khu byae ce: khao: ngo" khyid au: thaung" li" genae". Naonhaung" wa dae de; genae"- lha" mae myi" li" genae". Thaung: taung" lhaung" pye' qhug' li" genae".

¹⁴Ana"- cetau Yerusalem mae ce: byumyu" dao mae eib ko" ra" nhag' lam: myhao mo, we"- ASANG ta" na: rure tae" gyo: ge,.

¹⁵Shid: ru we' myid vang" mugsug' kad' to: va"- movo mug: joe" sho' myid vang" khyo kad' to: va"- ga: naonhaung" phug: ako". Qug: khai: kyi" khyag' ru joe" lo: au: naonhaung" re dang dang za: tang" to" li" nae"- ga: myid: lam: na: ako". Pe"mung:ga"re naonhaung" re gug: gam byid: nae" qhid' mae" mhug' ru we' apyag' asham" kad' rure naonhaung" khug ngha geyang: ngad: ako".

¹⁶Ana" ASANG kho:kham wa ceru: ta" na: ra". Aiwa Ziun dao mae gang" tang: ra" apan aqao: dalam: te" na: ra". Ai mae gang" tang: ra" lam khug myid wa nhag' lam: re: qhang: ra"- ga: tung" te' to: mung: tang: ra" akhyug mae" laug baui dalam: re ngo ke' to" ra".

¹⁷Tarha" din nyang: ru wa ka" khyo:- dinnynag: rure wa ka" taui boe" nhao nae"- ga: ta" ra". Lag qu khyo" ra" la qam" wa naonhaung" khug ngha: ra" mhug' rure sham" cilo" byaug mung: qid gyui wa ni" gug: gam re phyo' qheim" pye' li" nae".

¹⁸Shid: ru we' naonhaung" myid vang" mugsug' kad' to" ru wa yu: pye' qhug' mung:- movo: mug: we' kad' to" ra" naonhaung" myid vang" khyo wa thang: pye' ru qhug' li" nae". Qug" khai: kyi" khyag' ru gyo" nhai" lo lao"- nao re ai: yang aung: yu: pye' li" nae".

¹⁹Airu wa dane, seim thao dane, seim naonhaung" re dam: dam: be; li" nae". Naonhaung" wa myi" re: na" re: aire vin ca" li" genae". ASANG mae" joe" li" ra" mungdao: asag' kheim: khao: ngo" wa gyaug ci" ja: asag' boe" nhao: li" nae".

²⁰Naonhaung" wa dao: zham" mae gaung jhao" ke' nae" saung" lang" ra" yab jaung: dalam: mae- yao" gaung re sham" gam nae" mai pho' saung" lhu" ru we' yab nae" seim" ra" byu we' dau: li" genae".

²¹Yao" lo, mau" jham mug' nhohab ngad: ra". Yao: kad' nae" yaung: to" ra" mau" re kad' nae" qhid' mae" ASANG wa Perazim bam mae we' Gibeon lao: khaung: mae yao: kad' lo: ru we' dakhyo: khe' zin" li" nae". Yao: wa yao" mug' pho: mau" ngad: ra" yao" mau" re zaui" pin" pye' li" nae".

²²Naonhaung" re ngoyang ta" peim: byid' na: rure daqi: jung" pye' ge,. Naonhaung" airu: kad' ko" re wa naonhaung" phao: loe, nae" je yang: qug' li" nae". Qam: bo: ra" ASANG wa mung"dan: geim" re phyo' qheim" pye' nae" myid: phyid' ra" khyo re ngo the' gyo" to: va".

²³Ngo ta" na: rure tae" gyo: ge,. Ngo yang naonhaung" re ta" na: rure nyang" za: tae" gyo" yu ge,.

²⁴Yo kad' zo: yaug khag' re: yao" yothaung: re abang mabyid maphaug' lo: qho: nae" aire manyhang" ca" genae".

²⁵Yao: wa myid re phaug' nyhang" bin we' mung: pajhi" we' sham: nhang: ru" ra" ao: pho' shi: jham re yao: lhaung" sin" ra". Yao: wa jung: gaug we' bale gaug re ajin jin kad' yang: sin" ra". Yothaung: gyeim: mae myug: shi: gatau jham re yao: sin" ra".

²⁶ASANG: yang yao: re mho" to: va" ruyang yao" mau" re khoru: zaui: nae" yao: ba: ra".

²⁷Pajhi" shi: we' sham: nhang: shi: re be; yu nae" qhid' mae" yao: wa khonhae" re: thaung kang ala: re maci ngad: ra". Ai: atha" yao: wa dau ga" ra" vose: aseim: re ci: ra".

²⁸Yao: wa aire nao: yang: jung: gaug re mazai" qheim" ngad: ra". Gaug ce' mapyag' khyad' lo: lhin" keim" lai yang: khoru: nao: nae" rure yao: ba: ra".

²⁹Ce: pha,jhi" alhab' wa qam: bo: ra" ASANG mae" joe" li" ru ngad: ra". Mao"So: yang yaung: to" ra" mau" wa pha,jhi" bo: ra". Aijham wa khonhae" re: aung myaug: ako".