Read Maru ESAIA 29 Bible Online

ESAIA 29 - Maru bible

ESAIA 29

¹Mao"So: phan ngad: ra" Yerusalem wa jeim" ava". Davi nho: jamu vogaung: wa jeim" ava". Dazin thao dazin zo: shaug' poe we' poe jham kad' mung: lai: lo" nhao ge,.

²Ai: thao Mao"So: phan ga: mhang" ra" vogaung: dao mae Mao"So: wa qug: khai: kyi" khyag' ru boe" nhao nae". Ai: mae kaug' ngug yang: ngug byid gyo" na: li" genae". Vogaung: geim" wa sa: za: ngad: ra" phan we' dakhyo: ngad: li" nae".

³Mao"So wa vogaung: re khe' zin" li" nae"- vang" to: mung: lhaug' na: li" nae".

⁴Yerusalem wa sabyo dadau: myid khug mae" dao: jhau nae" phin" na: ru we' dakhyo: phalhug bam mae" dao: so' so' na: ruwe' dakhyo:- ngad: li" nae".

⁵Yerusalem we"- nao re khe' zin: ko" ra" taung bug khyo byu qe alhab' wa phalhug ru: cidao" lo" ru qhug' mung: yao: bam: byodin byosho: gyaug ko" ra" gyezo: qe wa khovho we' dakhyo: dao" lo" byaug: li" genae".

⁶Qam: bo: ra" ASANG wa nyag din taung" pe" mamyid: to" ru: thin: ra" mug: gyug: la qam" we'- myid lab: lab' ruyang nao re khyad' yu: li" nae". Yao: wa la qam" we' myi: re nhao: ke' li" nae".

⁷Ailao" Mao"So: phan vogaung: re khe' zin" na ko" ra" byumyu" qenho: gyezo: qe alhab' wa yao: bam nho: shae lhe jham alhab' we' gyezai jham alhab' ja: khao: ngo" wa yab mo, we' dakhyo: myi" re qhug' myid: ra" daja: ja: we' dakhyo: baui" lo" byaug: li" genae".

⁸Yerusalem re khe' zin: nae" qhid' mae" zang" ham: na ko" ra" byumyu" alhab' wa vae: moe' kyaug' na: ra" byu dayaug zo:ve zo" na: ga: yab mo, mo, mung: so" li" re vae moe' ra" yaug we' dakhyo:- qid shab' yang: shid: lo" na yaug qid shaug' na: ga: yab mo, mo, mung: so" li" re khyaung: ho: jo, yaug we' dakhyo: ngad: li" nae".

⁹Xo' yang: ago doe; na wa,- xo' yang: myo, jid: na wa,- sabyi qang: mabo lo: yid: na: wa,- dazo, re: mashaug' lo: lang" be; lhau wa,-

¹⁰ASANG wa nao re yab nug nug nhao mung: yab mo" myid' sho' yab nhao nae" jin" jin" kad' to" ava". Lapa qe wa mung" byu qenho: myo, jid' jham ngad ang: ako". Ngadqere: Mao"So wa yao: bam re myo, thab' to: byid' ra".

¹¹Lapa dao: we' sin" ra" ve, lho khao: ngo" nho: lajheim: wa naonhaung" maba: gyo: sho' nyham" to" li" nae". Aiwa dazid thaung" to" ra" mugsug' dang: we' dakhyo: ngad: li" nae". Ba: nghe' ra" byu dayaug yaug jhao" aire nghe' kyo: nae" yemho' re- yao: wa aire dazid thaung" to" ruyang yao: maqo" nghe'- ga: ta" li" nae".

¹²Maba: nghe' ra" byu dayaug yaug jhao" aire ciye: yang: naonhaung" re nghe' kyo: nae" yemho' re- yao: wa khoru: nghe' nae" yao: yao: maba ga: tau" li" nae".

¹³Ce: byumyu" wa ngore caung:pa" byid' ga: ta" ako". Ngadqere: yao: bam: dao: jham wa lajheim: mabo ngad: ako". Yao: bam: nhag' lam: wa gatau mae ngad: jo; ako". Yao: bam: caung:pa" thung" wa akeim ngad: ra". Ngadqere: yao: bam: laui laui za: myid: beim" ra" xao su byu: tarha" we' thung" li jham za: ngad: ra".

¹⁴Aimung: ngo wa mamyid: to" ra" ja: dalam: thao dalam" yang yao: bam re din: mug' nhao nae". Pha,jhi" bo mo, re ago boe" lo" nhao nae". Yao: bam: ba jhao: ru alhab' wa aje ngad: li" nae"- ga: ASANG ta" ra".

¹⁵ASANG mamyao losho' yao: bam: myid: yaung: ra" khyo re nyham" to: mo, wa jeim" avako". Yao: bam wa yao: bam: mau" zo" re anyham: avho' mae kad' mung: yao: bam re khag' re: mathe' myao- yao: bam kad' na: rure khag' maba nae"- ga: jho: ako".

¹⁶Yao: bam wa ja: khao: ngo" re atug' khyo" kad' pye' ako". Ug' kad' yaug we' zhogam: myid wa kholam: je: akhyag: i? Zai daja: ja: wa- kad' to: yaug re ngore nao: yang kad' to" ru mangad:- Mangad: lao" nao pe" kad' na: rure nao maba ein: yao: re gai: ta" nae" i?

¹⁷Dao: khyo: mae- sag' mo" yo wa mataung" myao" re yo boe" lo mung:- yo wa sag' mo" yo boe" lo" li" nae"- ga: ta" ru we' dakhyo: ngad: ra".

¹⁸Ai: ba na joe" lo lao"- nojid qe wa mugsug' paug' re thoe qi: we' nghe' rure the' gyo" li" nae". Mug: cad' yo mae na: jo; ra" myo, jid wa yao: bam: myo, bung" li" mung: myao: li" genae".

¹⁹Myaung sho: mung: nhag' lam: nyham: khyo" ra" mo, wa Israel nho: gyang" lho" ra" Mao"So ASANG: yang byid' ra" ngaui pyo" rure dam: qhug' yu: li" genae".

²⁰Aiwa su gaje qere zag zo: mo, we' ASANG re maphug' makhyad' kad' qhu" mo; nho: lo" thao" ru ngad: li" nae". Qobo jab qe yaug khao: ngo" re se' tam" pye' nae".

²¹Mao"So wa su gaje qere ta" phoe mo, yug: qo" mo, re qobo dae majoe" lo: tam" pye' mo, din: man: mo,- tarha" din nyang: ru maqo" yu sho' mhug' dao: ta" mo, re se' tam" pye' li" nae".

²²Aimung: ana"- qug: khai: mae" Abraham re khyad' yu yaug ngad: ra" Israel nho: Mao"So ASANG wa- nga" byumyu" we"- naonhaung" wa nga: yeim: ru maqhug' lo: genae". Naonhaung" myo,khung: wa qho' phau: yang: masham lo: genae".

²³Ngo naonhaung" re byid' nae" ra" zoshao qere naonhaung" the' myao gelao"- ngo Israel nho: gyang" lho" ra" Mao"So ngad: rure naonhaung" lhang: yu: li" genae". Naonhaung" wa ngore nga: yhe' byid: mung: gyaug phug' li" genae".

²⁴Ago qe wa ba: gyo: nae" zhao: yu: li" genae". Khonhae" re: nyung mo, wa mho" byid' rure ngaui: li" genae".