Read Maru ESAIA 3 Bible Online

ESAIA 3 - Maru bible

ESAIA 3

¹Ana" qam: bo: ra" ASANG ngad: ra" ASANG wa- mung" byu qe khug ngha: na ko" ra" ja: khao: ngo" we' yaug khao: ngo" re Yerusalem we' Yuda mung" mae" yu: pye' nae" seim" ava". Yao: wa yao: bam: zo:ve we' shaug' qid-

²Yao: bam: myao: jham- gyezo: qe tarha" agyi qe -lapa qe- lo, kyo' qu" mo,- mung"dan: au: jhaung qe.

³Gye we' mung" eib au: jhaung zug: qe- mung"dan: akhyo kad' mo, man:dan: vha" mo, yaug khao: ngo" re yu: pye' naeva".

⁴ASANG wa yauggai nau" qeyang mung" byu re eib nhao: li" nae".

⁵Byu yaug khao: ngo" wa gaje yaug khao: ngo" re cab' zo" li" genae". Apyad ngai mo, wa yao: bam: apyad qi: mo, re maphug' genae". Byugao: qe wa yao: bam: adao mae" mo, re maphug' genae".

⁶Amyu" kaung dakaung mae bobo mo, wa yao: bam mae" dayaug re khyin: yu mung:- yao: re- nao daja: khalhao" ve, mung: ce: qug: khai: yo mae ngonhaung" nho: au: jhaung kad' byid: la,- ga: ta" ra" ayo, joe" lo: li" nae".

⁷Ngadqere: yao: wa ngore dakad' nhao gela,- naonhaung" re ngo maqo" bao" byid:- ngo wa zo:ve re:- mai bau: re: pe" maqo"- ngore naonhaung" au: jhaung dakad' nhao gela,- ga: phaug' tau" li" nae".

⁸Ngad va"- Yerusalem wa dam" ava". Yuda wa gyang: gyoe; gyo" ava". Yao: bam jhau: rure we' kad' ru ja: khao: ngo" wa ASANG re gye kad' ako". Yao: bam wa Mao"So re de: de: za: roe" pye' ako".

⁹Yao: bam: myo,nho khyin: ru wa yao: bam re gye doe; li" nae". Yao: bam wa Sodom byu qe de: de: za: qobo kad' ko" ru we' dakhyo: qobo kad' ako". Yao: bam dam" byaug: ako". Ai: rure yao: bam yao" dao mae kad' yu: ako".

¹⁰Din:man: mo, wa ngaui pyo" li" genae". Yao: bam: qhid' mae" ja: khao: ngo" ngaui lho" li" nae". Yao: bam wa yao: bam zaui" ra" mau" athao qo" kham zo" li" genae".

¹¹Ngadqere: makhyang: mo, wa dam" byaug: ako". Yao: bam: yang su gaje qere kad' lo: ru wa ana" yao: bam re dam: kad' byid' ru qhug' li" genae".

¹²Ngaui jhid' zo: mo, wa byumyu" re zag zo" ako". Yao: bam: jhin sang qe wa yao: bam re mhug' zo" ako". Nga" byumyu" we' nao khogau: khyo maba: tug' lo losho' naonhaung" au: jhaung qe wa naonhaung" re khyonghung: jhui" nghung" ako".

¹³ASANG wa yao" mau" re ta" nae" jin" ava". Yao" byumyu" re dao: kho' nae" jin" ava".

¹⁴ASANG wa yao" byumyu" lau: de, qe we' au: jhaung qere dao: kho' nae" jhui" lo: ra". Yao: wa ceru: ga: qobo zhaug' ra". Naonhaung" wa sabyi khyae jham re lhad' zo" ako". Naonhaung" yham wa myaung sho: mo, mae" lhad' yu: ra" zai jham ke' pyang" to" ako".

¹⁵Naonhaung" wa nga" byu qere deim" khyoe' pye' nae" we' myaung sho: mo, re cab' zo: nae" akhang" maqo" ngad: ako". Qam: bo: ra" ASANG kho:kham ngo ta" to: va" ga: qobo zhaug' ra".

¹⁶ASANG ta" ra"- ai wa qu" ge,- Yerusalem myiqe: qe gyai ngad beim" ako" lhe"- yao: bam wa myo, khung: nghao" ci yang: khyo su" ako". Yao: bam wa khonhae" re: nghao" mo, ngad: ako". Yao: bam wa langa: khyo" bye ce: mung: khumyo, mae" akheim" jham wa sin: sin: ga: su" myhang" ako".

¹⁷Ngadqere: ngo wa yao: bam re qobo dae byid: nae". Ngo wa yao: bam: au: re qaug: pye' byid: mung: au: pyad' kad' to: byid: nae"- ga: ta" ra".

¹⁸Yao: bam gyai ngad beim" ra" ja: ngad: ra". Yao: bam: khumyo, mae au: mae- lang zang: mae-

¹⁹Lo, jhag' mae- shaung zai jham ja: khao: ngo" re Yerusalem myiqe: qemae" ASANG: yang yu: pye' byid: nae" ayo, joe" li" na: ra". Yao: bam yao: bam: myo, khung: nghoe' we' yao: bam: mang jham-

²⁰Yao: bam: lo, mae we' phyid' dam: mae ve; ci ko" ra" khan" pha jham-

²¹Yao: bam: lo, nyhug' jham mae pin" ci:ra" lo,pin: jham we' yao: bam: nho mae xaui" ci ko" ra" akheim" jham-

²²Yao: bam: bau: qhang- adao: bau:- bau: qi: jham we' ngaui thaung jham-

²³Yao: bam: langa: mai bau: jham- yao: bam: jhid: mo" pin: pha, jad- yao: bam: au: mae thab' ci ko" ra" au: thab' we' myo, khung: nghoe' jham re yu: pye' li" nae".

²⁴Sheim nae pyo: xau atha" bab sheim- phyid' cui: gai atha" taui: sham" phyid' cui: cui" li" genae". Yaung" ra" xae atha" yao: bam au: pyad' ngad: li" genae". Mai gai bau: gai atha" yao: bam mai jad: bau: jad: ve; li" genae". Yao: bam: yaung" shab: ru wa aqho' aqhid boe" byaug: li" nae".

²⁵Ngad va"- vogaung: mae" yauggai qe qam: bo: thao" ra" yauggai qe lhao" re: gyekhe' poe mae se' pye' qhug' li" genae".

²⁶Vogaung: kham jham wa kaug' yang: gyi: ngug: li" genae". Vogaung: yao: yao: re: myid gaung mae gaung pyad' zaung: jo; ra" myiqe: dayaug ru: boe" byaug nae".