Read Maru ESAIA 30 Bible Online

ESAIA 30 - Maru bible

ESAIA 30

¹ASANG ta" to" ra". Yuda re eib: ra" mo, wa jeim" avako". Pe"mung:ga"re yao: bam ngore gye kad' tau: lhan" ako". Ngoyang mayaung: to" ra" mau" re yao: bam cao" kad' ako". Nga" myid o: rure ngag yang: myid vang" mugsug' jham re lo, xam: tung" ako". Qobo daja: bin daja: abam azao kad' to" ako".

²Nga" pha,jhi" byid: dao: re mamho' lo:- bao" thaug' khyo qhid' mae" yao: bam Egutu khyo ye" ako". Yao: bam wa Egutu byu qeyang yao: bam re gug: gam byid: nae" re khug ngha: ako".

³Ngadqere: kho:kham wa yao: bam re bao" thaug' nae" qam: mabo nae". Egutu nho: gug: gam byid' ru wa kyi" khyag' rumae thao" lo" li" nae".

⁴Yao: bam: mug: va: lagyo: qe Egutu mae" Zoan we' Hane vogaung: mae joe" na: jo, gesho' ngadqere:-

⁵Yuda byu qe wa yao: bam myid: lao" au: re lhaui" pye' byid' ra" byumyu"- lam maga" ra" byumyu" re yao: bam khug ngha: lo: rure mamyid: thao qo" li" genae"- ga: ASANG ta" ra".

⁶Ce wa mug: thao shad' din"pyad' yo mae" gug'nyhug' jham we' sin" ra" Mao"So: mungdao: ngad: ra". Aiwa mug: va: lagyo: qe wa gyaug ci" ca" ra" mung"dan: re su" lai: ye" ako". Aimae khang khyi jham daug thin: ra" lhao maui jham- dao" lhau: ra" mao jaung: jham na: ako". Yao: bam wa bao" thaug' khyo pe" daja: re: maqo" byid' ra" byumyu" qhid' mae" phug' de; ra" jhaung qhu" jham re loze we' gola:u dao mae yao: bam seim" vin: ako".

⁷Egutu byid' ra" bao" thaug' khyo wa pe" akyu" mabo ngad: ra". Aimung: ngo wa Egutu re pe" dae mate' ra" mao jaung: ein: mang zo: mhang" byid: va"- ga" ru ngad: ra".

⁸Yao: bam khonho" makhyang" ra" mo, ngad ko" rure khonhae" re: tung" xam: boe" jo, nae" qhid' mae" yao: bam pe" ru" ra" byumyu" qe ngad ko" ra" khyo re mugsug' paug' dapaug' mae tung" to: nae" Mao"So ngore ta" ra".

⁹Yao: bam wa khonhae" re: Mao"So re gye kad' tau: lhan" ako". Khonhae" re: mhug' ako". Khonhae" re: ASANG: mho" shid' khyo re tae" gyo: nae" ha: pye' mo, ngad: ako".

¹⁰Yao: bam wa lapa qere sae za: na nae" ta" ako". Yao: bam wa jo: ra" khyo re ngonhaung" re dajhau la,- ngonhaung" gyo: nug: ja: re ta" kyo: la,- ngonhaung" myid: jho: yu: ru jham mae xo' na nhao la,.

¹¹Khyo qhui: wa,- ngonhaung" khyodang mae dana: xug' to:- ni" Israel nho: gyang" lho" ra" Mao"So: akhyo re ngonhaung" manug: gyo:- ga: ta" ako".

¹²Ngadqere: ce wa Israel nho: gyang" lho" ra" Mao"So ta" ra" dao: ngad: ra". Aiwa naonhaung" wa ngo ta" ra" dao: re pe" shui manho lo:- aqan alan we' mhug' pyag' rure khug ngha: ako".

¹³Naonhaung" qobo qo" ako". Naonhaung" wa gyae: khu dung: ra" myhao: ra" vang khyae bao we' dau: ako". Naonhaung" wa nyag din taung" gyang: gyoe; lo" li" genae".

¹⁴Naonhaung" wa myi:gyoe: laung gai: gaug: yu: ra" qhi" acug' mabo losho'- qid thug' mae" qid gai: khau" pye' ra" qhi" acug' mabo losho'- dae xo sho' go; man" byaug: ra" zhogam: ug' we' dakhyo: ngad: li" nae"- ga" ru ngad: ra".

¹⁵Israel nho: gyang" lho" ra" Mao"So ASANG kho:kham wa yao" byumyu" re- tug' lo mung: sae za: ngore khug ngha gela,. Ailao" naonhaung" wa qam: bo mung: gug: gam qo" yu genae"- ga: ta" ra". Ngadqere: airu: kad' nae" naonhaung" ha: pye' ako".

¹⁶Ai: atha"- tao: qao: ra" myao: jham re zaung yang: naonhaung" gyevo qe: lo, mae" phao: loe, nae" naonhaung" seim" ako". Naonhaung" jo: ako". Phao: loe, khyo wa naonhaung" kad' ca" ra" mau" ngad: li" nae". Naonhaung" myao: jham wa gyai tao: qao: ga: jho: ako". Ngadqere: naonhaung" re cao" khe' mo, wa je: qao: li" nae".

¹⁷Gyevo gyezo: dayaug re naonhaung" the' myao gelao". Naonhaung" ataung yaug khyo" tao" phao: lo" li" genae". Gyezo: ngo" yaug wa naonhaung" alhab' re tao" phao: lo" gesho' qo" kad' li" genae". Bug gaung au: mae" khyi daung" zang mae" je yang naonhaung" gyetab mae pe" madang nae".

¹⁸Ngadqere: ASANG wa naonhaung" re nhag' khyag' yu nae" lao" na: li" nae". Yao: wa khonhae" re: jo: ru kad' yaug ngad: ruyang naonhaung" re nhag' khyag' byid: nae" jin" jin" ngad: ra". ASANG re khug ngha mo, wa ngaui lho" ako".

¹⁹Yerusalem mae na ko" ra" byumyu" qe- naonhaung" wa khonhae" re: makaug' ngug lo: genae". ASANG wa nhag' khyag' myid bo yaug ngad mung: bao" thaug' yu nae" naonhaung" mho' yao: au: yao:- naonhaung" re tau: byid: nae".

²⁰ASANG wa naonhaung" re qug: khai" ra" ayo, jham khyo" su" lai nhao nae". Ngadqere: yao: yao: wa naonhaung" re mho" shid' nae" qhid' mae" aitau mae na: jo; li" nae". Naonhaung" yao: re qho maca" lo: genae".

²¹Naonhaung" lo, yo- lo, kaung: shad' khyo khyonghung: nghung" lo" ko" re naonhaung" nhaung thao" mae- khyodang cekhyo ngad:- aire cao" ge,- ga: ta" ra" yao" thoe re naonhaung" the' gyo" li" genae".

²²Ngaui we' qhang: yang thab' to" ra" naonhaung" so alho jham re naonhaung" yu: yu mung: tho"- ngo mamyao: ra" khyo- ga: hug' yang: basad re we' dakhyo: shalhaui" pye' li" genae".

²³Naonhaung" nho: myug: shi: jham re sin" ke' khao: ngo"- aijham re yaug nhao nae" qhid' mae" ASANG wa mug: qu nhao mung: myo: sho' yad: yu nhao nae". Naonhaung" nho: gug'nyhug' jham wa mhin: gyo, jao: magan: mago" qo" li" genae".

²⁴Naonhaung" yo re phaug' ra" loze we' nung: jaung lo: jham wa gai: thao" ra" mhin: the' zo" li" genae".

²⁵Naonhaung" nho: gyevo qenho: gyetab jham sang: yu qhug' mung: yao: bam: byu qe se' pye' qhug' ra" ba na mae bam khao: ngo" -bug gaung khao: ngo" mae" qid gyaung: zo: jham yug: thug' li" li" nae".

²⁶Lho" wa ba qhi" bao: li" nae". Nhad' ba bao: ra" bo" bao wa daba mae za: bao: ruru: ba wa ganhae" zho: ra" tho' nhad' zhao" je: zho: li" nae". Yao" byumyu" re yao: te' to" ra" dae khu jham re ASANG phacug' thab' byid: mung: gai byid' au:- cegu: alhab' boe" li" nae" ngad: ra".

²⁷ASANG: qam: so' we' phungbao wa va: mae" qo" the' myao: ra". Myi: we' myikhug' wa yao: nhag' yo" rure qhu" byid' ra". Yao: dao: jhau mung: yao" dao: kheim: jham wa myi: we' dakhyo: nga" ra".

²⁸Ja: khao: ngo" re pyaung" tai: lo" byaug: ra" qid gyui we' dakhyo: yao: wa yao" qhid' au: mae la re nhao: ke' ra". Aiwa byumyu" qere byo; qeim: lo" nhao mung:- yao: bam: makhyang" ra" myid: yaung khyo jham re thao" lo" nhao: ra".

²⁹Ngadqere: Mao"So: byumyu" naonhaung" wa gyang" lho" ra" poe myi mae naonhaung" kad' ko" ru we' dakhyo: ngaui pyo: mung:- nghaui"caung: li" genae". Naonhaung" wa Israel nho: gye vha yaug ngad: ra". ASANG: Caung:pa" Yham khyo khalhao: thoe re cao" yang: su" ye" lo" mo, qhi" yao: bam ngaui pyo" li" genae".

³⁰ASANG wa yaug khao: ngo" re yao" phung bo: ra" thoe re the' gyo: nhao mung: yao" nhag' jam: yo" ra" qam: re kham zo: nhao: li" nae". Myishae- jham no, thaui: thug' li"- lagqu khyo"- mug: mo" zang qu: li" nae".

³¹Asuri byu qe wa ASANG: thoe re the' gyo: mung: yao" qobo dae qam: so' re the' kham zo: gelao"- gyaug: din: pye' li" genae".

³²ASANG: yang yao: bam re alhang lhang dam: be, be, kad' khao: ngo" yao" byumyu" qe wa thung zang jham we' tang: jham xo' yang: be; nghaui" ru" ru ngad: li" genae". Asuri byu qere ASANG yao: gye zin" li" nae".

³³Ganhae" Asuri kho:sin" re ngha" nae" ra" khyeim" mo" myi: dajo, qo re jaung: to" ra". Aiwa no, mung: lu: ra" thao: myhao sho' zao: to" ra". Aire ngha" pye' nae" qhid' mae" ASANG wa myishae re mad: thug' ke' li" nae".