Read Maru ESAIA 31 Bible Online

ESAIA 31 - Maru bible

ESAIA 31

¹Egutu mung" khyo bao" thaug' ru yemho' ra" mo, wa jeim" avako". Yao: bam wa Egutu nho: gyetab qam: ngad: ra" myao: jham- myao: lhin" jham- gyezo: jham re ngha: ako". Ngadqere: yao: bam wa Israel nho: gyang" lho" ra" Mao"So ASANG re mangha ngad: ako". Bao" thaug' rure re: yao: re mamho' ngad: ako".

²Yao: pe" kad' na: rure yao: ba: ra". Yao: wa qug: khai: kyi" khyag' rure nhao: ke' byid' ra". Makhyang" ra" mo, re qobo dae byid: nae" we' aibam re gug: gam byid' ra" mo, re qobo dae byid: nae" yao" kyaug' nhin" ru jham re yao: boe" sho' kad' thug' ke' ra".

³Egutu byu qe wa so jham mangad:- yao: bam xao su byu qeza: angad: ako". Yao: bam: myao: jham wa yui myao: jham mangad:- ASANG mau" zaui" ke' lao" qam: bo: ra" byumyu" mung"dan: wa gyoe; gyo" lo" mung: ai: yang bao" thaug' byid' ra" qam: nang" ra" byumyu" mung"dan: wa gyo" lo" byaug: ra". Shid' lam" geim" phyo' qheim" pye' ru qhug' li" genae".

⁴ASANG wa ngore- yao zam: mo, khonho" gyi: hug' hug'- gug'nyhug' re bin" se' ra" khang khyi re yao: bam maqo" kyaug' tao" ke' ngad: ako". Airu: yao: Ziun bam re gug: gam: na: ra" qam: bo: ra" ASANG nga" lo, mae" khag' re: maqo" tam" pye' ngad: ako". Ngho' nau" jham re gug: gam byid: nae" ngho' sad' dao mae dao" lhang: lhau: ra" ngho' we' dakhyo:- qam: bo: ra" ASANG ngo wa Yerusalem re gug: gam byid: mung: gye vha byid: nae"- ga: ngore ta" ra".

⁶Mao"So wa- Israel byu qe we"- nao wa ngore gye kad' mung: qobo shad' lhoe" ava". Ngadqere: ana"- ngojhao" dam: tug' lo ri:-

⁷Ngaui we' qhang: yang naonhaung" kad' to" ra" qobo boe" nhao: ra" so alho jham re naonhaung" alhab' mo, shapye' pye' genae" ra" ayo, joe" lo: li" nae".

⁸Asuri wa gyekhe' poe mae phyo' qheim" pye' ru qhug' li" nae". Ngadqere: xao su byu: qam: so' yang mangad: nae". Asuri byu qe wa gyekhe' jao: mae" tao" phao: lo" li" genae". Yao: bam: zolau: qe wa jeim kad' pye' ru qhug' li" genae".

⁹Yao: bam: kho:sin" wa gyaug yang: tao" phao: lo" li" nae". Gyezug: qe wa saung" gyaug geyang: yao: bam: gyekhe' khyi jham re shapye' to: co' li" genae"- ga: Yerusalem mae caung:pa" byid: qhug' ra" ASANG we' ngaui" xeim: qhid' mae" myi:khyeim" re ngha" to: byid: qhug' yaug ASANG ta" to" ava".