Read Maru ESAIA 32 Bible Online

ESAIA 32 - Maru bible

ESAIA 32

¹Daba mae jhaug' zaug za: eib: ra" kho:kham dayaug we' tarha" din nyang: ra" khyo" eib: ra" byumyu" au: jhaung qe na: li" genae".

²Yao: bam mae" yaug khao: ngo" wa la mae" khug: na jo, qo- la qam" mae" phao: gug' jo, qo we' dakhyo: ngad: li" genae". Yao: bam wa din"pyad' yo mae yug: ra" qid zo: gyaung: we' dakhyo:- pyad' lad sade" ra" mug: myid jo; ra" laung: mo" baui aqab we' dakhyo: ngad: li" nae".

³Yao: bam: myo, jid'- nokhye' jham wa myaung sho: mo; qhid' mae" phung" to: byid' li" genae".

⁴Yao: bam wa nhag' lam: malang" lo: genae". Yao: bam wa ba: gyo" ru we' mau" zaui: mung: yao: bam ta" nug: ra" lajheim: re ta" li" genae". Ago re nga: yhe' byid: tho' yaug khyo" khag' majho- makhyang: yaug re din:man: yaug ga: khag' mata" genae".

⁶Ago wa ako" asho: dao: jhau mung: makhyang" ra" lo, mau" kad' nae" myid: thug' ke' ra". Yao: kad' ru we' yao: ta" ru jham wa ASANG re roe" ru ngad mung: yao: wa vae: moe; mo, re khonhae" re: mazho:- qid shab' mo, re pe" re: mabyid: jhaug' ngad: ra".

⁷Byugo wa makhyang: yaug ngad mung: makhyang" ra" mau" jham re kad' ra". Yao: wa myaung sho: mo, re byo; qeim nhao nae" mhug' dao: khug' ta" yang: yao: bam qo" yu ang: ra" akho: akhang" re tam" pye' byid' ra".

⁸Ngadqere: nga: yhe' byid: tho' yaug wa din: din:man: man: kad' mung: jo: rumae tang za: ye; jo; ra".

⁹Myan myan za: kao so' daui: na mo, myiqe: naonhaung" we"- myid damyo: ge,- ngo ta" ra" dao: re tae" gyo: ge,.

¹⁰Ana" naonhaung" nhag' dag: re nhag' dag genae". Ngadqere: sao nhag' ceyo, mae naonhaung" nhag' lam: thao" genae". Pe"mung:ga"re naonhaung" phyo' zhang: yu nae" sabyi shi: majo, yang: ngad nae".

¹¹Naonhaung" wa myan myan za: kao so' daui: lo: ako". Myid mamyo: ngad: ako". Ngadqere: ana" gyaug yang: ko, ko, nin" ge,. Naonhaung" mai bau: jham re khyad' pye' mung: naonhaung" phyid' dam: mae mai jad: yang" ci ge,.

¹²Kaug' ru we' naonhaung" qao gao mae theim ge,. Pe"mung:ga"re myid xau gai: ra" yothaung: jham we' sabyi khyae jham wa phyo' qheim" pye' qhug' avako".

¹³Zau: bao we' zau: kyin gae jham wa nga" byumyu" qenho: mug: myid mae yaug: jo; ra". Byu jham ngaui pyo" na ko" ra" yham jham alhab' qhid' mae" we' kao so' byang" sho' bo: ra" vogaung: qhid' mae" ngug byid gyo" ge,.

¹⁴Kho:kham kho" re lhao" re: shapye' to: co' ru qhug' mung: vogaung: mo" wa bin sho' cae: jhug tag ngad: byaug: li" nae". Zaung" to" ra" yham jham we' gyetab jham wa apyad ato mae byo; qeim: jo; li" nae". Seyo: loze jham wa aimae du" lhau mung: yao jham wa mhin: gyo, jao: qhug' ako".

¹⁵Ngadqere: Mao"So wa yao" byo re- ngonhaung" jhao" dalhang dam: nhao: ke' byid' li" nae". Mug: myid agao: wa myid xau gai: li" mung: yothaung: jham wa gaug zo myo: sho' thug' li" nae".

¹⁶Mung"dan: khyi" khao: ngo" mae din:man" ru we' tarha" din nyang: ru boe" jo; li" nae".

¹⁷Byu yaug khao: ngo" wa jo: rure kad' li" genae" ngad: ruyang ngaui pyo: yaug yo: ru we' gug: gam: ru apyad ato ngad: jo; li" nae".

¹⁸Mao"So: byu qe wa myid myo: myid laug: ru majo, nae". Yao: bam: yham dinkhu: jham wa ngaui pyo" ru we' gug: gam qo" jo, nae".

¹⁹(Ngadqere: lagqu wa sag' mo" yo mae gyo" mung: vogaung: re phyo' khyo" pye' li" nae".)

²⁰Qhovo qhoshi: jham: qhid' mae" qid magan: mago" qo" mung: loze jham we' nung: jham: qhid' mae" gug: ra" mhin: gyo, jao: khyi" khao: ngo" mae qo" ra"- yaug khao: ngo" wa ngaui lho" ra".