Read Maru ESAIA 40 Bible Online

ESAIA 40 - Maru bible

ESAIA 40

¹Mao"So wa nga" byumyu" re nhag' tang" byid: wa,- yao: bam re nhag' tang" byid: wa,-

²Yerusalem byu qere qam: byid: wa, yao: bam dayin dayo: qug: khai: kham zo" ru ga" va". Ana" yao: bam: qobo jham re khyad' pye' byid: va" khyo yao: bam re ta" kyo: wa,. Ngo wa yao: bam qobo alhab' qhid' mae" byang" sho' yao: bam re qobo dae byid: va"- ga: ta" ra".

³Thoe dathoe wa ASANG: qhid' mae" din"pyad' yo mae khyodang nyhang" byid: ge,- Ngonhaung" Mao"So qhid' mae" din"pyad' yo mae khyo sho' byid: ge,.

⁴Lao: khaung: khao: ngo" re bam" ge,- bam khao: ngo" re tae" ge,- bug gaung jham wa- jao dae boe" li" mung:- abau" akhyad' mung: ra" mung"dan wa dae lo" li" nae".

⁵Ailao" ASANG: phungbao re qhu" byid: mung: xao su byu alhab' aire the' myao: li" genae". Ceru re ASANG yao: yao: dao:so: byid' to" ava"- ga: hug' na: ra".

⁶Thoe dathoe wa- mungdao: re ta" hau: wa,- ga: hug' ra". Ngo pe" ja" mungdao: re ta" hau: nae" i? ein: myid' ke'. Ailao"- ai: thoe wa xao su byu qe alhab' wa myo, gae we' dau: ra" khyo re ta" hau: wa,. Yao: bam wa seyo: bin: jham tho' myao" sho' maqo" myao" jo,.

⁷Aijham: dao khyo ASANG: yang la hug' nhao: ke' lao"- myo, gae wa jhoe' lo" mung: bin: jham wa sham: lo" byaug: ako". Byu qe wa myo, gae tho' maqo" kham ko" ngad: ra".

⁸Ngad va"- myo, gae wa jhoe' lo" mung: bin: jham wa sham: lo" byaug: ra". Ngadqere: ngonhaung" nho: Mao"So: dao: wa apyad ato mae gang" tang: jo; ra"- ga: ta" ra".

⁹Yerusalem we"- myhao: ra" bam dao khyo do, lo" mung: lau dao: gai re ta" hau: wa,- Ziun we"- thoe qi: we' zag: hug' mung: lau dao: gai re hau: wa,. Ta" thug' wa, dagyaug wa,- Yao: bam: Mao"So joe" li" na: ra" khyo Yuda vogaung: jham re ta" kyo: wa,.

¹⁰ASANG kho:kham wa qam: so' we' eib nae" joe" li" na mung: yao" yang khyad' yu: to" ra" byu qere yao: we' daga" jhui" li" na: ra".

¹¹Yao: wa yao zam: yaug we' dakhyo: yao" yao kyaung" re gun caung byid' li" nae". Yao: wa yao nau" jham re zhang: yu mung: yao" lo, mae aijham re vo; li" nae". Yao: wa aibam: yao: myhi" jham re nau" nhae" za: jhui" lo" ra".

¹²Nammugdara re lo, vo: khug mae khag' qo" ka" nae". Yao" lo; yang mug:gaung re qo" ka" i? Myid gaung mae" myid zhai: re keim mae khag' qo" ke' ci: i? Bam we' bug gaung jham re jao mae kai: yang: qo" lag: i?

¹³Pe" ja: kad' nae" rure ASANG re khag' qo" ta" i? Yao: re khag' qo" mho" byid' i? Yao: re pha,jhi" khag' qo" byid' i?

¹⁴Ba nae" we' ba: gyo: nae" qhid' mae" we' mau" jham re khoru: kad' aung: ra" khyo re zhao: yu nae" qhid' mae" Mao"So wa khag' we' byin phyo: jho" qham: ra" i?

¹⁵ASANG: qhid' mae" byumyu" mung"dan: jham wa pe" mangad:- qid dazo, tho' pe" maje: va" ra" gagyo: kao" mug: jham wa bodan ru: seim" ra".

¹⁶Lebanon sag' mo" yo mae na ko" ra" gug'nyhug' alhab' wa ngonhaung" nho: Mao"So re ngaui" xeim: ngaui" byid: nae" malaug ngad: ra". Ainho: sag' gae jham wa myi: mad: te' nae" saung" nang" ako".

¹⁷Byumyu" qe wa yao" qhid' mae" pe" mangad: ngad: ako".

¹⁸Mao"So re khag' we' qo" tau" nae" i? Yao: khoru" yaug ngad: rure nao khoru: qo" ta" kyo: nae" i?

¹⁹Yao: wa lo, mau" zaui: yaug: yang kad' to: mung: to' lo,mau" zaui: mo; yang qhang: yang thab' mung: ngaui: yang zaung tao" kad' te' to" ra" so alho we' madau ngad: ra".

²⁰Qhang we' ngaui maqo" phoe' ra" yaug wa maqeim" man: lo" nae" ra" sag' re khyin: ra". Yao: wa magyang: lo" ra" khyao dau alho re kad' nae" qhid' mae" jhao: ra" lo,mau" zaui: yaug re qho: ra".

²¹Nao maba i? ganhae" nao re mata" ko" i? Mug: myid khoru: qhid: li" ra" khyo re nao magyo" qu" i?

²²Aiwa myid gaung atho'- mug:gaung atho' mae" yao" tao" khau" mae zaung: jo, yaug: yang phan" to" ru ngad: ra". O mae" byu qe wa phyaqug qhi" ngai: ako". Yao: wa mug:gaung re qe, kyo pin: lung: reru: phyid: ke' mung: na nae" zaung reru: kad' ke' ra".

²³Yao: wa kheim: so' qi" ra" zug: qere khyo" pye' mung: yao: bam pe" mangad losho' khyo" pye' ra".

²⁴Yao: bam wa agae ngai ru: za: bye; lo" mung: agyi: macin" ngad: ako". ASANG: yang la re nhao: ke' lao"- yao: bam kyaug' lo" byaug mung: khavho we' dakhyo: hug' tao" lo" byaug: ra".

²⁵Gyang" lho" ra" Mao"So re khag' we' qo" tau" nae" i? Yao: we' dau ru gatau khag' na: i?

²⁶Mug:gaung khyo tau: qu" ke' wa,- nao the' myao: ra" kyi jham re khag' yang phan" to" i? Aijham re gyetab dalam: reru: jhui" thug' li" yaug wa khonho" ngad: rure yao: ba: ra". Ce' khao: ngo" re mang mhang" ra". Yao" qam: so' wa gyai yao: qi" qhang: ra". Aijham mae" dace' re: khonhae" mabyaug: qu"-

²⁷Israel we"- Ni" qug: khai: re ASANG maba byid: ngad: ra". Nao dayin dayo: matarha" qug: khai: kham zo" rure pe" majho ngad: ra" ein: pe"mung: nao nyhung: na: i?

²⁸Nao maba i? nao magyo: shi i? ASANG wa apyad ato: Mao"So ngad: ra". Yao: wa mug: myid alhab' re phan" to" ra". Yao: wa khonhae" re: madug mamyaung: yao: myid: ra" khyo jham re khag' re: maba: gyo:-

²⁹Yao: wa qam: nang: mo, we' dug myaung: mo, re qam: bo nhao: ra".

³⁰Zolau: qe lhao" re: qam: nang" lo" mung: pho" qae qe wa mung: yang: lang" lo" ako".

³¹Ngadqere: bao" thaug' ru qhid' mae" ASANG re lam khug: na mo, wa yao: bam: qam: so' asag' dam: qo" li" genae". Yao: bam wa zeim baung: we' dakhyo: daung jham: yang dao" do, lo" li" genae". Yao: bam tao: gengad yang: re: mamyaung: genae". Yao: bam khyo su: gengad yang: re: qam: manang: genae".