Read Maru ESAIA 42 Bible Online

ESAIA 42 - Maru bible

ESAIA 42

¹ASANG wa- Ngo yang qam: bo nhao yaug ngad: ra"- ngoyang khyin: yu: to: mung: ngoyang o ngaui yaug nga" daui daui yaug cemae ngad: ra". Ngo wa yao: re nga" byo we' pyang" to: byid: va". Amung: yao: wa byumyu" khao: ngo" re tarha" din nyang: ru cili" byid' li" nae".

²Yao: wa hug' re: mahug'- thoe re: mato' nae". Hau" mo" khyo jham mae thoe qi: we' re: majhau nae".

³Yao: wa nghaug' jo; ra" qid phaung: yao: re makhyug' pye' nae". Kyi kyi mung: za: de; ra" myikaug' rere: mase' pye' nae". Yao: wa alhab' mo, re mabaui mabyo; tarha" din nyang: ru cili" byid' li" nae".

⁴Yao: wa myid: lao" ru malaui: nae" qam: re: magyug: nae". Yao: wa myid gaung dao mae tarha" din: nyang: rure zao: to" li" nae" mug: va: mae" mung"dan: jham wa yao" mho" shid' khyo re kao bau taung" lao" na: li" genae"- ga: ta" ra".

⁵Mao"So wa mug: khaung re phan" mung: aire phyid: nghoe' to" ra". Yao: wa myid gaung we' aimae na: gu: alhab' re lamyhung shaung: to" ra". Yao: wa kao so' byid: mung: ainho: byu qe alhab' re so' ke' byid' ra". Amung: ana" Mao"So ASANG wa yao" daui daui yaug re-

⁶ASANG ngo wa myid gaung dao mae tarha" din:nyang: ru kad' to: va" rure qu" nae" qhid' mae" nao re khai: yu mung: qam: so' byid' to: va". Ngo wa nao khyo" yang byu alhab' we' dao: thang" kad' nae". Ngo wa nao khyo" yang byumyu" mung"dan: jham re bo" bao cili" byid: nae".

⁷Nao wa myo, jid re myo, myao nhao: li" nae". Mug: cad' thaung: khug mae na mo, re lhoe' ke' byid' li" nae".

⁸Ngo dayaug za: ni" Mao"So ASANG ngad: gatau: so pe" daja: re: nga" phungbao mae maqo" bobo genae". Ngo wa so alho jham re nga" caung:khin" rumae mabobo nhao nae".

⁹Ngo lapa pa: to" ra" mau" jham ana" jab byang" li" ava". Ana" ngo wa yao: bam lhao" re: maboe" li" shiko" ra" khyo asag' jham khyo naonhaung" re ta" kyo: nae"- ga: ta" ra".

¹⁰ASANG re nghaui" caung: asag' we' nghaui"caung: caung: ge,. Mug: myid alhab' we"- yao: re nghaui"caung: khin" ge,. Pang:lai:: re gau: mo, naonhaung" we" yao: re caung:khin" ge,. Pang:lai:: mae" gug'nyhug' alhab' we"- yao: re caung:khin" ge,. Va" ra" mung"dan: jham we' aimae na mo, alhab' we"- Nghaui"caung: ge,.

¹¹Din" pyad' yo we' ainho: vogaung: jham wa Mao"So re caung:khin" vageshao:- Keda byu qe wa yao: re caung:khin" vageshao:- Sela vogaung: mae na mo, wa bam au: jham dao mae" ngaui" bau: yang: zag: hug' vageshao:-

¹²Va" ra" mung"dan: jham mae na mo, wa caung:khin" byid: mung: ASANG re phungbao byid: vageshao:-

¹³ASANG wa gyekhe' sulhe: dayaug we' dakhyo: gyekhe' nae" thug' lo" ra". Yao: wa gyekhe' poe qhid' mae" jin" jin" ngad mung: kao bau: na: ra". Yao: wa gyekhe' thoe zag: hug' ra"- yao: wa yao" gyevo qere gye kad' ra" yao" qam: so' re qhu" byid' ra".

¹⁴Mao"So wa- Ngo wa ayo, myao" sho' sae za: na: jo, va". Nga" byu qere dao: phyid ngo mabyid:- ngadqere: ana" wa mau" zaui: nae" ayo, joe" lo: ava". Ngo wa zo:khau: ra" myiqe: ru: zag: hug' ra".

¹⁵Ngo wa bug gaung jham we' bam jham re phyo' qheim" pye' mung: myo, gae we' sag' gae jham re kyaug' lo" nhao nae". Ngo wa qid gyaung: lao: khaung: jham re din"pyad' yo kad' pye' mung: qid tham: qid jham re kin" ho: lo" nhao nae".

¹⁶Ngo wa nga" byumyu" myo, jid qere yao: bam khonhae" re: masu" qu" ko" ra" khyodang jham khyo" jhui" lo" nae". Ngo wa yao: bam: mug: cad' re bo" bao boe" nhao nae". Seyo khyodang re yao: bam: qhid' au: mae khyojhad' boe" nhao nae". Cejham wa nga" dao:so: jham ngad mung: ngo wa aijham re manghung: losho' phug' cao" nae".

¹⁷So alho jham re lam khug mo, alhab'- khyao dau sulho jham re yao: bam: so jham ga: yao mo, wa qho' phau" ru we' nga: yeim: ru qhug' li" genae"- ga: ta" ra".

¹⁸ASANG wa- nojid: ra" nga" byu qe we"- tae" gyo: ge,- myo, jid qe naonhaung" we"- te' te' za: qu" ge,.

¹⁹Nga" daui daui yaug tho' myo, je: jid yaug khag' na ko" i? Ngo nhao: ke' ra" nga" lagyo: tho' je: no: jid yaug khag' na ko" i?

²⁰Israel we"- nao wa myo: sho' re myao: ava". Ngadqere: ai wa ni" qhid' mae" pe" lajheim: bo: i? Nao wa gyo: nae" no: khye' qo" ra". Ngadqere: gaigai: yao: nao pe" gyo: va" i? ga: ta" ra".

²¹ASANG wa khyad' yu nae" kao bau: ra" Mao"So ngad: ra". Aimung: yao" tarha" jham re we' mho" shid' khyo jham re yao: nga: yhe' mung: aijham re yao" byu qeyang nga: yhe' byid: nhao nug: ra".

²²Ngadqere: ana" yao" byu qe wa phyo' zo" pye' qhug' lo gemung: yao: bam wa dung: gyan: mae pyid' lhaung" to: qhug' jo; ako". Thaung: jham: khug mae nyham" to: qhug' ako". Yao: bam wa lhad' zo" ru qhug' mung: phyo' zo" pye' qhug' ako". Yao: bam re li" khyad' yu nae" khag' mana ngad: ra".

²³Naonhaung" mae" khoyaug cere tae" gyo: genae" i? Ana" mae" thoegu: naonhaung" nyang" za: tae" gyo: genae" i?

²⁴Israel re lhad' zo: mo; lo, khyo khag' ab: pye' byid' ra" i? Aiwa ngonhaung" yang gye kad' yaug ASANG yao: yao: ngad: ra". Yao: ngonhaung" re kao so' daui nhao nug: ra" khyo" ngonhaung" kao so' madaui- Yao" yang ngonhaung" re byid' to" ra" mho" shid' khyo jham rere: maphug' cao"-

²⁵Airumung: yao: wa ngonhaung" re yao" nhag' yo" ra" qam: so' re kham zo: nhao: ra". Gyekhe' poe nho: aqan alan mae dayin dayo: qug: khai: kham zo: nhao: ra". Yao" nhag' jam: yo" ru wa myi: we' dakhyo:- Israel mung" geim" re nga" lo" byaug: ra". Ngadqere: pe" boe" na: rure ngonhaung" khonhae" re: maba- Ngonhaung" wa aimae" dajhid' re: pe" mazhao: yu.