Read Maru ESAIA 43 Bible Online

ESAIA 43 - Maru bible

ESAIA 43

¹Israel we"- nao re phan" to" ra" ASANG wa dagyaug wa,- ngo nao re khyad' yu nae". Ngo wa nao re mang lao: yang: khai: to: va"- nao wa nga" mae" ngad:-

²Nao qid no, khyo" su" lai: lo" au: ngo nao we' daga" ngad nae". Ni" nho: qug: khai: wa nao re ma aung: pye' nae". Nao myi: khyo" su" lai: lo" au: nao manga" nae". Thin: ra" jham" qu" ru joe" lo: re ai wa nao re dae mate' nae".

³Pe"mung:ga"re ngo wa ni" Mao"So ASANG nao re khyad' yu yaug Israel nho: gyang" lho" Mao"So ngad:- nao re lhoe' ke' byid: nae" qhid' mae" ngo wa Egutu re byid' pye' nae". Ngo wa Ethiopia we' Seba re byid' pye' nae".

⁴Ni" kao so' re khyad' yu nae" qhid' mae" ngo wa byumyu" qe alhab' geim" re byid' pye' nae". Pe"mung:ga"re nao wa nga" qhid' mae" phug' de; ra". Pe"mung:ga"re ngo nao re jhid'de; mung: nga: ye; ru byid: nae".

⁵Dagyaug wa,- ngo nao we' daga" na va" ra" ba thug' shad' mae" we' va" thao" ra" ba vao shad' mae" ngo wa ni" byu qere yham khyo jhui" lo nae".

⁶Ngo wa mug: am re ai bam re nhao: ke' wa, ein: ta" mung: mug: thao re ai bam re- matam" to: nae" ngo ta" nae". Nga" byu qere va" ra" mung"dan: jham mae" we' mug: myid khyi" khao: ngo" mae" tug' lo nhao nae".

⁷Yao: bam wa nga" byu qe ngad:- nga" phungbao re bao nhao nae" ngo yao: bam re phan" to" ru ngad:- ga: ta" ra".

⁸Mao"So wa nga" byu qere tarha" yung" khyo zhang" yu wa,- Yao: bam myo, jid' de, gengadqere: yao: bam myo, jid ngad: ako". Yao: bam nokhye' de, gengadqere: yao: bam nojid ngad: ako".

⁹Tarha" ca: qu" nae" qhid' mae" byumyu" qere zhang: wa,. Yao: bam: so jham mae" khoyaug lam: joe" lo nae" ayo, khyo re lapa qo" pa: i? Aibam mae" khoyaug lam: ana" boe" na: rure lapa qo" pa: ta" ra" i? Yao: bam jo: rure sagse: qhu" byid: nae" we' yao: bam: dao: dangman" rure sagse: qhu" byid: nae" qhid' mae" ce: so jham re yao: bam yao" sagse: qere jhui" li" nhao ge,.

¹⁰Israel byu qe we"- naonhaung" wa nga" sagse: ngad: ako". Nao ngore ba mung: lam" nae" we'- ngo dayaug za: Mao"So ngad: rure ba: gyo: nae" qhid' mae" nga" daui daui yaug boe" nae" ngo nao re khyin: to" ru ngad:- Ngo mae" je yang: so gatau mana- khonhae" re: mana: qu" khonhae" re: na nae" mangad:-

¹¹Ngo dayaug za: ASANG ngad:- Nao re qo" khyad' yu yaug ngo dayaug za: ngad:-

¹²Pe" boe" nae" khyo re ngo lapa pa mung: nao re ngo bao" thaug' byid' ra". Taung bug so khoja: re: cere khonhae" makad' qu" ngad: ako". Naonhaung" wa nga" sagse: ngad: ra".

¹³Ngo wa Mao"So ngad mung: khonhae" re: ngad: jo, nae". Nga" qam: so' lo, mae" khag' dayaug re: maqo" phao: loe, ngad: ra". Ngo kad' rure khag' re: maqo" tha" pye' ngad: ra"- ga: ta" ra".

¹⁴Israel nho: gyang" lho" Mao"So- nao re khyad' yu: ra" yaug ASANG wa- nao re khyad' yu nae" qhid' mae" Babelon re gye kad' nae" gyetab datab ngo nhao: ke' nae". Ngo wa vogaung: kham: jham re phyo' khyo" pye' nae". Ai mae na: ra" byu qe: hug' thoe re gyi: ngug thoe boe" lo" nhao nae".

¹⁵Ngo wa ASANG ni" nho: gyang" lho" Mao"So ngad: Israel we"- Ngo wa nao re phan" to: yaug ngad mung: ngo wa ni" kho:kham ngad:- ga: ta" ra".

¹⁶Ganhae"- ASANG wa panglai: khyo" lai: phyid' lo" ra" khyodang kad' ra". Qid lhang" jham khyo" kho' lai: lo" ra" khyodang kad' ra".

¹⁷Yao: wa phyo' pye' nae" qam: bo: ra" gyetab gyekhe' myao: lhin" jham we' myao: jham re jhui" au: she: ra". Yao: bam gyang: gyo" lo" byaug mung: khonhae" re: mato" ngad: ako". Myikaug' myishae re we' dakhyo: mad: se' pye' ra".

¹⁸Ngadqere: ASANG wa- lai: lo" ra" ayo, mae boe" ra" khyo jham mae nhag' dataui: ge,. Ganhae"- boe" lai: lo va" akhyo dao mae ngha yang: dana ge,.

¹⁹Ngo kad' nae" ngad: ra" mau" asag' re qu" ge,- boe" li" na: ava". Naonhaung" aire ana" qo" myao: avako". Ngo wa din"pyad' yo khyo" kho' lai: lo" ra" khyodang re kad' nae". Aimae ngo naonhaung" re qid zo: gyaung: jham yug byid: nae".

²⁰Ngo khyin: yu: to" ra" byumyu" re qid byid: nae" din"pyad' yo mae ngoyang qid gyaung: jham re yug nhao lao"- seyo: gug'nyhug' lhe: jham lhao" re: ngore nga: yhe' li" genae". Zag ne jham we' ngho' gola:u jham wa ngore caung:khin" li" genae".

²¹Yao: bam wa ngoyao" qhid' mae" kad' to" ra" nga" byu qe ngad: ako". Yao: bam wa ngore Nghaui"caung: khin" li" genae".

²²ASANG wa- Ngadqere: Israel we"- nao wa ngore phoe: pye' mung: nao ngore macaung:pa" ngad: ra".

²³Nao wa ngore ni" nho: phad' ngaui" xeim: yao maci li" ngad: ra". Ni" ngaui" xeim" yang ngore nao nga: mayhe' byid: ngad: ra". Ngo wa nao re ngaui" xeim: byid: nae" mho' yang: qola: mavin nhao sheim nae pyo: ja: mho' yang: nao re ngo mamyaung: nhao.

²⁴Nga" qhid' mae" nao sheim nae pyo: xau mavai byid:- ni" nho: gug'nyhug' jham: nho: xau: yang re: ngore nhag' madag nhao. Ai: atha" ni" qobo jham: yang ngore qola: nhao: ra". Nao shad' lhoe" ra" shad' ra" mau" jham: yang ngore dug myaung: nhao: lo: ra".

²⁵Ngadqere: ngo wa ni" qobo jham re khyad' byid' ra" yaug Mao"So ngad:- Ngo ga" yaug ngad: ruyang ceru re ngo kad' ra". Ngo wa ni" qobo jham re xam" to: byid nae" mangad:.

²⁶Tarha" yung" khyo ye: gelang:- naonhaung" qobo zhaug' ra" khyo re cili" geri:- naonhaung" jo: ra" shad' mae ngad: rure sagse: qhu" byid: nae" naonhaung" mau" si: re kai" qhu" ge,.

²⁷Qhid' phyao: mae" naonhaung" phug' pho" qe qobo shad' lo: ako". Naonhaung" nho: au: jhaung qe wa ngore gye kad' yang: qobo shad' lhoe" ako".

²⁸Naonhaung" nho: zug: qe wa nga" gyang" lho" jo, qo re masan masin" kad' pye' ako". Airumung: ngo wa Israel dao mae byo; qeim: ru boe" nhao mung:- Ngo wa ngoyao" byumyu" re maphug' makhyad' roe" ru qhug' nhao nae"- ga: ta" ra".