Read Maru ESAIA 44 Bible Online

ESAIA 44 - Maru bible

ESAIA 44

¹ASANG wa- Yaku nho: myid:zo:- ngoyang khyin: to" ra" byumyu" nga" daui daui yaug Israel we"- ana" tae" gyo: wa,-

²Ngo wa nao re phan" to" ra" ASANG ngad:- Nao khau: li" ra" ayo, mae" ngo nao re bao" thaug' byid: va". Dagyaug wa,- nao wa ngo jhid'de; ra" ngoyang khyin: to" ra" nga" byumyu"- nga" daui daui yaug ngad: ra".

³Ngo wa qid shab' ra" mug: myid re qid byid: nae". Kyaug' ho: ra" myid gaung dao mae qid zo: gyaung: yug nhao nae". Ngo wa ni" zoshao qe: dao mae nga" byo re vhe' sheim: byid: nae". Ni" myid:zo: qe: dao mae nga" shaman" jeju vhe' sheim: byid: nae".

⁴Yao: bam wa qid nyang" qo" ra" myo, gae we' dakhyo: yaug: qi" li" genae". Qid zo: gyaung: yae mae" seyo: bin: we' dakhyo: yaug: qi" li" nae".

⁵Byu qe wa dayaug bin dayaug ngo wa ASANG ngad:- ga: ta" li" genae". Yao: bam wa Israel byu qe we' li" qhan" li" genae". Yaug khao: ngo" wa yao" lo, mae ASANG: mang aso: de; li" nae". Amung: yao: yao" gaung re Mao"So: byu dayaug ga: mhang" yu: li" nae".

⁶Israel re eib mung: gug: gam byid: yaug ASANG qam: bo: ra" ASANG wa- ngo wa aqhid- lo" thao"- date: za" Mao"So ngad:- ngo mae" je yang so gatau mana.

⁷Ngo kad' lo: ra" mau" re gatau khag' qo" kad' i? Aqhid mae" lo" thao" ra" ayo, joe" sho' mae" boe" nae" khyo alhab' re khag' lapa qo" pa: to: va" i?

⁸Nga" byumyu" we"- dagyaug wa,- ganhae" gaco' yo,mae" ana" ba joe" sho' ai: gu: alhab' boe" li" nae" khyo re ngo lapa pa: to" rure nao ba: ra". Amung: nao wa nga" sagse: ngad: ra". So gayaug na: ra" i? ga: ceru: ta" nae" qo" ra".

⁹So alho jham re kad' mo, alhab' wa pe" phug' made, mo, ngad: ako". Yao: bam gyai myhao sho' phug' te' nga: yhe' byid' ra" so jham wa akeim ngad: ako". Ai: so alho jham re caung:pa" byid: ko" ra" mo, wa myo, jid qe we' ngad beim: mo, ngad: ako". Yao: bam qho' phau" li" genae".

¹⁰So khyo" caung:pa" nae" qhid' mae" jo, to' re khyao dau alho kad' ru wa pe" akyu" mabo ngad: ra".

¹¹Aire caung:pa" ra" yaug khao: ngo" wa nga: yeim: li" genae". So alho jham re kad' ra" byu qe wa xao su byu qe za: angad: ako". Ai tho' pe" maje ngad: ako". Yao: bam li" mung: tarha" ca: qu" rumae li" ye, nhao ge,. Yao: bam gyaug: din mung: qho' phyo' ru qhug' li" genae".

¹²To' lo, mau" zaui: yaug wa to' dadau re yu mung: aire myi" yang phad' ra". Yao" nho: qam: bo: ra" lo, pau" wa ai: to' re akhyao alho boe" sho' dau: yang be; ra". Yao: mau" kad' na: au: yao: wa vae: moe;- qid shab' mung: myaung" byaug: ra".

¹³Lagsama" kad' yaug wa sag' thaung: re ka" ra". Laug man: yang akhyao mhaug' khyang bag: ra". Yao" zai jham: yang aire kyaung" ra". Aire byu akhyao kad' yu: mung: yao" yham mae to: nae" yaung" ra" xao su byu sulho re kad' ra".

¹⁴Yao: wa sag' mo" yo mae" shaug'- shakhai:- qhoje; sag' jham re ai: qhid' mae" ci nae" gai: thau: yu: ra". Mangad: lao" yao: wa qhoje; gae re qho: mung: aire yaug: qi" li" sho' mug: qu re lao" na: ra".

¹⁵Byu dayaug wa ai: sag' gae mae" dadau re thao kad' mung: dadau re wa so alho re kad' ra". Aimae" dadau re wa yao: yao: myi: gao nae" qhid' mae" myikhyeim" kad' mung: mug kao: ra". Amung: dadau re wa so alho kad' mung: aire caung:pa" ra".

¹⁶Sag' thaung: daqhae: re wa myikhyeim" mad mung: sho: re kao yang: aire zo" ra". Amung: yao: wa nhag' dag: na: ra". Yao: wa aire myi: mad: gao mung: gyai gai:- gyai lam: lhe"- myikhyeim" gai va" lhe"- ga: ta" ra".

¹⁷Dang: ra" sag' thaung: re wa so alho kad' mung: ai:thao re yao: goe; gyo" yang: aire caung:pa" byid' ra". Yao: wa aire akyu" mho' mung: nao wa nga" so ngad: ra"- ngore khyad' yu la, wo"- ga: ta" ra".

¹⁸Airu" ra" byu qe wa saung" go geyang: yao: bam pe" kad' na: rure maba ko" ngad: ra". Yao: bam: myo, re cam" ci- yao: bam: myid re dangman" ru maba nae" pyid' to" ako".

¹⁹So alho jham re kad' yaug wa- nyan: we' ba: myid: ru maqo" yang: sag' thaung: daqhae: re ngo ngha" pye' va". Ngo wa myi:gyoe: dao mae mug daqhae: re kad' yu yang: sho: re kao mung: aire zo: va". Amung: dang: ra" sag' thaung: re so alho dalam: re ngo kad' va". Ngo wa cetau mae sag' thaung: dathaung: re goe; pa" na:- ga: ta" ra".

²⁰Aiwa myimhab re zo" ruru: ga: thoe gyo: nhao: ra". Yao: go: joe; ra" akhyo wa yao: re matho' gai: bao" yu losho' xo sho' jhui" nghung" lo" byaug: ra". Yao" lo, mae zaui" ci: ra" so alho wa so dajhid' re: mangad: ga" ru yao: yao" gaung re maqo" lhang: yu nae".

²¹ASANG wa Israel we" ceru re myid: beim: wa,- nao nga" daui daui yaug ngad: rure myid: beim: wa,. Nga" daui daui yaug boe" nae" qhid' mae" ngo nao re phan" to: va". Ngo nao re khonhae" re: mato" myhid' pye' nae".

²²Ngo wa ni" qobo jham re jham thaui: re we' dakhyo: sham" pye' nae". Ngojhao" dam: tug' lo ri:- ngo wa nao re khyad' yu yaug ngad:- ga: ta" ra".

²³Mug: khaung nao we"- bau: yang: zag: hug' wa,- myid gaung: nho: no; ra" jo, qo jham we"- hug' ge,- bam jham sag' mo" yo mae" sag' gae khao: ngo" we"- bau: yang: zag: hug' ge,- ASANG wa yao" byumyu" Israel re khyad' yu: ra" khyo" yang yao" qi" qhang: rure qhu" byid' ava".

²⁴Ngo wa ni" ASANG- ni" nho: khyad' yu yaug ngad: ngo wa nao re phan" to: yaug ngad:- Ngo wa ja: khao: ngo" re phan" to: yaug- ASANG ngad:- ngo dayaug za: mug:gaung re phyid: to: yaug ngad:- ngo myid gaung re phan" to" au:- ngore khag' re: mabao" byid:.

²⁵Ngo wa lo, kyo' qu" mo, re ago boe" nhao: pye' mung:- kyi jham re qu" yang: lapa pa mo, re nhag' lam: thao" nhao: pye' va". Pha,jhi" bo mo; dao: jham re ngoyang majo ein: ta" pye' mung:- yao: bam: pha,jhi" wa adu: adae: ngad: rure qhu" byid: va".

²⁶Ngadqere: nga" daui daui yaug lapa pa lao" re:- nga" nho: myid: yaung: ra" khyo jham re qhu" byid: nae" qhid' mae" nga" lagyo: re ngo nhao: ke' lao" re:- Ngo wa ai: myid: yaung khyo jham we' lapa pa dao: jham re jab byang" li" nhao: ra". Vobyu qe dam: na: li" genae" ein: Yerusalem re ngo ta" ra". Yao: bam dam: te" na: li" genae" ein: Yuda vogaung: jham re ngo ta" ra". Ai: vogaung: jham wa byo; qeim: jo; rumae" dam: to" lo: li" genae".

²⁷Amyin" dakheim" yang ngo wa nammugdara re kin" ho: lo" nhao: ra".

²⁸Ngo wa Kuru re- nao wa ngore eib nae" yaug ngad: li" nae". Nao wa ngoyang nao re kad' nhao nug: ra" ja: re kad' li" nae". Nao wa Yerusalem re dam: zao nae" we' Caung:pa" Yham apan aqao: jham dam: zao nae" amyin" re byid' li" nae"- ga: ta" ra".