Read Maru ESAIA 45 Bible Online

ESAIA 45 - Maru bible

ESAIA 45

¹ASANG wa Kuru re kho:kham kad' nae" khyin: to" ava". Byumyu" qe re aung: pye' nae" qhid' mae" yao: re san: to" ava". Kho:kham qere yao: bam: kheim: so' re yu: pye' byid: nae" qhid' mae" yao: re nhao ke' ra". ASANG wa yao" qhid' mae" vogaung" kham mo" jham phung" byid' li" nae". ASANG wa Kuru re-

²Ni" gyaung: khyo re ngo yao: nyhang" byid: nae". Bam we' bug gaung jham re tae" byid: nae". Gyid: kham: jham re ngo khyug' pye' mung: aijham: nho: jo,to' kham: kyao" jham re khyug' mhan" pye' nae".

³Cad' no; ra" anyham: avho' jo, qo jham mae" jo,nho" jham ngo nao re byid: nae". Ailao" ngo wa ASANG ngad mung: Israel nho: Mao"So wa mang lao: yang: nao re khai: to" rure nao ba: li" nae".

⁴Ngo yang khyin: yu: to" byumyu"- nga" daui daui yaug Israel re bao: thaug' byid: nae" qhid' mae" ngo nao re san: to" ru ngad:- Nao ngore maba ngadqere: ngo wa nao re qi: sho' nga: yhe' byid: va".

⁵Ngo wa ASANG ngad:- so gatau mana lo:- nao ngore maba sho' ngadqere: nao qo ca" ra" qam: o: ngo nao re byid: nae".

⁶Mug: myid thao" sho' mae" yaug khao: ngo" wa ngo ASANG ngad: rure ba nae" qhid' mae" we' so gatau mana: rure ba genae" qhid' mae" cere ngo kad' ru ngad:-

⁷Ngo wa mug: bo" we' mug: cad' shid' ja" geim" re phan" to"- Ngo wa shaman" jeju we' qug: khai: kyi" khyag' ru shid' ja" geim" byid: yaug ngad:- ASANG ngo wa cegu: alhab' re kad' yaug ngad:-

⁸Mug: qu we' dakhyo: aung doe; rure mug:gaung mae" ngo nhao: ke' byid: nae". Myid gaung wa aire khae: yu nae" qhid' mae" phung" byid' li" nae". Amung: loe; beim: ru we' tarha" din nyang: ru wa bu" lo: li" nae". ASANG ngo wa cere boe" nhao nae".

⁹Zhogam: ug' wa ug' kad' yaug re ngag mung: ug' gaje alhab' we' dakhyo: za: ngad: ra" ein: vae" ngag nae" i? Zhogam: wa ug' kad' yaug re nao pe" kad' na: i? ein: gai: myid' i? Ug' wa ug' kad' yaug re nao majhao ein: gai: nyhung: i?

¹⁰Naotao pe"mung: ngore ceru: khau: to: ko" i? ein: yao: myhi" yao: pho" tao re khag' dayaug qo" ta" ko" i?

¹¹Israel nho: Mao"So ASANG joe" lo nae" ayo, re mhaug' khyang bag yaug wa- Nao wa nga" zoshao qe: khyo we' sin: yang: ngore dao: myid: myid: nae" akhang" nao maqo"- ngo khoru: kad' ca" ein: ngore ta" nae" akhang" re: nao maqo".

¹²Myid gaung re phan" to: mung: aimae na nae" xao su byu qere phan" to: yaug wa ngo ngad:- Nga" qam: so' khyo" yang mug: khaung re phyid: ke' mung: ba- lho"- kyi jham re ngo khang" na:-

¹³Nga" myid: yaung: rure zaui" pyang" nae" we' jo jo za: ja: khao: ngo" re boe" nhao nae" qhid' mae" Kuru re mau" zaui: nae" lhau: zhung: yaug wa ngo yao: ngad va". Ngo wa yao: su" lo" nae" khyokhe' khao: ngo" re khyo din: kad' pye' byid: nae". Yao: wa nga" vogaung: Yerusalem re dam: zao mung: taung" to" ra" nga" byu qere lhoe' ke' byid' li" nae". Ceru re kad' nae" qhid' mae" yao: re khag' yang re: o: malhaung- khug vag: re: khag' mabyid:- qam: bo: ra" ASANG ta" to" ra".

¹⁴ASANG wa Israel re- Egutu we' Ethiopia nho: jo,nho" wa ni" mae" ngad: li" nae". Seba nho: byu qhang qe wa ni" jeim qe ngad: li" genae". Aibam wa jao co: de, zang ni" thao cao" li" genae". Yao: bam nao re goe; gyo" mung: Mao"So wa nao we' daga" na: ra". Yao: dayaug za: Mao"So ngad: ra" wo"- ga: lhang: yu: li" genae".

¹⁵Yao" byumyu" re khyad' yu: ra" Israel nho: Mao"So wa yao: yao" gaung re vho' to: yaug ngad: ra".

¹⁶So alho jham re kad' mo, alhab' wa qho' phau" li" genae". Yao: bam mae" alhab' mo, wa nga: yeim: li" genae".

¹⁷Ngadqere: Israel wa ASANG: yang khyad' yu: ru qhug' ra". Israel aung doe: ru wa apyad ato mae dang: jo, nae". Yao" byu qe wa khonhae" re: nga: yeim: ru maqhug' nae"- ga: ta" ra".

¹⁸ASANG wa mug: khaung re phan" to" ra". Yao: wa Mao"So ngad: ra". Yao: wa myid gaung re azung kad' mung: phan" to" ra". Yao: wa aire tang sho' kad' mung: myao" sho' jo, nhao: ra". Yao: wa aire cae: jhug tag makad' pye' ngad: ra". Byu qe: qhid' mae" na nae" jo, qo kad' byid' ra". Aiwa- ngo wa ASANG ngad: gatau so khag' mana.

¹⁹Ngo wa anyham: avho' mae dao: majhau- nga" myid: yaung: ra" khyo rere: manyham" to: cae: jhug tag jo, qo mae ngore qho genae" qhid' mae" Israel byu qere ngo mamho'. Ngo wa ASANG ngad mung: dangman" ra" dao: re jhau:- jo: rure ngo ta" hau" ra" ga: ta" yaug ngad: ra".

²⁰ASANG wa byumyu" qe we"- zang" lo geri: kho:sin" mung"dan: gyo" lo" byaug yang: na: dang mo, alhab' we"- tarha" ca: qu" ru khyo naonhaung" yao" gaung re yeqhu" byid: ge,. Mo, byu qe wa sag' yang kad' ra" yao: bam: so alho jham re dao mung: jin: yang: su" qin" ako". Yao: bam re maqo" khyad' yu: ra" so jham re akyu" mho' ako". Ai: byu qe wa pe" re: maba ngad: ako".

²¹Naonhaung" nho: mau" si re tarha" yung" mae li" tin: geri:- Qobo vhin qhug' mo, wa yao: cao: jho" qham vageshao:. Boe" li" nae" ga: qhid' phyao lapa pa yaug khag' ngad: i? Yao" byu qere khyad' yu yaug ngad: ra" Mao"So ASANG wa ngo ngad: mangad: i? So gatau mana lo:-

²²Mug: myid dao mae" byu alhab' we"- Ana" ngojhao lhang: lo mung: khyad' yu: ru qhug' ge,- ngo dayaug za: Mao"So ngad:.

²³Nga" dao:so: wa dang: ra". Aiwa lhai" pye' ru maqhug' nae". Alhab' re ngoyang dao:so: kad' to" ru ngad:- yaug khao: ngo" wa nga" qhid' kheim: pad' thaug' li" thaug' mung: ngore jhaug zaug nae" jham li" tang" li" genae".

²⁴Ngo dayaug khyo" yang za: aung doe; ru we' qam re qo" qho: myao: rure yao: bam ta" li" genae". Ngadqere: ngore nghang: mo, alhab' wa nga: yeim qhug' li" genae".

²⁵ASANG ngo wa Yaku nho: myid:zo: qe alhab' re khyad' yu mung: yao: bam wa ngore caung:khin" li" genae".