Read Maru ESAIA 47 Bible Online

ESAIA 47 - Maru bible

ESAIA 47

¹ASANG wa- Babelon we"- ni" tao" khau" mae" gyo" lo mung: myid gaung phalhug bam mae zaung wa,. Nao wa ganhae" maqo" gai: aung: yu: pye' ra" vogaung:- zomyi: gyang" we' dakhyo: ngad: lo: ra". Ngadqere: nao wa nau" nau" nhae" nhae" mangad: lo nae". Ana" nao wa jeim ngad: ava".

²Laug lhang re lhang wa,- cin man" phaui: gyag wa,- ni" myo,khung: nghoe' yu: pye' wa,- ni" mai bau: gai khyad' pye' wa,- qid zo: gyaung: gau" phyid' ye: nae" ni" mai shae" re to' wa,.

³Byu qe wa nao gaung pyad' ngad: rure the' myao: li" genae". Yao: bam nao re qu" ngai: pye' mung: qu" qho' li" genae". Ngo lage, phaug' nae" ngore khag' re: matam" genae"- ga: ta" ra".

⁴Israel nho: gyang" lho" Mao"So wa ngonhaung" re lhoe' ke' byid' ra". Yao" mang wa qam: bo: ra" ASANG ngad: ra".

⁵ASANG wa Babelon re sham: sham: ngad mung: mug: cad' khug mae zaung: jo; wa,. Yao: bam nao re byumyu" qe: nho: kho:kham myhi" ga: makhai lo: genae".

⁶Nga" byu qere ngo nhag' yo: mung: yao: bam re nga" byu qe mangad: lo" ra" khyo" yao: bam re kad' nae". Ngo wa yao: bam re ni" qam: so' khug mae ke' byid: va". Nao yao: bam re nhag' khyag' myid maqhu" byid: ngad: ra". Apyad qi: va" mo, re lhao" re: nao thin thin kad' ra".

⁷Khonhae" re: nao kho:kham myhi" boe" jo, nae" nao jho: ra". Cejham re ni" nhag' lam: mae make' to: ngad: ra". Ai alhab' khoru: thao" lo" nae" rure re: nhag' lam: mae make' to: ngad: ra".

⁸Pyo: khyo re jhid'de; yaug nao we"- ceru re tae" gyo: wa,- nao gug: gug: za: gug: gam: na: ga: jho: na: ra". Mao"So qhi" qi" qhang yaug ngad: nao we' dau: ru gatau khag' mana- ga: nao ta" ra". Nao cug' mo" khonhae" re: maboe" nae" ga:- nao jho: ra". Ni" zoshao qe byaug: dam: lo" ra" dae: yang qug: khai: khonhae" re: makham zo: nae"- ga: jho: ra".

⁹Ngadqere: dazab re- daba na mae aigu: alhab' boe" li" nae". Nao vha" ra" mandan: pha,jhi" re ci ngadqere: ni" yham sang pho" we' ni" zoshao qe seim" byaug li" genae".

¹⁰Nao wa nao yao" makhyang" rumae gai thoe gyo" na: ra". Nao re khag' yang re: mathe' myao- ga: jho: ra". Ni" pha,jhi" we' laba lajhao wa nao re khyonghung: jhui" nghung" lo" ra". Nao wa nao yao" gaung re ngo wa Mao"So ngad: ngo we' dau: ru gatau khag' mana- ga: ta" ra".

¹¹Kyi" khyag' qug: khai: ru wa ni" dao mae joe" li" mung:- ni" nho: vha" ra" pha,jhi" pe" ja" yang re: aire maqo" tam" pye' ngad: ra". Byo; qeim: ru wa ni" dao mae nyag din taung" joe" li" mung: khonhae" re: yab mo, ma mo; qu" ra" ja: byo; qeim nhao nae".

¹²Ni" nho: mandan: dao: we' khan" pha re zam" ci wa,- aijham re nao ngai: yo, mae" cilo: ava". Aijham wa nao re daja: ja: qo" bao" thaug' byid: ko" maba- ni" gyevo qere qo" kyaug' tao" ke' maba.

¹³Nao pha,jhi" byid: dao: qo" yu sho' ngadqere: nao wa qam: mabo ngad: ra". Naonhaung" nho: kyi do: re ba: qu" mo,- kyi do: re qu" yang: zhao na mo, we' lho" dakhye' bin dakhye' joe" lo nae" ayo, re gum phan" phan" mo, wa- qhid' au: khyo li" mung: naonhaung" dao mae boe" li" nae" ra" akhyo mae" yao: bam: yang naonhaung" re li" khyad' yu nhao ge,.

¹⁴Yao: bam wa khovho khe' adau jham we' dakhyo: ngad mung: myi: wa aijham re nga" pye' li" nae". Yao: bam yao" gaung re lhao" re: maqo" khyad' yu genae". Myishae wa yao: bam: qhid' mae" gyai laung nae". Yao: bam wa- myi: yaug yo za: maqo" gao genae".

¹⁵Ni" pyad geim" mae nao dao: myid: myid' lo: ra"- ai: kyi do: qu" pha,jhi" bo mo, wa nao re akyu" bo nhao nae" ru wa o mae" we' dakhyo: ngad: ra". Yao: bam wa nao re to: co' mung: yao: bam yao" khyo khyo phao: lo" li" genae". Nao re khyad' yu nae" byu dayaug re: dang nae" mangad:- ga" ru ngad: ra".