Read Maru ESAIA 48 Bible Online

ESAIA 48 - Maru bible

ESAIA 48

¹Yuda kaung mae" byo: li" mo, Israel byu qe naonhaung" we"- cere tae" gyo: ge,. Naonhaung" wa ASANG: mang re lao: yang: jham tang: mung: Israel nho: Mao"So re caung:pa" ga: ta" ako". Ngadqere: naonhaung" ta" ru dakheim: rere: macao" ngad: ako".

²Naonhaung" wa gyang" lho" ra" vogaung: byu qe ngad:- Israel Mao"So re ngonhaung" khug ngha: na:- yao" mang wa qam: bo: ra" ASANG ngad: ra"- ga: phug: ta" na: ako".

³Ngadqere: ASANG wa Israel re- Pe" boe" nae" rure ganhae" gaco' mae" ngo lapa pa: to: va". Aire nyag din taung" ngo boe" nhao va".

⁴Nao wa jo,to' qhi" qao mung: gyid: qao: ruru: nhag' lam: qao: rure sagse: qhu" byid: ca" ein: rure ngo ba: ra".

⁵Amung: ngo wa ni" nho: joe" lo nae" ayo, we' sin" ra" khyo re ganhae" gaco' mae" ngo lapa pa: to: mung: aijham maboe" shire boe" nae" khyo jham re ta" hau" to: va". Airu kad' ru wa- naonhaung" so alho jham we' khyao dau solho jham: yang aijham re boe" nhao: ru ngad: ga: naonhaung" ta" rure tam" pye' nae" qhid' mae" ngad: ra".

⁶Ngo gau: qhid' khae" yang: ta" to" gu: alhab' ana" boe" lo: ava". Nga" lapa dao: jham jo: rure naonhaung" kham: yu ca" ako". Ana" qhid' phyao: ngo maqhu" byid' qu" ra" boe" ra" khyo jham we' joe" lo nae" asag' ja: jham: khyo ngo naonhaung" re ta" kyo: geli".

⁷Ana" za: ngo aijham re boe" nhao: na: ru ngad:- Lai: lo: ra" ayo, mae ceru" ru maboe" qu" ngad: ra". Airu: boe" qu" ngad: re wa ai: khyo alhab' re naonhaung" ba:- ga: ta" li" genae".

⁸Naonhaung" wa geim lau to" ruru: khonhae" re: lahau: qi" lo ko" ruyang naonhaung" re magai: lam: ra" khyo re ngo ba: ra". Ce: mathao mae naonhaung" khonhae" re: mathe' gyo" qu" ngad: ako". Dakheim: re: naonhaung" no: khyo pe"mung: majoe" li" ra" khyo ngad: ra".

⁹Byu qe nga" mang re caung:khin" byid: genae" qhid' mae" nga" nhag' jam: yo" rure ngo zang" ci mung: aire tam" pye' yang: nao re maphyo' qheim" pye' nae".

¹⁰Ngaui re myikhyeim" mae kyang" pye' ru we' dakhyo: dayin dayo: jam jau kham zo" ra" myi: mae ngo nao re jham" to: va". Ngadqere: nao pe" phug' made; rure ngo myao va".

¹¹Ngo kad' ru wa ngoyao" qhid' mae" kad' ru ngad:- Ngo wa nga" mang re nga: mayeim nhao nae". Aiwa nga" mae" ngad ang mung: ngo mae" za: ngad: ruyang phungbao re gayaug khag' rere: mabo: kham: yu nhao nae"- ga: ta" ra".

¹²ASANG wa- ngoyang khai: to" ra" Israel byu qe we"- nga" dao: re tae" gyo: ge,. Ngo wa Mao"So ngad: sao qhid'- lo" thao" we' date: za" Mao"So ngad:-

¹³Nga" lo; yang myid gaung apan aqao: re kad' to" amung: mug: khaung re phyid: nghoe' to". Mug:gaung we' myid gaung re ngo khai: ke' lao"- aijao" joe" li" gemung: yao: yao" gaung re li" qhu" byid' ako".

¹⁴Naonhaung" alhab' we"- zang" ham: li" mung: tae" gyo: ge,- ngoyang khyin: to: yaug: yang Babelon re gyekhe' nae" ga" rure so jham mae" khoja: re: lapa maqo" pa ngad: ako". Yao: bam ngoyang yao: re kad' nhao nug: ra" mau" re kad' li" nae".

¹⁵Ngo wa yao: re dao: jhau yaug- yao: re khai yaug ngad:- Ngo wa yao: re jhui" thug' yu mung: yao: re aung myaug nhao yaug ngad:.

¹⁶Ana"- ngojhao" te' te' lo mung: ngo ta" rure gyo: ge,. Ngo wa aqhid mae" de: de: za: jhau: lo va". Amung: nga" dao: jham wa khonhae" re: jab byang" li" ra"- ga: ta" ra". (Ana" ASANG kho:kham wa yao" qam: so' ngore byid mung: ngore nhao: ke' ava".)

¹⁷Naonhaung" re khyad' yu: ra" ASANG Israel nho: gyang" lho" Mao"So wa- ngo wa naonhaung" akyu" qhid' mae" naonhaung" re mho" shid' byid: nug yaug- naonhaung" ye: ang: ra" khyo re ceim" shid' byid: yaug naonhaung" Mao"So ASANG ngad:-

¹⁸Nga" amyin" dao: jham re naonhaung" tae" gyo" lo ko" re- khonhae" re: makin" ra" qid zo: gyaung: we' dakhyo: shaman" jeju jham ni" qhid' mae" yug: jo; nae". Qid yae mae dang" do, lo: ra" bang: lhung" we' dakhyo: aung doe; ru wa ni" dao mae joe" lo: li" nae".

¹⁹Ni" myid:zo: qe wa ma coe je, nho" myo" li" nae". Yao: bam khonhae" re: phyo' qheim" pye' maqhug' genae" ein: rure ngo ba nhao nae"- ga: ta" ra".

²⁰Babelon mae" phao: thug' ge,- loe; beim ge,- ngaui bau: taung" lau dao: re zag: hug' ge,- aire khyi" khao: ngo" khyo hau" ke' ge,. ASANG wa yao" daui daui yaug Israel re khyad' yu: ava"- ga: ta" ra".

²¹ASANG wa- yao" byu qere laung: ru we' kyaug' gao: ra" din"pyad' yo khyo" jhui" lai: lo: au:- yao: bam qid shab' thoe magyo: ko" ngad: ra". Yao: wa yao: bam: qhid' mae" laug baui mae" qid yug: thug' byid' ra". Yao: wa laug baui re kho' phung" mung: qid yug: thug' li" nhao: ra".

²²Qobo jab qe: qhid' mae" gug: nae" jo, qo majo,- ga: ASANG ta" ra".