Read Maru ESAIA 49 Bible Online

ESAIA 49 - Maru bible

ESAIA 49

¹Va" ra" jo, qo mae na ko" ra" byumyu" va: mae" byumyu" qe we"- nga" dao: re tae" gyo: gela,. Ngo makhau shimae" ASANG wa ngore khyin: to: mung: yao" daui daui yaug khyo" ngore san: to" ra".

²Yao: wa nga" dao: thoe re shae pyang: qhi" tho' nhao mung: yao: yao" lo; yang ngore gug: gam byid' ra". Yao: wa ngore myo: re we' dakhyo: ceim mung: ci nae" jin" jin" kad' ra".

³Yao: wa ngore Israel we"- nao wa nga" daui daui yaug ngad:- ni" mathao mae byu qe wa ngore caung:khin" byid' li" genae"- ga: ta" ra".

⁴Ngo wa mau" zaui: va". Ngadqere: akeim ngad: ra". Ngo wa nga" qam: re gan sho' ci va" ngadqere: pe" mabin: kad'- ein: ta" va". Ngadqere: nga" khyo re gug: gam byid: nae" qhid' mae" ASANG re ngo qo" lam khug: ra". Yao: wa ngo kad' ra" mau" re aphug' jhaung qhu" byid' li" nae".

⁵Ngo makhau: li" shire- ASANG ngore san: to" ra". Yao" byu qere dam: jhui" tug' lo nae" qhid' mae" re: byo: sin" na: ra" Israel byu qere dam: jhui" tug' yu nae" qhid' mae" ngore yao" daui daui yaug kad' nhao: ava". ASANG wa ngore nga: ye; ru byid' ra". Yao: wa nga" qam: ajhaung ngad: ra".

⁶ASANG wa ngore nga" daui daui yaug we"- ni" qhid' mae" je: qi" ra" mau" ngo qi" qhang: ru dam: kad' byid: nae" ru za: mangad:- mug: myid alhab' khyad' yu: ru qhug' nae" qhid' mae" ngo wa nao re byumyu" qe: bo" bao re: boe" nhao nae"- ga: ta" ra".

⁷Xo sho' maphug' makhyad' kad' ru qhug' yaug- byumyu" qe: yang nghang: yaug- zug: qenho: daui daui yaug re- Israel nho: gyang" lho" ra" Mao"So we' khyad' yu yaug wa- nao lhoe' ke' qhug' rure kho:kham the' myao mung: yao: bam re phug' myao: byid: nae" to" li" li" genae". Kho:kham nau" qere: aire the' myao: li" genae". Yao: bam wa nao re nga: yhe' byid: nae" qhid' mae" goe; gyo" li" genae"- ga: ta" ra". ASANG wa yao" daui daui yaug re khyin: to: va" ruyang ceru boe" li" nae" ngad:- Israel nho: gyang" lho" Mao"So wa yao" dao:so: jham re zaung yaug ngad: ra".

⁸ASANG wa yao" byu qere- nao re khyad' yu nae" ayo, joe" lo lao"- Ngo wa nao re myo,nho byid: mung: bao" thaug' ru qhid' mae" nao mho' yao: rure ngo tau: byid: nae". Ngo wa nao re lhaug' zaung" mung: gug: gam byid: nae". Amung: nao khyo" yang byu alhab' we' dao: thang" kad' nae". Ana" cae: jhug tag boe" jo; ra" ni" mug: myid mae ngo nao re dalhang dam: te" na nhao nae".

⁹Ngo wa kyam: byu qere loe; beim ge,- ein: ta" mung: mug: cad' yo mae na mo, re mug: bo" khyo thug' lo geri:- ein: ta" nae". Yao: bam wa bug gaung jham mae mhin: hai zo" na ko" ra" yao jham we' dakhyo: ngad: li" nae".

¹⁰Yao: bam wa khonhae" re: vae: moe' ru- qid shab' ru qhug' genae" mangad:- Ba we' din"pyad' yo laung: ru wa yao: bam re dae mate' nae". Pe"mung:ga"re yao: bam wa yao: bam re jhid'de; ra" yaug: yang jhui" au: she: ye" ru qhug' li" genae". Yao: wa yao: bam re qid thug' qid khyo jhui" ye" lo" li" nae".

¹¹Ngo wa bam jham re lai: phyid' lo" ra" hau" mo" khyo phung" nae". Nga" byu qe su: nae" qhid' mae" khyodang nyhang" byid: nae".

¹²Nga" byu qe wa mug: am: mae"- ba thug' shad' mae"- mug: thao shad' mae jo; ra" Asvan mae" re:- va" ra" jo, qo mae" joe" lo: li" genae".

¹³Mug: khaung we"- nghaui"caung: wa,- myid gaung we" bau: yang: zag: hug' wa,- Bam jham wa Nghaui"caung: nhao ge,- ASANG wa yao" byu qere nhag' tang" byid' li" nae". Yao: wa dayin dayo: qug: khai: kham zo" na ko" ra" yao" byu qere nhag' khyag' byid' li" nae".

¹⁴Ngadqere: Yerusalem byu qe wa ASANG wa ngonhaung" re shapye' pye' ava". Yao: wa ngonhaung" re to" myhid' pye' ava"- ga: ta" ako".

¹⁵Aimung: ASANG wa myiqe: wa yao" zonau" re qo" to" myhid' pye' i? Yao: khau: to" ra" zoshao re majhid'de; ra" i? Yao: myhi" wa yao" zoshao re to" myhid' pye' sho' ngadqere: ngo wa khonhae" re: nao re mato" myhid' pye' nae".

¹⁶Yerusalem we"- ngo wa nao re khonhae" re: maqo" tho' to" myhid' pye' nga" lo, vo: dao mae ni" mang re ngo tung" te' to: va".

¹⁷Nao re dam: zao: to' nae" mo, wa joe" li" na: avako". Nao re phyo' qheim" pye' mo, wa thug' lo" byaug: li" genae".

¹⁸Pe" boe" na: rure lhang" gam: qu" wa, ni" byu qe wa zang" ham: na: ako". Yao: bam yham khyo lo: na: ako". Ngo wa daui: na: ra" Mao"So ngad: ru dang: ru we' dakhyo:- myhi" sag' wa yao" phug' de; ra" qhang zai re nga: kad' ruru: nao wa ni" byu qe: mathao mae nga: kad' li" nae".

¹⁹Ni" mung"dan: wa byo; jo, mung: cae: jhug tag boe" jo; ra". Ngadqere: aimae lona nae" joe" lo: na ko" ra" mo; qhid' mae" ana" ai wa saung" ngai: li" nae". Naonhaung" re byo; qeim nhao: to: co' ko" ra" mo, wa naonhaung" mae" va" ra" jo, qo khyo qhui" pye' ru qhug' li" genae".

²⁰Pyaung" nha: to" ra" jo, qo mae khau: li" ko" ra" ni" byu qe wa daba na mae nao re- ce: mung"dan: wa saung" ngai: ra". Ngonhaung" na nae" jo, qo myo: sho' ca" ra"- ga: ta" li" genae".

²¹Ailao" nao wa naoyao" gaung re- nga" qhid' mae" ce: zoshao qere khag' khau byid' i? Nga" zoshao qere ngo ciphyaug' pye' mung: ngo zoshao maqo" lo:- Ngo wa pyaung" jhui" lo" pye' ru qhug' mung: khe' thug' pye' qhug' va". Ce: zoshao qere khag' yang khau: qhi" ra" i? Ngo wa dayaug za: nha: to: qhug' va". Aire ce: zoshao qe wa khai: mae" joe" li" ko" i? ga: ta" li" nae".

²²ASANG kho:kham wa yao" byu qere- ngo wa byumyu" qe re ve, so: byid' ke' mung: yao: bam wa ni" zoshao qere yham khyo jhui" lo: li" genae".

²³Kho:kham qe wa naonhaung" yao: pho" qe we' dakhyo:- kho:kham myhi" qe wa yao: myhi" qe we' dakhyo: ngad: li" genae". Yao: bam wa ni" qhid' kheim: mae goe; gyo" mung: nao re nga: yhe' byid' li" genae". Yao: bam nao re phug' myao: byid: yang: nyham: khyo" li" genae". Ailao"- ngo ASANG ngad: ra" khyo re naonhaung" ba: li" nae". Ngo yang bao" thaug' byid: nae" rure lao" na yaug khag' re: nhag' lam: magyug: nae"- ga: ta" ra".

²⁴Nao wa gyezo: pho" nho: lo, mae" lanyab re qo" lhad' yu nae" i? Nao wa thin: ra" kho:kham pho" nho: kyam: byu qere qo" khyad' yu nae" i? ga: ta" ra".

²⁵ASANG wa ai wa boe" nae" khyo yao: ngad: gyezo: pho" nho: kyam: byu qe wa jhui" lo" pye' qhug' li" genae". Thin: ra" kho:kham pho" nho: lanyab wa lhad' yu: pye' qhug' li" nae". Nao re khae' zin: yaug re ngo khe' zin: nae". Ngo wa ni" zoshao qere khyad' yu nae".

²⁶Ngo wa nao re zag zo: mo, re yao: cao: jho' se' nhao nae". Yao: bam wa byuse' ru we' nhag' jam: yo" ruyang yid: jo; li" genae". Ailao"- byu alhab' wa nao re khyad' yu yaug- nao re lhoe' ke' byid: yaug wa ASANG ngo ngad: rure ba: li" genae". Ngo wa Israel nho: qam: bo: ra" Mao"So ngad: rure yao: bam ba: li" genae"- ga: phaug' tau" ra".