Read Maru ESAIA 5 Bible Online

ESAIA 5 - Maru bible

ESAIA 5

¹Nga" ba nam pho" we' yao" sabyi khyae: nho: nghaui" caung: cere ngo caung" na: au: tae" gyo: ge,- Nga" ba nam pho" wa myid xau gyai gai: ra" bug gaung dao mae sabyi khyae dakhyae qo" ra".

²Yao: wa myid re dau: mung: aimae" laug baui jham re sho' pye' yang: gai: thao" ra" sabyi naui qho" to" ra". Yao: wa aijham re lhaug' nae" gyebyu zaung kad' ra". sabyi shi: nao: nae" dungkhung: dau" ra". Amung: yao: wa sabyi shi: mhang" yo, re lao" na: ra". Ngadqere: sabyi shi: khao: ngo" ajhin ngad: ra".

³Aimung: nga" ba nam pho" wa Yerusalem we' Yuda mung" mae na ko" ra" mung" byu qe we"- nga" sabyi khyae we' nga" agyo: mae dao: kho' gela,-

⁴Ai: khyae qhid' mae" ngo daja: ja: makad' lo: lhaui" to: co' ra" i? Aire pe"mung: ngo myid: lao" to" ra" sabyi shi: mazaui: lo: sabyi shi: ajhin jham zaui" thug' li" ra" i?

⁵Ngo ceru: kad' zai ngad:- aire kyae" lhang" to" ra" khyae re yu: pye' nae". Aire gug: gam: to" ra" khyae bao re phyo' khyo" pye' nae". Aimung: aire seyo: gug'nyhug' jham re zo: nhao mung: zab: nhae" pye' nhao nae".

⁶Ngo wa aire myo, se: nhai" pye' nhao nae". sabyi naui re macu: shaung- aire makhoe' nhau" nae". Ai: atha" zau: we' zau: kyi aimae se: nghoe' pye' nhao nae". Ai: dao mae mug: maqu byid: nae" lhao" re: nhag' qhid' re tam" pye' nae".

⁷Qam: bo: ra" ASANG: sabyi khyae wa Israel ngad: ra". Yuda byu qe wa yao: qho" to" ra" sabyi naui jham ngad: ako". Yao: bam gai: ra" lo, mau" kad' genae" rure yao: myid: lao" ra". Ngadqere: ai: atha" yao: bam wa byuse' mau" kad' ako". Yao: bam jo: ru kad' genae" rure yao: myid: lao" ra". Ngadqere: yao: bam: dae kham zo: mo, wa tarha" din: nyang: rure mho' yao: na: ako".

⁸Naonhaung" wa jeim" avako". Naonhaung" qo" to: gau mae laung: nae" qhid' mae" yham we' yothaung: jham re naonhaung" vai: ako". Mamyao" re aimae gaje khag' re: na jo, qo majo, nae". Ai: mung" mae naonhaung" za: na: jo, genae".

⁹Ce: qi" ru we' gai: ra" yham jham alhab' wa akeim byo; jo; li" genae".

¹⁰Yo khyao: daxe bo: ra" sabyi khyae wa sabyi qang: she' soe: za: thug' li" nae". Amyug: daxe tang wa gaug shi: datang za: thug' li" nae"- ga: qam: bo: ra" ASANG ta" rure ngo the' gyo: va".

¹¹Naonhaung" jeim" avako". Naonhaung" wa ne, seim no' yhid shaug' nae" yab so: to" li" mung: myi" gae gaung: joe" sho' shaug' yid: na: ako".

¹²Naonhaung" poe jham mae tang:- lo, be, jhu jao kheim"- khalhao: jham we' sabyi qang: qo" ako". Ngadqere: ASANG pe" kad' nae" rure naonhaung" maba: gyo: ngad: ako".

¹³Aimung: naonhaung" wa kyam: byu qere we' dakhyo: taung" jhui" lo" ru qhug' li" genae". Naonhaung" nho: au: jhaung qe wa vae: moe' shid mung: mung" byu qe wa qid shab' shid: li" genae".

¹⁴Movo: mug: wa yao: bam re zo: nug: na mung: ai bam: qhid' mae" nhad' lae sho' ho" ci: ra". Yerusalem nho: byu zang qe wa mung" byu qe we' daga" lhad' myug: pye' ra".

¹⁵Yaug khao: ngo" qho' phau: mung: ngad beim: mo, alhab' wa nyham: khyo" pye' ru qhug' li" genae".

¹⁶Ngadqere: qam: bo: ra" ASANG wa jo: ra" mau" kad' yang: yao" qi" qhang: rure qhu" byid' ra". Yao" byumyu" re dao: kho' ra" khyo" yang yao" gyang" lho" rure qhu" byid' ra".

¹⁷Byo; qeim: jo; ra" vogaung: jham mae yao nau" qe wa mhin: lhae: zo: mung: cad' be, nau" jham wa mhin: gyo, jao: gai qhug' li" genae".

¹⁸Naonhaung" jeim" avako". Naonhaung" wa naonhaung" yao" qobo mae" maqo" khao" khyad' ngad: ako".

¹⁹Ngonhaung" aire qo" the' myao sho' yao: kad' nae" ga: ta" to" ra" mau" re phyad phyad ASANG re kad' nhao gelang:- yao" yaung: to" ra" mau" jham re Israel nho: gyang" lho" ASANG re kad' nhao gelang:- yao" myid mae pe" bo: rure ngonhaung" qu" gelang: ga:- naonhaung" ta" ako".

²⁰Naonhaung" jeim" avako". Makhyang" rure gai: ga:- gai: rure wa makhyang: ga: naonhaung" ta" ako". Mug: bo" re mug: cad'- mug: cad' re mug: bo" naonhaung" phaug' lhag' pye' ako". Akho: re acug- acug re wa akho: kad' pye' ako".

²¹Naonhaung" jeim" avako". Naonhaung" pha,jhi" bo:- gyai nhag' bo: ga: naonhaung" myid: jho: ako".

²²Naonhaung" jeim" avako". sabyi qang: soe: nho: sulhe: qe- sabyi qang: phaung: ru shaug' nae" ngad lao"- gyai vae" mo, gyaug myid mabo mo, ngad: ako".

²³Ngadqere: khug vag: o yang: za: qobo qo" yaug re naonhaung" lhoe' ke' ako". Pe" qobo maqo" yaug re tarha" din: nyang: ru maqo" yu losho' tam" pye' ako".

²⁴Aimung: ana" khovho we' myo, kyaug' kyaug' jab: lo" ruru: ngad mung:- myi: mae nga" lo" ra". Naonhaung" nho: agyi: jham wa man: lo" mung: naonhaung" bin: bu" wa sham: kyaug' lo" mung: cidao" lo" byaug: li" nae". Pe"mung:ga"re Israel nho: gyang" lho" ra" Mao"So- qam: bo: ra" ASANG: yang ngonhaung" re mho" shid' to" rure naonhaung" ngag: pye' geyang: ngad: ako".

²⁵ASANG wa yao" byu qere nhag' yo: mung: yao: bam re qobo dae byid: nae" qhid' mae" yao" lo, re yheim" ke' ra". Bam jham wa laui" nin" li" genae". Sushid mao gaung jham wa basad we' dakhyo: hau" mo" khyo jham mae lang" jo; li" genae". Airu: ngad sho' ngadqere: ASANG: nhag' yo: wa magyo" nae". Yao" lo, kam" wa qobo dae byid: nae" ayheim" to: shinae" ngad: ra".

²⁶ASANG wa va: mae na ko" ra" byumyu" qere khai nae" ave, byid' ra". Myid gaung thao" sho' mae" li" genae" qhid' mae" yao: bam re lo, mo" mad yang: khai: ke' ra". Yao: bam phyad za: joe" li" ako".

²⁷Yao: bam mae" dayaug re: mamyaung:- dayaug re: khyid au: mathaung" lang:- yao: bam khonhae" re: mayab macam: phyid' cui: re: mashoe- khyid zhaung: taui: re: mabyid-

²⁸Yao: bam: myo: jham wa ceim mung:- yao: bam: lo, la: jham wa bag nae" jin" jin" ngad: ako". Yao: bam: myao: jham: khyid khusin: jham wa be, laug qhi" qao: ako". Yao: bam: myao: lhin" ce' wa la sham" qhi" yam: ako".

²⁹Gyezo: qe wa gug'nyhug' dadau: re qo" bin" yu ko" ra" khang khyi jham ru: kyid' mung: khag' re: ai jham: lo, mae" maye qo" yu ngad: ra".

³⁰Ai: ba na joe" lo lao"- panglai: myang thoe qhi" qi" ra" thoe: yang Israel re yao: bam kyid' li" genae". Ce: mung"dan: re qu" ge,- no, sang kyid cad' jo, mung: nhag' lam: thao" pho: ngad: ra" wo"- mug: bo" wa mug: cad' yang myug: pye' ru qhug' ava"- ga: ta" ra".