Read Maru ESAIA 50 Bible Online

ESAIA 50 - Maru bible

ESAIA 50

¹ASANG ta" ra"- yao" yham sang myhi" re kao" pye' ra" yauggai we' dakhyo: ngo wa nga" byu qere nhao: ke' nae" ngad: ein: naonhaung" jho ko" i? Aire kao: mugsug' khomae ngad: i? Jeim khyo" yao" zoshao qere aung: zo" pye' ra" byu dayaug we' dakhyo: ngo wa nao re thaung laung" nae" khyo aung: zo" pye' ra" ein: jho: i? Mangad:- nao kyam: byu khyo" cao" lo" ru wa naoyao" qobo mathao mae ngad: ra". Nao nhao: ke' qhug' ru wa ni" yug: mau" mathao mae ngad: ra". Ni" myhi" kao" pye' qhug' ru wa ni" qobo yug: yang ngad: ra".

²Ngo yao: bam re khyad' yu nae" yao: bam jhao" ye" au:- nga" byu qe wa aire pe"mung: maphaug' tau: lo: kad' ko" ra" i? Ngo yang yao: bam re khai: au: yao: bam pe"mung: matau: ko" ra" i? Ngo wa yao: bam re khyad' yu nae" qam: saung" nang: yaug ngad: i? Qid maqo" yang: aimae na ko" ra" ngo: jham shid nae" qhid' mae" ngo wa amyin" dao" yang panglai: re qo" kin" ho: lo" nhao mung: qid gyaung: re din"pyad' yo qo" kad' pye' ra".

³Ngo wa su shid re kaug' ngug: ru we' dakhyo: mug:gaung re qo" cad' no; lo" nhao: ra".

⁴Dug myaung: mo, re ngo qam: qo" byid: nae" qhid' mae" ASANG kho:kham wa ngo khoru: ta" nae" rure ngore mho" shid' ava". Ne, seim khao: ngo" yao: ngore mho" shid' nae" rure gyo: nug kao bau myid ke' byid' ra".

⁵ASANG wa ngore ba: gyo" ra" myid byid' to: mung: ngo geim lau mato"- yao: mae" re: ngo maphaug' lo".

⁶Ngo re be; ra" mo, re nga" dao gaung: cin re ngo khae byid'- yao: bam ngore roe" ko" au: ngo yao: bam re matam" pye'. Nga" nhad' maui: re yao: bam phan" ko" au: we' nga" myo, khung: re khota: phoe" sheim: ko" au: ngo yao: bam re matam" pye'.

⁷Ngadqere: ASANG kho:kham: yang ngore bao" thaug' byid' ruyang yao: bam roe" ru wa ngore dae maqo" te' ngad: ra". Ngo aijham re qo" zang: qhao" nae" ngo yao" gaung re ngo phin" ci: ra" ngo nga: mayeim nae" rure ngo ba:-

⁸Pe"mung:ga"re Mao"So wa ajhao" mae na mung: ngo pe" qobo maqo" ra" khyo re yao: sagse: qhu" byid' li" nae". Ngo re gye kad' yaug: qobo khag' qo" zhaug' i? tarha" yung" khyo daga" ye: gelang:- Yao" nho: qobo zhaug' ra" khyo jham yao: re cili" nhao ge,.

⁹ASANG kho:kham yao: yao: ngo re gye vha byid' ra". Aire ngore qobo qo" ra" ga: khoyaug sagse: qo" qhu" i? Ngo re qobo zhaug' mo, alhab' baui" byaug: li" genae". Yao: bam wa nhug: yang zo" pye' ra" mai bau: we' dakhyo: man" byaug li" genae".

¹⁰ASANG re nga: yhe' byid: ko" ra" mo, alhab' we' yao" daui daui yaug: mho dao: re tae" gyo: mo, we"- Naonhaung" su" ra" khyodang wa gaigai: cad' re cad' jo, nae". Ngadqere: ASANG re lam khug mung: naonhaung" Mao"So re ngha ge,.

¹¹Su gaje qere phyo' qheim" pye' nae" gye khug' kad' mo, naonhaung" alhab' wa naonhaung" yao" gye khug' kad' ra" mau" yang yao: phyo' qheim" pye' ru qhug' li" genae". ASANG yao: yao: ceru re boe" nhao: li" nae". Naonhaung" wa nhag' lam: mamyan: makhyad' dayin dayo: qug: khai: kham zo" li" genae".