Read Maru ESAIA 52 Bible Online

ESAIA 52 - Maru bible

ESAIA 52

¹Yerusalem we"- qam: bo mung: dam: khid wa,. Mao"So: gyang" lho" vogaung: we"- yaung" khid: ru we' naoyao" gaung re shaung: ve; ci wa,. So alho re caung:pa" ra" taung bug qe wa ni" kham: mae khonhae" re: maqo" dam: vao genae".

²Yerusalem we"- naoyao" gaung re loe, sho' ko khyad' yu wa,. Phalhug mae" to" mung: naoyao" tao" khau" mae zaung wa,. Ziun nho: kyam: byu qe we"- nao re taui" to" ra" jao co: jham re pheim wa,.

³ASANG- kho:kham wa yao" byu qere- naonhaung" jeim boe" lo ko" au:- naonhaung" qhid' mae" ngaui mabyid: ca". Ai we' dakhyo: naonhaung" re lhoe' ke' nae" qhid' mae" re: mabyid: ca" nae".

⁴Taung bug byu qekhyo"- naonhaung" Egutu mae yena ko" au:- naonhaung" yao" myid khyo" ye" lo" ako". Ngadqere: Asuri wa naonhaung" re maqad maqui" deim" zag yang: naonhaung" re jhui" lo" byaug mung: naonhaung" qhid' mae" pe" mabyid: ca" ngad: ako".

⁵Ana" Babelon mae re: dakhyo: za: boe" ava". Naonhaung" wa kyam: byu qe ngad: ako". Naonhaung" qhid' mae" pe" re: mabyid: ngad: ako". Naonhaung" re eib: ra" mo, wa phug mung: abang mabyid ngore maphug' makhyad' kad' ako".

⁶Ngo wa Mao"So ngad mung: naonhaung" re ngo dao: jhau: to: yaug ngad: rure lhang: yu genae" ra" ayo, joe" lo: li" nae"- ga: ta" ra".

⁷Lau dao: gai ngad: ra" ngaui pyo: yaug yo: ra" lau dao: vin yang: bam jham re lai: phyid' yang: li" na: ra" lagyo: dayaug re the' myao: ru wa mug' pho: yao: ngad: lhe". Yao: wa aung doe; khyo re ta" hau: mung: Ziun re- ni" Mao"So wa kho:kham ngad: ra" wo"-

⁸Vogaung: re zaung" mo, wa zag: hug' na: ako". Bau: yang: daga" za: zag: hug' na: ako". Ziun khyo ASANG tug' lo: rure yao: bam yao" myo; yang yao: yao: bam the' myao: li" genae".

⁹Byo; qeim: jo; ra" Yerusalem nao we"- ngaui bau: yang: zag: hug' ke' wa,. ASANG wa yao" vogaung: re khyad' yu mung: yao" byu qere nhag' tang" byid' li" nae".

¹⁰ASANG wa yao" gyang" lho" qam: so' re ci: li" nae". Yao: wa yao" byu qere khyad' yu mung: mug: myid byu alhab' wa aire the' myao: li" genae".

¹¹Caung:pa" Yham zai re dao mo, naonhaung" alhab' we" Babelon mae" gaigai: yao: thug' lo" ge,- tam" to" ra" ja: re datin: ge,. Naonhaung" yao" gaung re gyang" lho" nhao mung: thug' lo" ge,.

¹²Celhang wa naonhaung" ahin agyan thug' lo" ca" genae" mangad:- Phao: loe; nae" naonhaung" qam: ke' ca" genae" mangad:- Naonhaung" Mao"So ASANG wa naonhaung" re jhui: mung: shad' khao: ngo" mae naonhaung" re gug: gam byid' li" nae".

¹³ASANG wa- nga" daui daui yaug wa yao" mau" re aung myaug sho' kad' li" nae". Yao: wa gyai myhao sho' nga: yhe' byid' ru qhug' li" nae".

¹⁴Yao: re the' myao gelao"- byu myo: sho' mo, mo; byaug genae". Yao: wa byu we' madau losho' gaung khyao myo, khung: qeim: byaug: ra".

¹⁵Ngadqere: ana" byumyu" mung"dan: myo: sho' wa yao: re qu" mug' li" genae". Kho:kham qe wa mug' yang: tae" byaug: li" genae". Yao: bam wa yao: bam khonhae" re: maba: qu" ra" ja: re the' myao mung: ba: gyo" yu: li" genae"- ga: ta" ra".