Read Maru ESAIA 53 Bible Online

ESAIA 53 - Maru bible

ESAIA 53

¹Byu qe wa- ngonhaung" ana" ta" ra" lau re khag' lam" ako" i? Ce: mau" mae ASANG: lo, re khag' the' myao: ako" i?

²Yao" daui daui yaug wa kyaug' gao: ra" myid gaung mae agyi: cin" ra" agae we' dakhyo: ngad: nae" ru wa ASANG: myid o: ra" khyo ngad: ra". Yao: wa ngonhaung" yang yao: re qu" xam: nae" ra" ve, ngau:- yaung" shab' ru maqo" ngad: ra". Yao" khyo we' sin: mung: qu" kao bau nae" pe" majo, ngad: ra". Ngonhaung" re yao: jhao" she: yu nae" pe" mabo ngad: ra".

³Ngonhaung" yao: re maphug' makhyad' kad' mung: yao: re ngag: pye' va". Yao: wa dayin dayo: qug: khai: re we' no: rure kham zo" ava". Yao: re qu" lhao" re: khag' maqu" ngad: ako". Ngonhaung" wa yao: re- pe" mangad: yaug reru: qu" lhaui" pye' bam va".

⁴Ngadqere: ngonhaung" nho: ngad: ra" dayin dayo: qug: khai: re we' ngonhaung" kham zo: ang: ra" dayin dayo: no: rure re: yao: kham zo" ava". Yao: kham zo" ra" dayin dayo: wa Mao"So: yang nhao: ke' ra" qobo dae ngad: ra" ein: ngonhaung" jho: na:-

⁵Ngadqere: ngonhaung" qobo jham: mathao mae yao: dae de' ava". Ngonhaung" kad' ra" makhyang" ra" lo, mau" mathao mae be; ru qhug' ava". Ngonhaung" wa yao: kham zo" ra" dayin dayo: qobo dae khyo" yang gai byid: qhug' va". Yao: qhug' zo" ra" zhab' thaung" ra" dae khyo" yang ngonhaung" gai byid' ru qhug' va".

⁶Ngonhaung" alhab' wa yao: we' dakhyo: byaug: lo" bam va". Ngonhaung" yaug khao: ngo" wa yao: yao: o: khyo lo" bam va". Ngadqere: ASANG wa ngonhaung" alhab' mo, kham zo: man" ra" qobo dae ngad: ra". Qobo dae re yao" dao mae gyo" zao" nhao: ra".

⁷Yao: wa se' da: be, khyad' kad' ru qhug' ngadqere: aire nyham: khyo" yang zang: qhao" ra". Yao: wa khonhae" re: dao: dakheim: mamung- se' pye' nae" ngad: ra" yao nau" we' dakhyo:- yao mug' qaug nae" ngad: ra" yao we' dakhyo: yao: wa khonhae" re: dao: dakheim: mata" ngad: ra".

⁸Yao: wa taung" yu qhug' yang: dao: phyid' ru qhug' mung: shid nae" khyo jhui" thug' lo" qhug' ra". Yao" au: pa lo, kyo' re khag' re: maqo" myao byid: ngad: ako". Ngonhaung" byumyu" qenho: qobo qhid' mae" yao: se' pye' qhug' ra".

⁹Yao: wa khonhae" re: yug: mau" makad' mhug' dao: mata" qu" sho' ngadqere: lab mae makhyang" ra" byu qe we' daga" ke' to: qhug' mung: jo,nho" qo" yaug we' daga" nyhab' shaung: pye' ru qhug' ra"- ga: phaug' tau" ako".

¹⁰ASANG wa- Yao: qug: khai: dayin dayo: kham zo: nae" ru wa nga" myid o: ra" khyo ngad:- yao: shid: ru wa qobo khyad' byid' rure boe" nhao: ra" ngaui" xeim: ngad: ra". Airumung: yao: wa yao" myid:zo: qere the' myao: li" nae". Yao: wa kao qhang sho' daui: na: li" nae". Yao: khyo" yang nga" myid: yaung: ru wa aung myaug: lo: li" nae".

¹¹Qug: khai: dayin dayo: boe" thao re yao: wa ngaui bau" ru dam: qo" yu: li" nae". Yao: mageim: aje mae dayin dayo: jam jau kham zo" ru mangad' ra" khyo re yao: ba: li" nae". Nga" nho: dangman" ra" nga" daui daui yaug ngo o ngaui: ra" yaug wa byu myo: sho' nho: qobo dae re vin: pye' byid' li" nae". Yao" mathao mae ngo wa yao: bam re qobo khyad' pye' byid: nae".

¹²Aimung: ngo wa yao: re nga: yhe' ra" jo, qo byid: mung: byuzang qe we' qam: so' qo" ra" mo; phaung mae jo, qo byid: nae". Yao: wa yao" kao so' re ngaui ngaui za: byid' pye' mung: makhyang" ra" byu qe: au: pa mae bokham: yu: ra". Yao: wa qobo jab qe myo: sho' mo; nho: qobo re vin: pye' mung: yao: bam: qobo khyad' pye' byid' ru qhug' geshao: akyu" mho' ra"- ga: ta" ra".