Read Maru ESAIA 54 Bible Online

ESAIA 54 - Maru bible

ESAIA 54

¹Yerusalem we"- nao wa bug daung: myiqe: dayaug we' dakhyo: boe" lai: lo: ra". Ngadqere: ana" nao wa bau: yang: nghaui"caung: ru we' qo" zag: hug' ava". Ana" nao wa yham sang pho" yang khonhae" re: mato: co' ra" myiqe: dayaug tho' zoshao je: qo" li" nae" wo".

²Ni" zaung je: qi: sho' ce: wa,- ainho: taui: jham re je: qhang sho' kad' mung: daung" zang jham re tang sho' kad' wa,.

³Nao wa ni" nho: mug: kyo: jham re shad' khao: ngo" khyo ce" ke' li" nae". Ana" gatau: byumyu" qeyang sang: ci: ra" mung"dan: re ni" byu qe dam: qo" yu: li" genae". Ana" cae: jhug tag boe" jo; ra" vogaung: jham wa vobyu jham we' byang" jo; li" nae".

⁴Dagyaug wa,- nao nga: yeim: ru dam: qhug' nae" mangad:- Nao nyham khyo" pye' ru qhug' nae" mangad:- Apyad ngai: ra" yham sang myhi" we' dakhyo: ni" nho: jhaug' mazaug: rure we' cug' mo" we' dakhyo: ni" nho: nhag' kyo: nhag' gyae boe" ru we' nhag' lam: gyug' rure nao to" myhid' pye' li" nae".

⁵Nao re phan" to: yaug wa ni" yham sang pho" we' dakhyo: ngad: li" nae". Yao" mang wa qam: bo: ra" ASANG ngad: ra". Israel nho: gyang" lho" Mao"So wa nao re khyad' yu: li" nae". Yao: wa mug: myid geim" nho: kho:kham ngad: ra".

⁶Israel we" nao wa yao" yham sang pho" yang shapye' to: co' yang: xo sho' nhag' lam: thao" byaug: ra" apyad ngai: ra" yham sang myhi" we' dakhyo: ngad: ra". Ngadqere: ASANG wa nao re yao: jhao" dam: khai: tug' yu nae"- ga: ta" ra".

⁷Nao re ngo dazab za: ato: co'- gyai jhid'de; ru we' nao re ngo dam: khai: tug' yu nae".

⁸Ngo wa nhag' yo: yang: dazab zo: ngo nao mae" phaug' lo" ru ngad:- Ngadqere: apyad ato mae nga" jhid'de; myid ngo nao re qhu" byid: nae"- ga: nao re khyad' yu ra" ASANG airu: ta" ra".

⁹Noa nho: pyad mae myid gaung re khonhae" re: daqid madam: shi: nae" ngo dao:so: byid' to: va". Ana" nao re ngo nhag' madam: yo: lo nae" ein: ngo dao:so: byid' ra". Ngo wa nao re qeim re: maqeim qobo dae re: mabyid: nae".

¹⁰Bam jham we' bug gaung jham gyoe; re gyoe; lo" li" genae". Ngadqere: nao re jhid'de; ra" nga" jhid'de; myid wa- khonhae" re: mathao" nae". Nga" nho: ngaui pyo: yaug yo: ra" dao:so: re apyad ato mae phug' cao" nae"- ga: ta" ra". Nao re jhid'de' ra" ASANG airu: ta" ra".

¹¹ASANG wa- o" dayin dayo: qug: khai: kham zo" ru we' masho: majhin boe" jo; mung: nao re nhag' tang" byid: nae" khag' mana: ra" Yerusalem nao we"- ngo wa ni" apan aqao: re phug' de; ra" laug jham: yang zao nae".

¹²Ngo wa ni" gyebyu zaung jham re laug sin" yang kad' mung:- ni" kham: jham re myi: ru: bao: ra" laug jham: yang ngo kad' nae". Amung: nao re lhang" gam" to" ra" vang jham re wa phug' de; ra" laug- qhang zai jham: yang kad' nae".

¹³Ni" vobyu qere ngoyao: mho" shid' nae". Jo,nho" na: dai: ru we' ngaui pyo: yaug yo: ru yao: bam re byid: nae".

¹⁴Tarha" din nyang: ru we' jo: ru wa nao re qam: bo nhao: li" nae". Nao wa zag zo" ru we' gyaug ci" rumae" gug: gam: ru qhug' yu: li" nae".

¹⁵Nao re dayaug yaug khe' zin" re- yao: wa nga" myid vang" ru mabo lo: aire makad' nae". Nao re gyekhe' ra" yaug khag' ngadqere: gyo" lo" li" genae".

¹⁶Myikhyeim" we' be; to" ra" shae lhae jham re kad' yaug shae kad' yaug re ngo phan" to" ra". Ngo wa byuse' nae" ai: shae lhae re ci: ra" gyezo: re: ngo phan" to" ra".

¹⁷Ngadqere: nao re pe" shae lhae: yang re: dae maqo" te' nae". Nao re qobo zhaug' ra" mo, alhab' re phaug' tau: nae" dao: nao qo" li" nae". Nga" daui daui mo, re ngo gye vha byid: mung: yao: bam re aung doe; ru ngo byid: nae"- ga: ta" ra". ASANG ta" to" ava".