Read Maru ESAIA 56 Bible Online

ESAIA 56 - Maru bible

ESAIA 56

¹ASANG wa yao" byumyu" re- din:man" ru we' jo: rure kad' ge,. Pe"mung:ga"re mamyao" re ngo naonhaung" re khyad' yu nae".

²Dugno: Ba re khonhae" re: phug' cao" mo, we' aire mangad' ra" khyo makad' mo, re ngo shaman" byid: nae". Makhyang" ra" mau" pe" makad' mo, re ngo shaman" byid: nae"- ga: ta" ra".

³ASANG: byu qe we' qham va" ra" taung bug byu wa- ASANG wa yao" byu qe we' ngore daga" caung:pa" nae" akhang" mabyid: ngad: ra"- ga: ta" nae" ma ang ngad: ako". Daung" pye' va" yaug wa yao: zoshao magai: myhung: ruyang yao: wa khonhae" re: Mao"So: byu qemae magai: bobo ga: khonhae" re: magai: myid ngad: ra".

⁴ASANG wa airu" ra" yaug re- Dugno: Ba re phug' cao" ra" khyo" yang nao ngore nga: yhe' byid: ngore ngaui nhao: ra" mau" re kad' mung: nga" nho: dao: thang" re jhaug' zaug za: phug' cao" yang: ngad: re-

⁵Ni" mang wa nga" Caung:pa" Yham mae xam" to" ru qhug' mung: nao yauggai myiqe: zo: qe qo" ra" tho' nga" byu qe: phaung mae je: myo: nhao nae". Nao wa to" myhid' pye' ru khonhae" re: maqhug' nae"- ga: ta" ra".

⁶ASANG wa yao" byumyu" mae bobo: lo gemung:- yao: re jhid'de; ru we' caung: da" byid: mo,- Dugno: Ba re phug' cao" mo,- amung: yao" dao: thang" re jhaug' zaug za: phug' cao" mo, ngad ko" ra" taung bug byu qere-

⁷Ngo wa naonhaung" re nga" gyang" lho" bug gaung Ziun khyo jhui" ye: mung: nga" akyu" mho' yham mae naonhaung" re ngaui bau" ru byid: nae". Amung: nga" phan dao mae nao ngaui" byid' ra" ngaui" xeim: jham re khae: yu byid: nae"- nga" Caung:pa" Yham wa byumyu" alhab' qenho: akyu" mho' yham ga: mhang" li" genae"- ga: ta" ra".

⁸Yao" byumyu" Israel re pyaung" nha: to" ru qhug' ra" jo, qo mae" yham khyo jhui" lo yaug ASANG kho:kham wa ai bam we' qhan: nae" qhid' mae" yao: wa byumyu" gatau rere: lo jhui" shinae" ngad: ra" khyo re dao:so: byid' to" ra".

⁹ASANG wa taung bug byumyu" qere seyo: gug'nyhug' lhe: jham we' dakhyo: joe" li" mung: yao" byu qere li" zo" pye' genae" qhid' mae" ta" to" ra".

¹⁰Yao: wa- nga" byu qere ta" peim: byid: nhohab ngad ko" ra" au: jhaung qe alhab' wa myo, jid ngad: ako". Yao: bam pe" maba ngad: ako". Yao: bam wa maqe, lo:- lhaug' qu" na: ra" lakha: jham we' dau: ako". Aibam wa lang" jo, mung: yab mo, za: mo; na: ako". Yao: bam yab so' za: kho' ako".

¹¹Yao: bam wa khonhae" re: ga" ga: ru majo, mung: so' kho' ra" lakha: jham we' dau: ako". Ce: au: jhaung qe wa ba: gyo" ru maqo" ngad: ako". Yao: bam mae" yaug khao: ngo" wa yao: o ngaui ruru: kad' mung: yao: yao" akyu" qhid' mae" za: qho: ako".

¹²Ai: yhid kha: qe wa- sabyi qhang: dajhid' shaug' gelang:- ngonhaung" ga" sho' shaug' gelang:- ne, mo" ba wa ana" ba tho' lhao" je: gai nae"- ga: ta" ako".