Read Maru ESAIA 58 Bible Online

ESAIA 58 - Maru bible

ESAIA 58

¹ASANG wa- naonhaung" qo" hug' qhi" thoe qi: ke' yang: hug' ge,. Nga" byumyu" Israel re yao: bam: qobo khyo re ta" kyo: ge,.

²Yao: bam wa ngore ba khao: ngo" caung:pa" byid: mung: yao: bam nga" khyo re ba nug kao bau: ru we' nga" tarha" jham re phug' cao" na:- ga: ta" na: ako". Yao: bam wa yao: bam re din: man" ra" tarha" jham re za: ngore byid: nhao nug mung: yao: bam ngore caung:pa" rumae pyo: khyo qho: na: ru ngad:- ga: ta" ako" ga: ta" ra".

³Mo,byu qe wa ASANG ngonhaung" re khonhae" re: mamyao byid' ru- ngonhaung" pe"mung: zo:ve jao" nae" ang: i? Yao: ngonhaung" re nyang" maqu" na: ru- ngonhaung" pe"mung: zo:ve mazo: lo: na nae" ang: i? ga: myid' ako". ASANG wa yao: bam re dangman" ra" khyo wa- naonhaung" zo:ve jao" au: mae yao:- naonhaung" yao" myid o: rure cao" kad' ako". Naonhaung" nho: mau" zaui: okaung qere zag zo" ako".

⁴Naonhaung" nho: zo:ve jao" ru wa naonhaung" re aqan alan boe" nhao: ra". Naonhaung" myan" myo: mung: jho" byo, ko" ru ngad: ra". Ceru" ra" zo:ve jao" ru wa- naonhaung" akyu" mho' dao: jham re ngore tae" gyo: nhao: li" nae" ein: naonhaung" jho ko" i?

⁵Naonhaung" zo:ve jao" gelao" naonhaung" yao" gaung re dayin dayo: kham zo: nhao: ako". Naonhaung" wa myo, shang: we' dakhyo: naonhaung" au: re goe; gyo" ako". Jid: mo" mai bau: re phyid: myhung" to: mung: myiqe, bam dao mae lang" jo; ako". Zo: ve jao" ga: naonhaung" mhang" ru ai ngad va" i? Aire ngo o ngaui nae" ein: naonhaung" jho ko" i?

⁶Ngo o: ra" zo:ve jao" ra" khyo ja: wa ceru ngad: ra". Zag zo: qhug' ra" mo; jao co: jham re we' tarha" madin: man" kyau: re khyad' pye' byid: mung: zag: to: qhug' ra" mo, re lhoe' ke' byid' ru-

⁷Vae: moe; mo, we' naonhaung" zo:ve jho" myho" zo: yham maqo" myaung sho: mo, re naonhaung" yham kham: phung" byid:- mai bau: maqo" mo, re mai bau: gae byid:- naonhaung" yao" ba nam sang: cao: qere bao" thaug' byid' ra" khyo re maha: pye' ru ngad: ra".

⁸Ailao" nga" myo, nho byid' ru wa ne, seim ba we' dakhyo: naonhaung" dao mae zho byid' li" nae". Amung: naonhaung" dae khu jham wa phyad za: gai: lo" byaug nae". Naonhaung" re khyad' yu nae" ngo khonhae" re: naonhaung" we' daga" na nae". Ngo na: jo; ru wa naonhaung" re shad' khao: ngo" mae gug: gam byid' li" nae".

⁹Naonhaung" ngore akyu" mho' gelao"- ngo tae" gyo: byid: nae". Naonhaung" ngore khai gelao"- ngo phaug' tau: byid nae". Zag zo" ru maphug' makhyad' ra" ave, ja: khao: ngo" we' makhyang" ra" dao: kheim: khao: ngo" re naonhaung" thao" lo" nhao geyang: ngad: re-

¹⁰Vae: moe; mo, re- naonhaung" zo:ve byid: mung: qo ca" ra" mo, re naonhaung" nhag' dag nhao ko" ngad: re- naonhaung" re lhang" gam" to" ra" mug: cad' wa ba khaung tau yo, mae zho: ra" ba: zho ru: boe" lo" li" nae".

¹¹Ngo wa nao re khonhae" re: khyoshid' byid: mung: gai: ra" ja" yang nao re nhag' dag nhao nae". Ngo wa nao re qam: bo nhao mung: qao" zin" nhao nae". Naonhaung" wa qid magan: mago" qo" ra" lo" byaug: ra" qid thug' qid we' dakhyo: ngad: li" nae".

¹²Naonhaung" nho: byu qe wa myao" sho' byo; qeim: jo; rure dam: zao: to' mung: apan aqao: jham: axug' mae dam: zao: to' li" genae". Naonhaung" wa vang re zao mo, byo; jo; ra" yham jham re dam: nyhang" kad' mo, khyo" lahau: qi" li" genae"- ga: ta" ra".

¹³ASANG wa- naonhaung" wa Dugno: Ba re gyang" lho" ra" ba na khyo" phug' cao" mung: ai: ba na mae naoyao: myid o: ra" khyo" macao" kad' lo:ngad: re- naonhaung" wa nga" gyang" lho" ba na re phug' te' mung: ai: ba mae gyaung: masu- mau" mazaui:- dao: keim majhau lo: kad' ra" khyo" yang: ai: ba re nga: yhe' byid: yang: ngad: re-

¹⁴Ngo re caung da" byid' ra" khyo" yang joe" li" ra" ngaui bau" rure naonhaung" qhug' yu: li" genae". Ngo wa mug: myid geim" mae" mo; yang nao re nga: yhe' byid: nhao nae". Amung: naonhaung" phug' pho" Yaku re ngoyang byid' to" ra" mung"dan: mae naonhaung" re ngaui bau: nhao nae". ASANG ngo ta" to: va"- ga: ta" ra".