Read Maru ESAIA 59 Bible Online

ESAIA 59 - Maru bible

ESAIA 59

¹ASANG wa naonhaung" re khyad' yu nae" qam: saung" nang: yaug ngad:- bao" thaug' ru qhid' mae" naonhaung" mho' yao: rure gyo: byid: nae" no: saung" jid yaug ngad: ein: naonhaung" dajho ge,.

²Naonhaung" re yao: magyo: byid' ru wa naonhaung" qobo mathao mae ngad: ra". Naonhaung" yao: re caung:pa" byid: nae" seim" gelao"- naonhaung" re Mao"So mae" kao" pye' byid' ru wa naonhaung" qobo jham ngad: ra".

³Naonhaung" wa mhug' ru- aqan alan kad' ru- byu se' ru: qobo qo" ako".

⁴Naonhaung" tarha" yung" khyo ye" ako". Ngadqere: naonhaung" shad' mae tarha" din nyang: ru maqo" yu ngad: ako". Naonhaung" si: re aung nae" qhid' mae" mhug' ra" dao: jham re naonhaung" ngha: ako". Su gaje qere dae te' nae" naonhaung" yaung: to" ra" mau" jham re zaui" thug' ke' ako".

⁵Naonhaung" khug' kad' ra" makhyang" ra" mau" wa daug thin: ra" lhao maui au" jham ru: yao: shid pho: ngad: ra". A au" re khyoe' ke' lao"- lhao maui thug' li" ra" lhe"- ngadqere: naonhaung" khug' kad' ra" lo, mau" wa naonhaung" re pe" akyu" mabyid: ngad: ra". Aijham wa phyogao: yham: yang qo; ra" mai bau: we' dakhyo: akeim ngad: ra".

⁷Naonhaung" wa khonhae" re: makhyang" ra" mau" daja: ja: re kad' mung: naonhaung" aire kad' nae" mathan" lao" na ngad: ako". Naonhaung" wa khonhae" re: pe" qobo maqo" mo, re se' nae" hin mo, ngad: ako". Naonhaung" ye" ra" jo, qo khao: ngo" mae byo; qeim: ru za: tang" to: co' ako".

⁸Naonhaung" du" lhau lao"- khag' re: gug: gam maqo" ngad: ako". Naonhaung" kad' ra" mau" ja: khao: ngo" wa matarha" ru za: ngad: ra". Naonhaung" wa kaui: ra" khyodang re cao" ako". Ai: khyo mae cao" ra" mo, dayaug re: gug: gam: ru khonhae" re: maqo" genae".

⁹Mo,byu qe wa- ngonhaung" re zag zo" ra" mo; lo, mae" Mao"So pe"mung: ngonhaung" re makhyad' yu: ra" khyo re ana" ngonhaung" ba va". Ngonhaung" wa khyo su: nae" bo" bao re myid: lao" ngadqere: mug: cad' za: angad: jo; ra".

¹⁰Ngonhaung" myo, jid ra" byu qe we' dakhyo: ngonhaung" soe' lhau: ra". Ngonhaung" wa myi" mae na: au: ru:- movo: mug: mae" mug: cad' khug mae na: au: ru:- na" gaung re khyid au: thaung: va".

¹¹Ngonhaung" wa gyaug mung: nhag' lam: thao" va". Zag zo" rumae" we' shad' rumae" ngonhaung" re khyad' yu byid: nae" qhid' mae" Mao"So re ngonhaung" nhag' nghae" na:- ngadqere: pe" maboe" li" ngad: ra".

¹²ASANG we"- ngonhaung" nao re shad' ra" qobo yug: jham wa myo: sho' ngad: ra". Ngonhaung" wa aijham alhab' re nyang" beim: va".

¹³Ngonhaung" wa nao re tau: lhan: gye kad'- nao re ngag: ha: pye'- ni" thao cao" nae" ha: pye' bam va". Ngonhaung" wa su gaje qere zag zo: mung: nao mae" phaug' lo" bam va". Ngonhaung" myid: qu" ra" khyo jham wa shad' ra" ngonhaung" dao: jham wa mhug' dao: jham ngad: ra".

¹⁴Tarha" din nyang: ru wa khe' ke' qhug' ava". Jo: ru wa maqo" te' li" ngad: ra". Dangman" ru wa shava jao: mae tha" thu: lang: mung: myid din:man" ru wa aimae jo, qo maqo" ngad: ra".

¹⁵Din:man" ru saung" nang: yang: makhyang" ra" mau" kad' na: rure thang: pye' ra" yaug khag' ngadqere: qug: khai: kyi" khyag' dae kham zo: nae"- ga: ta" ra". ASANG wa cere the' myao mung: tarha" din nyang: ru majo; rure yao: mangaui ngad: ra".

¹⁶Yao: wa zag zo: qhug' mo, re bao" thaug' byid: nae" byu dayaug re: mana: rure the' myao yang: din: mug' pye' ra". Airumung: yao: wa ai bam re khyad' yu nae" we' aung doe; yu nae" qhid' mae" yao: yao" qam: so' re cili" nae".

¹⁷Yao: wa tarha" din: nyang: rure gyekhin adao: bau: we' dakhyo: ve, mung:- khyad' yu: ra" qam: so' re jo,to' maug we' dakhyo: zhaung" li" nae". Yao: wa jo: sho' kad' nae" we' shad' ra" khyo" dayin dayo: qug: khai: kham zo" na: ko" ra" mo; qhid' mae" qobo dae byid: nae" qhid' mae" lage, phaug' byid: nae" rure qi: sho' kao bau: rure yao: yao" gaung re ve; cili" nae".

¹⁸Yao: wa yao" gyevo qere yao: bam kad' rure cao" yang: qobo dae byid' li" nae". Va" ra" mung"dan: jham mae na ko" ra" mo, re lhao" re: qobo dae byid' li" nae".

¹⁹Ba thug' shad' mae" ba vao shad' joe" sho' mae" yaug khao: ngo" wa yao: re we' yao" qi" qhang: ra" qam: so' re gyaug: li" genae". Yao: wa qid bug thin: ra" qid gyaung: we' dakhyo:- thin: ra" la we' dakhyo: joe" li" li" nae".

²⁰ASANG wa yao" byu qere- naonhaung" re gye vha byid: nae" we' naonhaung" qobo jham mae" phaug' lo ko" ra" mo, naonhaung" alhab' re khyad' yu nae" qhid' mae" ngo Yerusalem khyo joe" li" nae".

²¹Ngo wa naonhaung" we' dao: thang" kad' to". Naonhaung" re byid' to" ra" nga" qam: so' we' nga" mho" shid' khyo wa naonhaung" qhid' mae" apyad ato ngad: ra". Ana" mae" thoegu: naonhaung" wa ngore mho dao: gyo: mung: naonhaung" zoshao qe we' myid:zo: qere joe" lo nae" ayo, geim" mae ngore mho dao: gyo: genae" qhid' mae" mho" shid' ge,- ga: ta" ra".