Read Maru ESAIA 6 Bible Online

ESAIA 6 - Maru bible

ESAIA 6

¹Kho:kham Uzia shid: ra" zin re ngo wa ASANG re the' myao:- yao: wa myhao mung: nga: yhe' to" ra" yao" tao" khau" dao mae zaung: jo; ra". Yao" bau: qhang wa Caung:pa" Yham geim" mae byang" jo; ra".

²Yao" lhang" gam: mae myi: de; ra" gug'nyhug' jham ye; jo, mung: dau: khao: ngo" daung khyaug' lam: lam: de; ako". Gug'nyhug' dau: khao: ngo" ci mung: gaung re wa daung shid' lam" yang nghoe' ci: ako". Gatau daung shid' lam" yang wa dao" ako".

³Yao: bam yao: cao:- Gyang" lho"- Gyang" lho"- Gyang" lho"- Qam: bo: ra" ASANG wa gyang" lho" yaug ngad:- Yao" phungbao wa mug: myid mae byang" jo; ra" wo"- ga: yao: cao: jho" ta" ako".

⁴Yao: bam: thoe: yang Caung:pa" Yham apan aqao: wa laui" nin" li" ra". Caung:pa" Yham wa myikhug' we' byang" li" ra".

⁵Ngo wa nga" qhid' mae" myid: lao" khyo majo, ngo wa jeim: va"- pe"mung:ga"re nga" nhad' qid mae" thug' lo" ra" dao: kheim: khao: ngo" wa qobo byang" jo; ra". Aimung: dao: kheim: khao: ngo" qobo jhau ko" ra" phaung mae ngo na: jo;- ngadqere: ngoyao" myo; yang yao: qam: bo: ra" ASANG kho:kham re the' myao va"- ein: ta" va".

⁶Ailao" gug'nyhug' jham mae" dadau: wa- phan dao mae" nye, zai" yang nyhae" yu: ra" myi: de; ra" myi:gyoe: dakhai" re ci yang ngojhao" dao" gyo" li" ra".

⁷Yao: wa myi: de; ra" myi:gyoe" yang nga" nhad' qid mae tin: byid: zo" re"- ceru ni" nhad' qid re tin: va"- ana" ni" qobo jham majo, lo:- ni" qobo jham re khyad' pye' byid: va"- ga: ta" ra".

⁸Ai: thao- khag' re ngo nhao: ke' nae" i? ngonhaung" lagyo: khag' ngad nae" i? ga: ASANG ta" rure ngo the' gyo". Ailao" ngo wa- ngo ye: nae"- ngore nhao: ke' la,- ein: phaug' tau: va".

⁹Airumung: yao: wa ngore ye: nhao mung: mung" byu qere ce: mungdao: byid' ke' ra". Aiwa- naonhaung" khonho" tae" gyo: ge ngadqere:- maba: gyo: genae". Naonhaung" khonho" qu" ge ngadqere: pe" boe" na: rure naonhaung" maba genae"- ga" ru ngad: ra".

¹⁰Ai: thao yao: wa ngore- yao: bam mathe' myao mathe' gyo: geshao- maba: gyo: genae" qhid' mae" ce: byumyu" qe: myid re cad' nhao mung: yao: bam: nokhye' jham re jid nhao wa,- yao: bam: myo, rere: jid nhao wa,- yao: bam the' myao- the' gyo:- ba: gyo: geyang: ngad: re wa yao: bam ngojhao" phaug' lo mung: gai byid' ru qhug' genae" ngad: ra"- ga: ngore ta" ra".

¹¹ASANG we"- ceru khomyhao" myao" nae" i? ein: ngo myid' ke'. Yao: wa vogaung: jham byo; lo" mung: akeim boe" yo, joe" sho'- yham jham mae byu mana: ra" ayo, joe" sho' mung"dan: yao: yao: re: cae: jhug tag boe" yo, joe" sho' myao" nae".

¹²Ngo wa amyu" byu qere va: khyo pyaung" nha: pye' mung: mung"dan: geim" re cae: jhug tag boe" nhao nae".

¹³Mung"dan: mae byu daxe yaug mae" dayaug za: dang sho' ngadqere: yao: re se' pye' ru qhug' nae". Yao: wa thau: khyang: pye' va" shikhai: gae angad we' dau: li" nae"- ga: tau" ra". (Sag' ngad wa Mao"So: byu qe: qhid' mae" asag' dam: qhid: li" rure gaung tha" qhu" byid' ru ngad: ra".)