Read Maru ESAIA 60 Bible Online

ESAIA 60 - Maru bible

ESAIA 60

¹Yerusalem we"- to" wa, ba we' dakhyo: zho wa,- ASANG: phungbao wa ni" dao mae zho: na: ra".

²Gatau: byumyu" qe wa mug: cad' yang nghoe' to" ru qhug' ako". Ngadqere: ni" dao mae wa ASANG: bo" bao zho: byid' li" nae". Yao" qhid' kheim: mae" bao qhui: ru wa- nao we' daga" ngad: li" nae".

³Byumyu" qe wa ni" bo" bao shad' khyo she: yu: ru qhug' li" nae". Kho:kham qe wa ni" ba na sag' nho: mug: bo" zo" khyo li" li" genae".

⁴Ni" lhang" gam: re qu" mung: pe" boe" na: rure myao wa,- ni" byu qe wa yham phao: lo nae" zang" ham: na: ako". Ni" yauggai zo: qe wa va: mae" joe" lo: li" genae". Ni" myiqe: zo: qe wa zoshao re we' dakhyo: ba: lo: ru qhug' li" genae".

⁵Nao wa ceru re the' myao mung: ngaui bau" ru byang" jo; li" genae". Nao wa bau: yang: ko, ko, nin" li" nae". Byumyu" qe: nho: jo,nho" wa nao jhao" cilo: ru qhug' li" genae". Pang:lai:: thoete' mae" yao: bam: jo,nho" jham joe" lo: li" nae".

⁶Midian we' Epha mae" gola:u do: tho phung: mo" zang joe" lo: li" genae". Yao: bam wa Sheba mae" qhang we' sheim nae pyo: ja: xau vin yang joe" lo: li" genae". Mo,byu qe wa ASANG kad' va" ra" khyo lau dao: gai re ta" li" genae".

⁷Keda we' Nebaiod yao jham alhab' re ngaui" xeim: khyo" nao jhao" cilo: li" genae". Amung: ASANG re ngaui nhao nae" qhid' mae" phan dao mae ngaui" byid' li" genae". ASANG wa yao: Caung:pa" Yham re ganhae" mae" tho' je yang phungbao byid' li" nae".

⁸Phaung" kyug' jham yham phao: lo: na: ru we' dakhyo:- ai: sang pho jham wa jham thaui: we' dakhyo: pe" thaui" do, lo: ako" i?

⁹Aijham wa va" ra" mung"dan: mae" ASANG: byu qere yham khyo jhui" lo: na: ra" qid sang pho jham ngad: ako". Yao: bam: byumyu" alhab' re yao" byu qere nga: yhe' byid: nhao yaug ngad: ra" Israel nho: gyang" lho" ra" Mao"So ASANG: mang re nga: yhe' byid: nae" ngaui we' qhang re yao: bam we' daga" tho: lo: ako".

¹⁰ASANG wa Yerusalem re- taung bug byu qe wa ni" vang jham re dam: zao: li" genae". Amung: yao: bam: kho:kham qe wa nao re caung da" byid' li" genae". Ngo nhag' yo: yang: nao re qobo dae byid: va". Ngadqere: ana" ngo wa nao re myo,nho we' nhag' khyag' shogu: ru qhu" byid: va".

¹¹Byumyu" qe: nho: kho:kham qe yao: bam: jo,nho" re nao jhao" qo" vin: li" genae" qhid' mae" ni" kham: jham re myi" re: na" re: phung" to: ca" li" nae".

¹²Ngadqere: nao re macaung da" byid' ra" byumyu" qe wa bin sho' phyo' qheim" pye' ru qhug' li" genae".

¹³Yerusalem nao re dam: zao nae" nga" Caung:pa" Yham re yaung" sho' kad' nae". Nga" vogaung: re phungbao bo sho' kad' nae" qhid' mae" qhoje; sag' junipa sag'- jam ga sag'- Lebanon sag' yo mae" gai: thao" ra" sag' jham re tho: lo: li" genae".

¹⁴Naonhaung" re zag zo: ko" ra" mo; nho: yauggai zo: qe- naonhaung" jhao" joe" li" gemung: yao: bam phug' myao: byid' rure qhu" byid: nae" goe; gyo" li" genae". Naonhaung" re ganhae" maphug' makhyad' kad' lo mo, wa naonhaung" khyid qao: mae caung:pa" li" genae". Yao: bam wa nao re- Israel Nho: Gyang" Lho" Ra" Mao"So: Nho: Vogaung: Ziun- ASANG: vogaung: ga: mhang" li" genae".

¹⁵Nao wa phao: cug' to: co' ru we' cae: jhug tag boe" jo; ra" vogaung:- shapye' to" ru we' nghang" ru maqhug' lo nae". Ngo wa nao re qi" qhang mung: yaung" sho' kad' nae". Apyad ato mae ngaui bau" ra" jo, qo kad' nae".

¹⁶Byumyu" qe we' kho:kham qe wa yao: myhi" yaug yao: zo: re caung: ru we' dakhyo: naonhaung" re gun caung: li" genae". ASANG ngo wa naonhaung" re khyad' yu mung:- Israel nho: qam: bo: ra" Mao"So: yang naonhaung" re lhoe' ke' byid' ru ngad: rure naonhaung" ba: li" genae".

¹⁷Ngo wa nao re gyid: atha" qhang- jo,to' we' sag' atha" ngaui we' gyid: re- laug baui atha" jo,to' re cilo byid: nae". Nao re eib: ra" mo, wa nao re mazag zo: lo: genae". Ngo wa yao: bam re tarha" din: man" ru we' ngaui pyo: yaug yo: ru we' eib nhao nae".

¹⁸Aqan alan mung: ra" thoe jham re mathe' gyo: lo nae". Phyo' qheim" ru wa ni" mung"dan: re madam: khyoe' mhan" pye' lo nae". Ngo wa nao re vang re we' dakhyo: gye vha mung: gug: gam byid: nae". Nao re ngo khyad' yu va" ruyang nao ngo re caung:khin" byid' li" nae".

¹⁹Na" mae ba wa ni" bo" bao mangad: lo nae". Amung: myi" mae lho" re: ni" bo" bao mangad: lo nae". ASANG ngo wa apyad ato mae ni" bo" bao ngad: li" nae". Nga" phungbao: nho: bo" bao wa ni" dao mae zho byid' li" nae".

²⁰Ni" nho: kaug' ngug: ra" ba na jham wa thao" lo" li" nae". ASANG ngo wa ni" nho: apyad ato: bo" bao ngad mung: ba we' lho" tho' je yang: myao" jo; li" nae".

²¹Ni" byu qe alhab' wa jo: ru re kad' li" genae". Amung: mung"dan: re apyad ato mae qo" sang: yu: li" genae". Byu alhab' re nga" qi" qhang: ra" khyo qhu" byid: nae" qhid' mae" ngo yao: bam re qho" lo: va". Yao: bam re phan" to: va".

²²Ni" nho: ngai thao" ru we' nyham: thao" ra" yham khaung lhao" re: qam: bo: ra" byumyu" qhi" qi" qhang sho' boe" lo: li" genae". Ayo, gai joe" lo lao"- ngo wa ceru re phyad za: boe" li" nhao nae". Ngo wa ASANG ngad:- ga: ta" ra".