Read Maru ESAIA 61 Bible Online

ESAIA 61 - Maru bible

ESAIA 61

¹ASANG kho:kham wa yao" byo ngo re pyang" byid' ava". Yao: wa myaung sho: mo, re lau dao: gai vin: ye: byid: nae"- nhag' lam: gyug: mo, re gai byid: nae". Thaung: byu qere lhoe' ke' byid' ra" khyo ta" hau: nae" thaung: laung" jo,mo, re lhoe' ke' byid: nae" qhid' mae" ngo re khyin: yu mung: nhao: ke' ava".

²ASANG: yang yao" byu qere khyad' yu mung: yao: bam: gyevo qere aung: pye' nae" ayo, joe" va" ra" khyo re ta" hau: nae" qhid' mae" yao: ngo re nhao: ke' ra". Yao: wa kaug' ngug: na: ra" mo, alhab' re nhag' tang" byid: nae".

³Ziun mae kaug' ngug: na: ra" mo, re kaug' ngug: ru atha" ngaui bau: ngaui lho" ru byid: nae". Kaug' ru atha" nghaui"caung: khin" nhao nae" qhid' mae" ngo re nhao: ke' ra". Yao: bam wa ASANG yao" yang qho" to" ra" sag' gae jham we' dakhyo: dau: li" genae". Yao: bam alhab' wa jo: rure kad' li" genae". Mao"So wa yao: kad' lo: ra" lo, mau" mathao mae caung:khin" byid' ru qhug' li" nae".

⁴Yao: bam wa myao" sho' byo; qeim: jo; ra" vogaung: jham re dam: zao: li" genae".

⁵Nga" byumyu" we"- taung bug byu qe wa naonhaung" re caung da" byid' li" genae". Yao: bam wa nga" yao kyaung" re gun caung byid: mung: naonhaung" myid gaung re yo kad'- naonhaung" nho: sabyi khyae jham re caung byid' li" genae".

⁶Amung: naonhaung" wa ASANG: nho: khinjaung qekhyo" re: ngonhaung" Mao"So: daui daui mo, khyo" re: lahau: qi" li" genae". Naonhaung" wa byumyu" qe: nho: jo,nho" jham qo" yhung: zo: mung: ai re naonhaung" nho: khyo" langa: kad' li" genae".

⁷Naonhaung" nho: qho' ru we' nga: yeim: ru wa thao" byaug: ra". Naonhaung" yao" mung" mae naonhaung" qo" na: li" genae". Amung: naonhaung" nho: jo,nho" wa shid' zhao" ngad: li" nae". Amung: naonhaung" nho: ngaui bau" ru wa apyad ato mae dang: jo; li" nae".

⁸ASANG wa- tarha" din: man" rure ngo jhid'de; mung: zag zo" ru we' qobo yug: mau" re ngo nghang" ra". Nga" byu qere ngo jhaug' zaug za: aphug' jhaung qhu" byid: mung:- apyad ato we' sin" ra" dao: thang" yao: bam we' kad' to: nae".

⁹Yao: bam wa byumyu" qe: phaung mae lahau: qi" li" genae". Yao: bam re myao: ra" mo, yaug khao: ngo" wa yao: bam re ngoyang shaman" byid' to" ra" byu qe ngad ko" ra" khyo re yao: bam ba li" genae"- ga: ta" ra".

¹⁰ASANG kad' ra" lo, mau" mathao mae Yerusalem ngaui bau" ra". Yao: wa yao" lo,xo' poe qhid' mae" shaung ve; ci: ra" myhi" sag' we' dau: li" nae". Mao"So wa yao: re khyad' yu: ru we' aung doe; ru yang shaung: vhe' to" ava".

¹¹Myug: shi: jham anyaug thug' li" mung: yaug: li" zai ngad: ru wa gaigai: ngad: ru we' dakhyo:- ASANG kho:kham wa yao" byu qere khyad' yu: li" nae". Amung: byumyu" qe alhab' wa yao: re caung:khin" li" genae".