Read Maru ESAIA 8 Bible Online

ESAIA 8 - Maru bible

ESAIA 8

¹ASANG wa ngore mugsug' tung" the: alu: re yu mung: ai: dao mae tung" ce' aqi: khyo"- nyag din taung" khe' zin" ru- phyad phyad lhad' yu: ra" lanyab ein: tung" wa,.

²Sagse: kad' nae" lam ga" ra" byu shid' yaug ngad ko" ra" khinjaung Uria we' Yeberekhia nho: yauggai zo: Zekharia shid' yaug re jhui" yu wa,- ga: ta" ra".

³Ai: thao mamyao" re nga" yham sang myhi" wa gaung la" li" ra". Nga" shid' tao: yauggai zo:khau: li" lao"- ASANG wa nyag din taung" phyad phyad lhad' yu: ra" lanyab ein: yao: re mang mhang" byid: wa,.

⁴Ai: yauggai nau" nga" pho" nga" myhi" ga: maba: ta" shire Damasku nho: jo,nho" alhab' we' Samari vogaung: mae" jo,nho" alhab' wa Asuri kho:kham: yang tai: phao: lo" byaug: ru qhug' genae"- ga: ngore ta" ra".

⁵ASANG wa ngore dao: dam: jhau: ra".

⁶Yao: wa Pe"mung:ga"re ce: byu qe wa Shilo gyaung: zo: mae" yaug yo: ra" qid re ngag: pye' mung: kho:kham Rezin we' kho:kham Peka nho: qhid' kheim: mae zab: nhae" pye' avako".

⁷ASANG ngo wa Asuri kho:sin" re we' yao" gyetab jham re Yuda mung" re khe' zin: nae" qhid' mae" jhui" lo nae". Aibam wa Uphrad gyaung: mo" wa qid yae alhab' re qid gyui gyui: nhai" pye' ru we' dakhyo: joe" lo: li" genae".

⁸Ai bam wa qid gyui ru: Yuda mung" khyo" khyad' lai: lo" mung: lo, sin joe" sho' no, yang ja: khao: ngo" re nhai" pye' li" genae". Mao"So wa ngonhaung" we' daga" na: lhe"- yao" phyid: to" ra" daung jham wa mung"dan: re gug: gam byid' li" nae".

⁹Byumyu" qe naonhaung" we"- gyaug: ru we' zang" phaung: na ge,- myid gaung: nho: va" ra" jo, qo mae na mo, naonhaung" we"- tae" gyo: ge,- gyekhe' nae" jin" jin" kad' to: ge,- gyaug kam" wa gyaug ge,- ngad va"- jin" jin" kad' ge,- gyaug kam" wa gyaug ge,-

¹⁰Naonhaung" yaung: to: ge,- ngadqere: aijham wa khonhae" re: aung myaug nae" mangad:- naonhaung" qo" jhau: qhi" jhau ge,. Ngadqere: aigu: alhab' dao: je ngad: ra". Pe"mung:ga"re Mao"So wa ngonhaung" we' daga" na:- ga: ta" ra".

¹¹ASANG wa yao" qi" qhang: ra" qam: so' yang amyu" byu qe cao" ko" ra" khyo re mabocao" ye: nae" qhid' mae" ngore ta" peim: byid' ra". Yao: wa-

¹²Amyu" byu qe yaung: to" rumae dabobo wa,- amung: yao: bam gyaug: ra" ja: rere: dagyaug wa,.

¹³Qam: bo: ra" ASANG ngo wa gyang" lho" yaug ngad: rure beim: wa,. Nao gyaug ca" yaug wa ngo ngad:-

¹⁴Nga" nho: gyaug pho: gyang" lho" ruyang amyu" byu qe khyid tha" thu: lang: ko" ra" laug baui: we' dakhyo: ngo boe" jo; ra". Ngo wa Yuda mung"dan: byu qe- Israel byu qe- Yerusalem byu qe alhab' mo, myi" genae" ngad: ra" lha" we' dakhyo: boe" jo; ra".

¹⁵Myo: sho' mo, tha" thu: lang" li" genae". Yao: bam gyang: lang" lo" gemung: be; cad' yu: li" genae". Yao: bam lha" mae myi" li" genae"- ga: ta" ra".

¹⁶Nga" mho"zo: qe naonhaung" wa Mao"So: yang ngore byid' to" ra" mungdao: re gug: gam byid: mung: zaui" zag: ci nae" ngad: ako".

¹⁷ASANG wa yao" amyu" byu qemae" phao: vho' byaug: ava". Ngadqere: ngo wa yao: re khug ngha mung: nga" myid: lao" khyo yao: mae ke' to" ra".

¹⁸Cetau mae ngo wa ASANG: yang byid' to" ra" zoshao qe we' daga" ngad:- Ziun bam mae" tao" khau" mae zaung yang: qam: bo: ra" ASANG wa Israel byu qe: qhid' mae" daui: na: ra" mungdao: khyo" ngonhaung" re nhao: to" ava".

¹⁹Ngadqere: byu qe wa mungdao: jham re- lo, kyo' qu" mo,- jan: zho: mo,- dao: so' so' mo, we' layeim: qemae" yemyid' yu genae" qhid' mae" naonhaung" re ta" li" genae". Ai: tho' mago"- yao: bam wa- daui: na mo; gaung tha" byo jham we' shid: jo, mo, we' jho" jhau mung: mungdao: jham re gai: myid' yu: ra"- ga: ta" li" genae".

²⁰Ailao" naonhaung" wa- ASANG naonhaung" re mho" shid' na: rure tae" gyo: ge,- jan: zho: mo; dao: re datae" gyo: ge,. Yao: bam: yang naonhaung" re ta" ru wa naonhaung" qhid' mae" pe" akyu" mabo ngad: ra" ein: phaug' tau: genae" ngad: ako"- ga: ta" ra".

²¹Mung" byu qe wa vae: moe; yang: qam: shan: ru we' mung"dan: jao: sho' khyo du" lae" qin" ako". Yao: bam: vae: moe' ru we' nhag' yo" ruyang yao: bam: kho:kham qere re: yao: bam: Mao"So rere: nhang" li" genae". Yao: bam mug:gaung khyo tau: qu"-

²²Mangad: lao" myid gaung khyo zhaug' qu" li" genae". Ngadqere: yao: bam wa qug: khai:- mug: cad' we' yao: bam re khe' thug' pye' ra" gyaug pho: mug: cad' re za: the' myao: li" genae".