Read Maru XEIM: NGAUI" 1 Bible Online

XEIM: NGAUI" 1 - Maru bible

XEIM: NGAUI" 1

¹ASANG wa Moshe re ASANG qhid' kheim: Zaung mae" khai mung:-

²Yao: bam: xeim: jham re yao: bam ngaui" byid: gelao"- phug' cao" genae" qhid' mae" o mae tung" to" ra" tarha" jham re Israel byu qe: qhid' mae" Moshe re byid' ra". Byu dayaug yaug gug'nyhug' ngaui" xeim: re byid: nae" ngad: re airu wa yao: nho: nung: dadau: mangad: lao"- yao" yao dadau:- mangad: lao" wa yao" cad' be, dadau: jham mae" ngad qo: ra".

³Yao: wa yao" nung: re phad' ngaui" byid' ra" xeim: khyo" byid' ngad: re wa yao: wa qo mabo: ra" nung: jaung lo: re cili" byid: ca" ra". Yao: re ASANG khae: yu byid' li" nae" qhid' mae" yao: wa ai: gug'nyhug' re ASANG: qhid' kheim: Zaung kham: dung: mae nha: to: ca" ra".

⁴Ai: yaug wa ai: nung: jaung lo" nho: au: dao mae yao" lo, kai: byid: nae" ngad: ra". Airu wa yao" qobo re yu: pye' byid' ra" mang dae ngaui" xeim: khyo" khae: yu byid' ru qhug' li" nae".

⁵Yao: wa ai: nung: jaung lo: re aitau mae se' mung:- Arun nho: kaung mae" khinjaung qe wa ai: sa: ASANG re qhaug' byid: mung: yang:- Zaung kham: dung: mae jo; ra" phan shad' khao: ngo" mae vhag' sheim" pye' li" genae".

⁶Ai: thao re yao: wa ai: gug'nyhug' re shoqid qhid' pye' mung: je, nae" ngad: ra".

⁷Amung: khinjaung qe wa phan dao mae thao: nyhang" seim" zao mung: myi: te' nae" ngad: ako".

⁸Yao: bam wa au: we' xau bobo yang: ai: shoje, jham re myikhyeim" dao mae vo; kai" li" genae" ngad: ra".

⁹Aiyaug wa khug lam khug sang: we' khyid jham re cid' pye' ca" ra". Amung: Tarha" vao: ra" khinjaung pho" wa phan dao mae dau: geim" re phad' ngaui" byid' li" nae". Ce: zo:ve xeim: meim sheim wa ASANG re ngaui nhao: ra".

¹⁰Byu dayaug wa yao" yao- mangad: lao" yao" cad' be, dadau: dau: re xeim: ngaui" byid' ngad: re aiwa qo mabo: ra" alo: ngad ca" ra".

¹¹Yao: wa aire phan mug: am: shad' mae se' mung:- khinjaung qe wa ai: gug'nyhug' sa: re phan byid shad' geim" khyo vhag' sheim" ke' genae" ngad: ra".

¹²Aire bin: phyo' thao re tarha" vao: ra" khinjaung pho" wa au: we' xau bobo yang:- gaung dau alhab' re myikhyeim" dao khyo vo; zaui: ke' li" genae".

¹³Ai: yaug wa khug lam khug sang: we' khyid jham re cid' ca" ra". Amung: khinjaung pho" wa ai: ngaui" xeim: re ASANG re qhaug' byid: mung:- ai: gu: alhab' re phan dao mae phad' ngaui" byid' li" nae". Ce: zo:ve xeim: meim sheim wa ASANG re ngaui nhao: ra".

¹⁴Byu dayaug wa ngho' re phad' ngaui" ra" xeim: khyo" ngaui" byid: nae" ngad: re aiwa phaung" kyug' mangad: lao"- jid: au ngad ca" ra".

¹⁵Khinjaung pho" wa aire lang zang: nhag: phyid' mung:- phan mae kai: yang: au: re phan dao mae phad' ngaui" nae" ngad: ra". Sa: re phan tau" te' shad' khyo zhin: khyo" pye' nae" ngad: ra".

¹⁶Yao: wa lad re yu: pye' mung:- aimae bo: ra" gu: we' myiqe, vhe' khyo" to" ra" jo, qo ngad: ra" phan ba thug' shad' khyo shapye' to: nae" ngad: ra".

¹⁷Yao: wa daung re zaui" ci mung:- daung maqeim lo: gaung re lao" kho' yang: phan dao mae dau: geim" re phad' ngaui" byid' li" nae". Ce: zo:ve xeim: meim sheim wa ASANG re ngaui nhao: ra".