Read Maru XEIM: NGAUI" 10 Bible Online

XEIM: NGAUI" 10 - Maru bible

XEIM: NGAUI" 10

¹Arun nho: yauggai zo: Nadab we' Abihu tao wa yao: yao" myi: ug' dayaug dalam: ci mung:- ai: khug mae myi: gyang" ra" myi:gyoe: jham ke' yang:- aimae nae pyo: ja: ke' mung:- ASANG re qhaug' byid' ako". Ngadqere: ai: myi: wa gyang"lho" ru mangad: ngad: ra". Pe"mung:ga"re aire qhaug' byid: nae" qhid' mae" ASANG wa yao: tao re amyin" mabyid' to: ngad: ra".

²ASANG wa nyag din taung" myi: re nhao: ke' mung:- ASANG: qhid' kheim: aitau mae yao: tao re ngha" se' pye' ra".

³Ailao" Moshe wa Arun re ceru wa ASANG yao: dao: jhau: ra" au: re- ngore caung da" byid' ra" mo, alhab' wa nga" nho: gyang"lho" rure phug' myao: ca" ra"- ngo wa nga" nho: byumyu" re nga" phungbao qhu" byid: nae"- ga: ta" ra" dao: ngad: ra"- ga: ta" ra". Ngadqere: Arun wa sae za: na: jo; ra".

⁴Moshe wa Arun nho: yao: gan Uzie nho: yauggai zo: tao ngad ko" ra" Mishae we' Elzaphan tao re- cekhyo li" gemung: ce: gyang"lho" ra" jamu mae" ni" shid' tao: yao: mao: yao:nhaung: tao: nho: maogaung re li" vo; yu mung:- thang: na: ra" jamu taung gaung shad' mae yedao: to: ge,- ga: ta" ra".

⁵Airumung: yao: shid' tao wa li" mung: bau: mae" maogaung re zaui: mung: Moshe ta" ru we' dakhyo:- thang: na: ra" jamu taung gaung shad' khyo yedao: pye' ako".

⁶Ai: thao Moshe wa Arun re we' yao" yauggai zo: tao ngad ko" ra" Eleaza we' Ithama tao re naonhaung" au: re makyo' shaung lo: kad' to: mangad: lao"- naonhaung" kaug' qhui: na: ra" khyo re qhu" byid: nae" qhid' mae" naonhaung" mai bau: jham re dalao" cad' ge,- naonhaung" airu: kad' ko" ngad: re wa shid: li" genae"- amung: ASANG wa mo,phung: geim" re nhag' yo" li" nae". Ngadqere: ASANG: yang nhao: ke' ra" myi" yang ngha" se' pye' ra" ce: sushid re naonhaung" mao:nhaung: Israel byu qe wa kaug' ngug nae" akhang" qo" ako".

⁷Zaung kham: dung: mae" dalab ge,- mangad: lao" wa naonhaung" shid: li" genae". Pe"mung:ga"re naonhaung" wa ASANG: xau: yang gyad mung: qhaug' byid' to: va" mo, ngad: ako"- ga: ta" ra". Airumung: yao: bam wa Moshe ta" ru we' dakhyo: kad' ako".

⁸Moshe wa Arun re-

⁹Nao we' ni" yauggai zo: qe wa sabyi qang: mangad: lao"- yhid phai: re bin: shaug' thao nga" qhid' kheim: Zaung khug khyo magai: vao ye: genae"- naonhaung" vao ye: geyang: ngad: re shid: li" genae". Ce: tarha" wa naonhaung" myid:zo: qe alhab' yang phug' cao" genae" ra" tarha" ngad: ra".

¹⁰Naonhaung" wa Mao"So: yang sang: ra" gu: jham we' shava alhab' mo; qhid' mae" ci: ra" ja: jham: agyo: mae re:- caung:pa" thung" khyo" san sin" ru we' masan sin" ra" ja: agyo: mae kho' to: ca" ako".

¹¹Naonhaung" wa Moshe khyo" yang ngo naonhaung" re byid' to" ra" tarha" jham alhab' re Israel byu qere mho" byid: ca" ako".

¹²Moshe wa Arun we' yao" dang: jo, shiko" ra" yauggai zo: tao ngad ko" ra" Eleaza we' Ithama bam re-ASANG re qhaug' byid' ra" zo:ve ngaui" xeim: kad' rumae" tang" to" ra" cinman" ngaui" xeim: re yu mung:- aire man" make' lo: mug kad' yang:- ai: mug re phan nhae mae zo: ge,- pe"mung:ga" re ce: ngaui" xeim: wa gyai gyang" lho" ru ngad: ra".

¹³Ai mug re gyang"lho" ra" jo, qo mae zo: ge,-airu wa ASANG re qhaug' byid' ra" zo:ve ngaui" xeim: mae" nao we' ni" yauggai zo: qe: qhid' mae" gae bam ngad: ra". Airu wa ASANG: yang ngore byid' to" ra" amyin" dao: ngad: ra".

¹⁴Ngadqere: nao we' ni" yham byu qe wa qao mhaung" rere: gakai: lai mung: ra" jhaung qhu" we' khinjaung qe: qhid' mae" alu: ASANG re qhaug' byid' to" ra" paung sin re zo: ge,. Naonhaung" wa aijham re caung:pa" thung" khyo" san sin" ra" jo, qo khai: mae ngadqere: zo: ge,. Ce: ngaui" xeim: wa Israel byu qenho: zam" khug: ra" ngaui" xeim: ngaui" byid' rumae" nao we' ni" zo: dau qere gae bam khyo"- naonhaung" re byid' to" ru ngad: ra".

¹⁵Yao: bam wa xau re zo:ve ngaui" xeim: khyo" qhaug' byid' ra" ayo, mae paung sin we' qao mhaung" re cili" genae" ngad: ra". ASANG amyin" byid' to" ru we' dakhyo:- ai: gu: wa nao we' ni" zo: dau qe: qhid' mae" apyad ato naonhaung" qhid' mae" ngad: ra".

¹⁶Moshe wa qobo ngaui" xeim: qhid' mae" ci: ra" cad' be, sin: yang: myid: lao"- aire bin: phad' ngaui" byid' pye' va" rure ba: yu: ra". Ceru: yang Moshe wa Eleaza we' Ithama tao re nhag' yo" ra". Amung: yao: wa-

¹⁷Ni" shid' tao wa ai: qobo ngaui" xeim: re gyang"lho" ra" jo, qo mae pe"mung: mazo: ko" i? Aiwa gyai gyang"lho" ru ngad: ra"- mo,phung: geim" nho: qobo re yu: pye' byid: nae" qhid' mae" airu re ASANG wa naonhaung" re byid' to" ru ngad: ra".

¹⁸Ainho: sa: re gyang"lho" ra" Zaung khug khyo maci vao ye: genhaung? ngo amyin" byid' to" ru we' dakhyo:- ni" shid' tao wa ai: ngaui" xeim: re aitau mae zo" pye' nae" ang: ako"- ga: ta" ra".

¹⁹Ailao" Arun wa qobo ngaui" xeim: re ana" ba ngo zo" pye' yang: ngad: re ASANG khae: yu naeva" i? Mo,byu qe wa ana" ba yao: bam: qobo ngaui" xeim: jham re ASANG re qhaug' byid: mung:- yao: bam: phad' ngaui" byid' ra" ngaui" xeim: jham re cili" ako". Ngadqere: ai: gyaug pho: mau" zo" jham wa ngo mae boe" ava"- ga: tau" ra".

²⁰Moshe wa ce: dao: re gyo: lao"- nhag' gyo" dag: ra".