Read Maru XEIM: NGAUI" 13 Bible Online

XEIM: NGAUI" 13 - Maru bible

XEIM: NGAUI" 13

¹ASANG wa Moshe we' Arun re ce: thung"li jham re byid' ra".

²Byu dayaug yaug wa yao" shoqid mae dae jad: khu mangad: lao"- byang- mangad: lao" mao gae:: gai: boe" li" ra" khu qo" yang: ngad: re- yao: re Arun kaung mae" khinjaung pho" jhao" jhui" ye: nae" ngad: ra".

³Khinjaung pho" wa ai: dae khu re ca: qhu" mung:- aimae" yaug ra" shomug' wa phyu: byaug yang: dae khu wa lhang" gam: mae" shoqid tho' je: no; vao lo" ru ngad: re- airu wa mao gae: ngad: ra". Ailao" khinjaung pho" wa aiyaug re masan masin" ga: ta" nae" ngad: ra".

⁴Ngadqere: dae jad: wa phyu mung:- ai: lhang" gam: mae" shoqid tho' je: no; vao lo" ra" ave, mamyao- aimae yaug: ra" shomug' jham maphyu re wa- khinjaung pho" wa aiyaug re nhad' ba lam: lam: yao: re za: nha: to: nae" ngad: ra".

⁵Khinjaung pho" wa nhad' ba ein: ba re yao: re dam: ca: qu" nae" ngad: ra". Yao: qu" re ai: dae jad: wa dakhyo: za: ngad: jo, mung: gatau maje" lo" byaug ngad: re wa- yao: re gatau nhad' ba yao: re za: dam: nha: to: nae" ngad: ra".

⁶Khinjaung pho" wa nhad' ba ein: ba re yao: re dam: ca: qu" mung: ai: dae jad: wa sham: lo" byaug yang:- gatau khyo maje" lo" nhaung ngad: re wa khinjaung pho" wa yao: re caung:pa" thung" khyo" san sin" yaug ngad:- aiwa dae jad: za: angad: ga: ta" pyo: ke' nae" ngad: ra". Byu aiyaug wa yao" mai bau: re zab pye' nae" qhid' mae" ngad mung: caung:pa" thung" khyo" san sin" yaug boe" li" nae".

⁷Ngadqere: dae jad: wa khinjaung pho" ca: qu" mung:- yao: re san sin" ga: bin: ta" pyo thao re dam: je" byaug: ngad: re- yao: wa khinjaung pho" qhid' kheim: khyo yedam: qhu" byid: ca" ra".

⁸Ailao"- khinjaung pho" wa yao: re dam: ca: qu" mung: ai: dae jad: wa gatau khyo je" lo" yang: ngad: re wa khinjaung pho" wa yao: re masan masin" ru ngad: ra"- mao gae: ngad: ra" ga: ta" pyo: ke' nae" ngad: ra".

⁹Byu dayaug yaug mao gae: de; ngad: re- yao: re khinjaung pho" jhao" jhui" ye: nae" ngad: mung: khinjaung pho" wa yao: re ca: qu" li" nae".

¹⁰Ai: dae jad: wa yao" shoqid mae boe" ra" dae jad: mae" shomug' jham phyu: byaug mung: vhag' jham byang" sho' bo: jo; ngad: re wa- aiwa mao gae: dae xug' ngad: ra" ga: ta" pyo nae" ngad: ra".

¹¹Khinjaung pho" wa yao: re masan masin" ga: ta" pyo nae" ngad: ra". Yao: re gatau nha: to: maca" ngad: ra". pe"mung:ga"re- yao: wa de: de: yao: masan masin" ngad: yaug ngad: ra".

¹²Mao gae: wa je" lo" mung:- aiyaug re au: mae" khyid joe" sho' je" lo" yang: ngad: re khinjaung pho" wa yao: re dam: ca: qu" nae" ngad: ra".

¹³Ai: mao gae: wa gaigai: yao:- dau: geim" mae je" lo" va" ngad: re khinjaung pho" wa- aiyaug re caung:pa" thung" khyo"- masan masin" ga: ta" pyo nae" ngad: ra". Yao: wa dau: geim" shoqid phyu: byaug: va" ngad: re wa yao: wa caung:pa" thung" khyo" san sin" yaug ngad: ra".

¹⁴Ngadqere: ai: dae jad: bung" thug' li" ngad: re wa yao: wa masan masin" ngad: ra".

¹⁵Khinjaung pho" wa yao: re dam: ca: qu" mung:- yao: wa dae jad: khu re myao: ngad: re- yao: wa aiyaug re masan masin" ga: ta" pyo: ke' nae" ngad: ra". Dae jad: khu ein: ru wa mao gae: re ta" ru ngad mung: ai de; ra" yaug wa masan masin" ngad: ra".

¹⁶Ngadqere: ai: dae jad: wa gai: lo" mung:- dam: phyu: li" lao"- aiyaug wa khinjaung pho" jhao" ye: nae" ngad: ra".

¹⁷Khinjaung pho" wa yao: re dam: ca: qu" li" nae". Dae jad: wa phyu: byaug va" ngad: re wa- yao: wa caung:pa" thung" khyo" san sin" mung:- khinjaung pho" wa yao: re san sin" ra"- ga: ta" pyo: ke' nae" ngad: ra".

¹⁸Byu dayaug wa byang myaug yang: gai: lo" byaug mung:-

¹⁹Thao re ai: byang tau mae phyu: qae" li" mangad: lao"- byao byao ne: ra" aphyu khu boe" thug' li" ngad: re- yao: wa khinjaung pho" jhao" ye: nae" ngad: ra".

²⁰Khinjaung pho" wa yao: re ca: qu" nae" ngad mung:- ai: khu wa lhang" gam: mae" shoqid tho' je: no; vao: byaug nhohab ngad mung:- aimae yaug: ra" shomug' jham phyu: byaug: ngad: re yao: wa aiyaug re masan masin" ra" ga: ta" pyo: ke' nae" ngad: ra". Airu wa byang mae" qhid: li" ra" mao gae: ngad: ra".

²¹Ngadqere: khinjaung pho" wa aire ca: qu" mung:- yaug: ra" shomug' jham wa aphyu maboe" byaug lo:- ai: dae jad: wa lhang" gam: shoqid tho' je: mano; vao: byaug ngad: re khinjaung pho" wa yao: re nhad' ba lam: lam: gatau nha: to: nae" ngad: ra".

²²Ai: akhu wa je" lo" yang: ngad: re wa khinjaung pho" wa yao: wa mao gae: de, yaug ngad mung:- masan masin" ra" ga: ta" pyo: ke' nae" ngad: ra".

²³Ngadqere: ai: dae khu wa gatau malai: lo:ngad: jo, mung:- maje" lo" ngad: re wa byang jho: khu za: ngad: jo, mung:- khinjaung pho" wa yao: re caung:pa" thung" khyo" san sin" ra" ga: ta" pyo: ke' nae" ngad: ra".

²⁴Myi: dae de; ra" byu dayaug wa- yao" dae khu mae phad' khyad' to" ra" gu: mae aphyu akhu- mangad: lao" byao byao ne: ra" aphyu khu dung: li" ru ngad: re-

²⁵Khinjaung pho" wa yao: re ca: qu" nae" ngad: ra". Ai: dae khu mae yaug: ra" shomug' jham wa phyu: byaug mung:- lhang" gam: shoqid tho' je: no; vao: jo; ngad: re wa airu wa myi: khu mae" boe" li" ra" mao gae: ngad: ra". Aimung: khinjaung pho" wa yao: re masan masin" ra" ga: ta" pyo: ke' nae" ngad: ra".

²⁶Ngadqere: dae khu mae" shomug' jham maphyu lo:- ai: dae yae mae" shoqid tho' maje: no; vao lo" ngad: re wa khinjaung pho" wa yao: re nhad' ba lam: lam: gatau nha: to: nae" ngad: ra".

²⁷Khinjaung pho" wa nhad' ba ein: ba mae yao: re dam: ca: qu" nae" ngad mung:- ai: dae khu wa je" lo" na: ngad: re wa- aiwa mao gae: ngad: ra". Amung: khinjaung pho" wa yao: re masan masin" ga:- ta" pyo: ke' nae" ngad: ra".

²⁸Ngadqere: ai: dae khu wa malai: lo:ngad: jo, mung:- maje" lo" ngad: re wa airu wa mao gae: mangad: ngad: ra". Khinjaung pho" wa yao: re caung:pa" thung" khyo" san sin" ra"- ga: ta" pyo: ke' nae" ngad: ra". Pe"mung:ga"re airu wa myi: dae khu za: angad: ra".

²⁹Yauggai dayaug- mangad: lao" myiqe: dayaug wa au: mae- mangad: lao" ae thao mae dae jad: boe" lao"-

³⁰Khinjaung pho" wa airu re ca: qu" nae" ngad: ra". Airu wa lhang" gam: shoqid tho' je: no; vao lo" byaug nhohab ngad mung:- ai: dae jad: mae yaug: ra" shomug' jham wa pyam: pyam: mung: abo" zang ngad: re wa airu wa mao gae: ngad: ra". Amung: khinjaung pho" aiyaug re masan masin" ra" ga:- ta" pyo: ke' nae" ngad: ra".

³¹Yao: re khinjaung pho" ca: qu" au:- ai: dae jad: wa lhang" gam: shoqid tho' maje: no; vao lo" ru mangad:- au: mae xae gai mayaug ngad: re wa yao: wa aiyaug re nhad' ba lam: lam: gatau nha: to: nae" ngad: ra".

³²Khinjaung pho" wa nhad' ba ein: ba mae yao: re dam: ca: qu" nae" ngad mung: ai: dae jad: wa maje" lo"- aimae yaug: ra" shomug' jham wa mabo" lo" byaug- lhang" gam: shoqid tho' maje: no; vao lo" byaug yang: ngad: re wa-

³³Byu aiyaug wa ai: dae jad: lhang" gam: mae" je yang: xae myhaug' pye' nae" ngad: ra". Ai: thao khinjaung pho" wa gatau ba na nhad' ba lam: lam: yao: re gatau dam: nha: to: nae" ngad: ra".

³⁴Nhad' ba ein: ba mae khinjaung pho" wa dae jad: re dam: ca: qu" nae" ngad mung:- aiwa maje" lo"- lhang" gam: shoqid tho' maje: no; vao lo" byaug yang: ngad: re wa yao: wa aiyaug re caung:pa" thung" khyo" san sin" ra" ga: ta" pyo: ke' nae" ngad: ra". Byu aiyaug wa yao" mai bau: jham re cid' pye' mung: yao: wa san sin" yaug ngad: li" nae".

³⁵Ngadqere: san sin" va" ga: yao: ta" pyo: ke' thao re dae jad: dam: je" li" ru ngad: re-

³⁶Khinjaung pho" wa yao: re dam: ca: qu" nae" ngad: ra". Dae jad: wa je" lo" byaug mung: ngad: re wa shomug' bo" mabo" rure qu" maqo lo:ngad: ra". Yao: wa de: de: yao: masan masin" yaug ngad: ra".

³⁷Ngadqere: khinjaung pho" nho: myid mae ai: dae jad: wa maje" lo" byaug shomug' gai jham aimae yaug: jo,- dae jad: wa gai: lo" byaug va"- ga: myid: jho: ngad: re wa- khinjaung pho" wa yao: re caung:pa" thung" khyo" san sin" ra" ga: ta" pyo: ke' nae" ngad: ra".

³⁸Yauggai mangad: lao" myiqe: dayaug yaug: nho: shoqid mae aphyu mung: ra" akhu jham de; li" lao"-

³⁹Khinjaung pho" wa byu aiyaug re ca: qu" nae" ngad: ra". Ai: akhu jham wa ma" ma" mung: phyu ru ngad: re aiwa shoqid mae jad mung: qeim: lo" byaug: ra" akhu za: ngad: ra" aiyaug wa caung:pa" thung" khyo" san sin" yaug ngad: ra".

⁴⁰Byu dayaug yaug wa yao" au: nhaung" thao" shad'- mangad: lao"- nga: the: mae" xae shu: lo" byaug: ngad: re- airu: yang yao: re masan masin" maboe" nhao ngad: ra".

⁴¹

⁴²Ngadqere: ai: xae shu: lo" byaug: ra" akhu mae byao byao ne yang: akhu jad: li" ngad: re airu wa mao gae: ngad: ra".

⁴³Khinjaung pho" wa yao: re ca: qu" mung: aimae byao byao ne yang: aphyu zang dae jad: boe" li" re-

⁴⁴Khinjaung pho" wa yao: re masan masin" ngad: ra" ga: ta" pyo: ke' nae" ngad: ra"- pe"mung:ga"re yao" au: mae mao gae: boe" yaug ngad: ra".

⁴⁵Mao gae: de; ra" yaug wa mai bau: jad ve, ca" ra". Yao" au: re makyo' shaung lo:- yao" myo, khung: o: tam" re nghoe' pye' yang:- masan masin"- masan masin" ein: hug' nae" ngad: ra".

⁴⁶Mao gae: boe" ra" ayo, gu: mae- masan masin" yaug ngad mung:- yao: wa gaje qe we' gao: yang:- jamu taung gaung mae na ca" ra".

⁴⁷Sug' gug mai bau:- jid: mo" pin: mai bau:- jid: mo" pin: cug'-

⁴⁸Sug' gug mai- shoqid- shoqid yang kad' to" ra" ja: alhab'- mae bao" jaung" to" lao"-

⁴⁹Ai: bao" jaung" wa anyug zang- mangad: lao" byao byao ne zang ngad mung:- aiwa je" lo" na: ra" bao" jaung" ngad: re wa- khinjaung pho" re yeqhu" ca" ra".

⁵⁰Khinjaung pho" wa aire ca: qu" mung:- ai: zai re nhad' ba lam: lam: shapye' to: nae" ngad: ra".

⁵¹Amung: yao: wa nhad' ba ein: ba mae ai: zai re dam: ca: qu" nae" ngad mung:- bao" jaung" wa je" lo" byaug yang: ngad: re- ai: zai wa masan masin" ngad: ra".

⁵²Khinjaung pho" wa ai: zai re ngha" pye' nae" ngad: ra". Pe"mung:ga"re bao" jaung" je: to" li" yang: aire myi" yang ngha" pye' ca" ra".

⁵³Ngadqere: yao: mae ca: qu" au:- bao" jaung" wa ai: zai mae maje" lo" rure khinjaung pho" myao: ngad: re-

⁵⁴Yao: wa ai: zai re cid' pye' mung: gatau nhad' ba lam: lam: shapye' to: nae" qhid' mae" amyin" byid: nae" ngad: ra".

⁵⁵Ai: thao re yao: wa aire ca: qu" mung:- bao" jaung" wa gatau anyug malai: lo: gatau maje" lo" sho' ngadqere: airu wa masan masin" ngad: ra". Qhid' au: shad'- mangad: lao" nhaung thao" shad' man: lo" ru ngad: re ngad- nao wa ai: zai re myi: mae ngha" pye' ca" ako".

⁵⁶Ngadqere: khinjaung pho" aire dam: ca: qu" au:- bao" jaung" wa baui" lo" byaug: ngad: re- yao: wa ai: mai bau:- mangad: lao" shoqid mae" ai: bao" jaung" de; ra" gu: re lao" cad' pye' nae" ngad: ra".

⁵⁷Ai: thao- bao" jaung" wa dam: to" li" mung:- dam: to" je" li" ngad: re- aire sang: ra" yaug wa ai: zai re myi: mae ngha" pye' nae" ngad: ra".

⁵⁸Yao: wa ai: zai re cid' pye' mung:- akhu byaug: lo" ngad: re yao: wa aire dam: cid' nae" ngad: ra". Ai: zai wa caung:pa" thung" khyo" san sin" ra" zai ngad: ra".

⁵⁹Airumung: ce: tarha" wa sug' gug mai bau:- jid: mo" mai bau:- sug' gug mai- shoqid: yang kad' to" ra" ja: alhab' khoja: ngad ngad bao" jaung" to" ra" mai bau: we' sin" ra" tarha" ngad: ra". Amung: ce wa caung:pa" thung" re cao" yang: san sin"- mangad: lao" masan sin" ga" rure khoru: ta" phyid' nae" tarha" ngad: ra".